ދިވެހިރާއްޖޭގެ ތަރިކަ ރައްކާތެރިކުރުމުގެ ގާނޫނުގެ ދަށުން އެކުލަވާލަންޖެހޭ ގަވާއިދުތައް އެކުލަވާލައި، ގެޒެޓު ކުރުމަށް ފޮނުއްވަވާފައިވާކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް، ޔުމްނާ މައުމޫން ވިދާޅުވެއްޖެއެވެ.

ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީއަށް މިނިސްޓްރީގެ މަސައްކަތްތަކާއި ގުޅޭގޮތުން މައުލޫމާތު ދެއްވަމުން މިނިސްޓަރު ޔުމްނާ ވިދާޅުވީ، ދިވެހިރާއްޖޭގެ ތަރިކަ ރައްކާތެރިކުރުމުގެ ގާނޫނުގެ ދަށުން އެކުލަވާލަންޖެހޭ ގަވާއިދުތައް، އެ ގާނޫނުގައި ބަޔާންކޮށްފައިވާ މުއްދަތަށް ނިންމައި، އެޓާނީ ޖެނެރަލްއާއި ކަމާއިބެހޭ އެހެނިހެން ފަރާތްތަކުގެ ޚިޔާލު ހޯދުމަށްފަހު، އެ ޚިޔާލުތަކަށް ރިއާޔަތްކޮށް ގަވާއިދުތަކަށް ގެންނަންޖެހޭ ބަދަލުތައް ގެނެސްފައިވާ ކަމަށެވެ. އަދި މިހާރު އެ ގަވާއިދުތައް ގެޒެޓް ކުރުމަށް ރައީސުލްޖުމްހޫރިއްޔާގެ އޮފީހަށް ފޮނުވާފައިވާ ކަމަށް މިނިސްޓަރ ފާހަގަކުރެއްވިއެވެ.

ދިވެހިރާއްޖޭގެ ތަރިކަ ރައްކާތެރިކުރުމުގެ ގާނޫނުގެ ދަށުން އެކުލަވާލަންޖެހޭނެ ކަމަށް އެ ގަނޫނުގައި ބަޔާންކޮށްފައިވަނީ، ދިވެހިރާއްޖޭގެ ސަގާފީ ތަރިކަ ރައްކާތެރިކުރުމުގެ ގަވާއިދާއި ދާރުލްއާސާރު ހިންގުމުގެ ގަވާއިދެވެ.

މިނިސްޓަރު ޔުމްނާ އިތުރަށް ވިދާޅުވީ ކޮވިޑް-19 އާއި ގުޅިގެން ގޭގައި ތިބެގެން މަސައްކަތް ކުރަން ފެށިފަހުން ވެސް މިނިސްޓްރީގެ ދާއިރާތެރެއިން ގިނަ މަސައްކަތްތަކެއް ކުރެވިފައިވާ ކަމަށެވެ.

އެގޮތުން މާރިޗު މަހު ސަރުކާރުގެ އޮފީސްތައް ބަންދު ކުރުމަށް ރައީސް ސޯލިހު ނިންމެވުމާއި ގުޅިގެން މިނިސްޓްރީއާއި މިނިސްޓްރީގެ ދަށުން ހިންގާ މުއައްސަސާތަކުގެ ހުރިހާ ޚިދުމަތްތައް ފޯނާއި އޮންލައިން މަންސަތައް މެދުވެރިކޮށް މެދުކެނޑުމެއްނެތި ދެމުންދާކަން މިނިސްޓަރު ފާހަގަކުރެއްވިއެވެ.

މި މުއްދަތުގައި ގޭގައި ތިބެގެން މަސައްކަތް ކުރަމުންދާއިރު، މިނިސްޓްރީގެ ދާއިރާގެ ތެރޭގައި ހުރި އެކި ކަންކަން ތަރައްގީކޮށް ކުރިއެރުވުމަށް ހަދަންޖެހޭ ގާނޫނުތަކާއި ގަވާއިދުތައް ހެދުމުގެ މަސައްކަތް ކުރިއަށްދާކަން މިނިސްޓަރ ފާހަގަކުރެއްވިއެވެ. އަދި މިނިސްޓްރީގެ ދާއިރާގެ ތެރެއިން ހޭލުންތެރިކަން އިތުރު ކުރުމަށާއި، އެކި ދާއިރާތަކުން މީހުން ތަމްރީނުކުރުމަށް އޮންލައިން ޕްރޮގްރާމްތަކާއި ލެކްޗަރތައް ކުރިއަށްދާކަމަށް މިނިސްޓަރ ޔުމްނާ ވިދާޅުވިއެވެ.

މީގެ ތެރޭގައި ދިވެހިބަހުގެ އެކެޑަމީން މިހާތަނަށް އޮންލައިންކޮށް ކުރިއަށް ގެންގޮސްފައިވާ، އަދި މިހާރު ކުރިއަށްގެންދާ ކޯސްތަކާއި، އާދީއްތަ ދުވަހުގެރޭ ގައުމީ ކުތުބުޚާނާއިން ފެށުމަށް ހަމަޖެހިފައިވާ އޮންލައިން ކޯސް މިނިސްޓަރ ފާހަގަކުރެއްވިއެވެ.

މި ދަނޑިވަޅުގައި އާމްދަނީ ހޯދުމުގައި ފަންނާނުންނަށް ކުރިމަތިވެފައިވާ ދަތިތަކަށް ޙައްލެއް ހޯދައިދިނުމަށް ދުރާލައި މަސައްކަތްތަކެއް ކުރެވުނުކަން ފާހަގަކުރައްވާ، މިނިސްޓަރ ވިދާޅުވީ ސަރުކާރުން މިހާރު އިއުލާނުކޮށްފައިވާ އެކިއެކި އެހީގެ ސްކީމްތަކުގެ ތެރެއިން ފަންނާނުންނަށް އެހީ ވެވެމުންދާ ކަމަށެވެ. މީގެ އިތުރުން އޮލިމްޕަސް ބަންދުކުރުމާއި ގުޅިގެން ފިލްމީ ދާއިރާ ވަރަށް ބޮޑަށް ހުއްޓުމަކަށް އައިސްފައިވާތީ، ފިލްމީ ދާއިރާގައި ހަރަކާތްތެރިވާ ފަންނާނުންނަށް އެހީވުމަށާއި، އެ ދާއިރާ އަލުން ކޮޅަށް ޖެހުމަށް، ޓިވީ ޗެނަލްތަކާއި މަޝްވަރާ ކުރުމަށް ނިންމަވާފައިވާކަން ވެސް މިނިސްޓަރ ފާހަގަކުރެއްވިއެވެ.

އޮންލައިން ސްޓްރީމިންގ މަންސަތައް މެދުވެރިކޮށް ފަންނުވެރި އުފެއްދުންތައް އާންމުކޮށް، އޭގެން ފަންނާނުންނަށް ފައިދާވާނެ ވިޔަފާރީގެ މޮޑިއުލްއެއް ހަރުދަނާކުރުމުގެ މުހިއްމުކަން ވެސް މިނިސްޓްރީގެ އިސް ފަރާތްތަކުން ވަނީ ފާހަގަކުރައްވާފައެވެ.

ކޮމިޓީއަށް މައުލޫމާތު ދެއްވަމުން، ސަގާފީ ތަރިކަ ރައްކާތެރިކުރާ ގައުމީ މަރުކަޒު ހިންގެވުމާއި ހަވާލުވެ ހުންނެވި، މިނިސްޓަރ އޮފް ސްޓޭޓް ފޯ އާޓްސް، ކަލްޗަރ އެންޑް ހެރިޓޭޖް، މުހައްމަދު ޠާރިގު ވިދާޅުވީ، މަރާމާތަށްޓަކައި މިހާރު ބަންދުކޮށްފައިވާ މާލޭ ހުކުރު މިސްކިތް، މިހާރު ކުރިއަށްދާ ފުރަބަންދު ނިމި، މިސްކިތްތައް ހުޅުވާއިރު ހުޅުވުމުގެ މަސައްކަތް ކުރަމުންދާކަމަށެވެ. ނަމަވެސް، އިންޑިއާ ސަރުކާރުގެ އެހީގައި ކުރިއަށްގެންދިމަށް ނިންމާފައިވާ އެ މިސްކިތުގެ އާބާތުރަ ފިލުވައި މަރާމާތު ކުރުމުގެ މަސައްކަތް ފެށުމުން، މަސައްކަތް ކުރިއަށްދާގޮތަށް ބަލައި، މިސްކިތުގެ އެކި ބައިބައި ބަންދުކުރަންޖެހޭނެކަން ތާރިގު ފާހަގަކުރެއްވިއެވެ.

ހުކުރު މިސްކިތުގެ އާބާތުރަ ފިލުވުމާއި މަރާމާތު ކުރުމުގެ މަސައްކަތް ފެށޭނެ ތާރީޚެއް އެނގޭނީ މިވަގުތު ދިމާވެފައިވާ އާލަމީ ވަބާގެ ޙާލަތުން ކޮންމެވެސް ވަރަކަށް އަރައިގަނެވިގެންކަން ހެރިޓޭޖް މިނިސްޓްރީން ވަނީ ފާހަގަކޮށްފައެވެ.