ރާއްޖޭގައި ތިބި އިންޑިއާ ރައްޔިތުން ބަލާ އިތުރު މަނަވަރެއް އަންނަނީ
30 މެއި 2020 | ހޮނިހިރު 17:21އިންޑިއާގެ 700 މީހުން ދާނެ
މީގެ ކުރިން އިންޑިއާއިން އައި މަނަވަރެއްގައި ބަޔަކު ފުރަންވެގެން ބޯޓަށް އަރަނީ
ރާއްޖޭގައި ތާށިވެފައި ތިބި އިންޑިއާގެ ރައްޔިތުން އަނބުރާ ގެންދިޔުމަށް، އިންޑިއާ ސަރުކާރުން ކުރަމުންދާ މަސައްކަތުގެ ތެރެއިން ޖޫން މަހުގެ ފަސް ވަނަ ދުވަހު އިތުރު މަނަވަރެއް ރާއްޖެ އައުމަށް ހަމަޖެހިއްޖެ އެވެ.
އިންޑިއާ ސަރުކާރުން ވަނީ މީގެ ކުރިންވެސް ތިން ފަހަރެއްގެ މަތިން އެ ގައުމުގެ އަސްކަރީ މަނަވަރެއްގައި ރާއްޖޭގައި ތިބި އިންޑިއާގެ ރައްޔިތުން ގެންގޮސްފައި އެވެ.
ރާއްޖެ.އެމްވީ އަށް މައުލޫމާތު ދެެއްވަމުން ރާއްޖޭގައި ހުންނަ އިންޑިއާ އެމްބަސީގެ ޑެޕިއުޓީ ހައިކޮމިޝަނަރު ރޯހިތް ރަތީޝް ވިދާޅުވީ، ޖޫން މަހުގެ ފަސްވަނަ ދުވަހު އަންނަ މަނަވަރުގައި 700 މީހުން ފުރުވާލަން ހަމަޖެހިފައިވާ ކަމަށެވެ.
މާލެއިން އިންޑިއާގެ ޓޫޓިކޮރިން އަށް ދަތުރުކުރާ މި މަނަވަރުގައި ދަތުރުކުރާ ފަސެންޖަރުންގެ ލިސްޓު ހައިކޮމިޝަންގެ ފޭސްބުކް ޕޭޖްގައި އާއްމުކޮށްފައި އެވެ. ރޯހިތް ވިދާޅުވީ، އެ ދަތުރަށް ފަހު އިތުުރު ދަތުރެއް ކުރާނެ ކަމަށެވެ. އިންޑިއާ ސަރުކާރުން ވަނީ، ރާއްޖޭގައި ތިބި 1790 މީހަކު މި ލޮކްޑައުން ތެރޭގައި ގައުމަށް ގެންގޮސްފައި އެވެ. އޭގެ ތެރެއިން 1488 މީހުންނަކީ މަނަވަރުގައި ދިޔަ މީހުންނެވެ.
އަދި 302 މީހުންނަކި އިންޑިއާގެ ރީޕެޓްރިއޭޝަން ފްލައިޓް ތަކުގައި ދިޔަ މީހުންނެވެ. އިންޑިއާ އަށް ދާ އެންމެންވެސް 14 ދުވަހުގެ ކަރަންޓީނުގެ މުއްދަތު ފުރިހަމަކުރަން ޖެހޭ އެވެ.
އޭގެ ތެރެއިން ބައެއް މީހުން ވަނީ ކޮވިޑް-19 އަށް ޕޮޒިޓިވްވެފައި އެވެ. ''އޮޕަރޭޝަން ސަމުދްރާ'' ގެ ނަމުގައި ކުރިޔަށް ގެންދާ މި އޮޕަރޭޝަނުގައި ދުނިޔޭގެ އެކި ކަންކޮޅުތަކުގައި ތާށިވެފައި ތިބި އިންޑިއާގެ ރައްޔިތުން އަނބުރާ ގެންދިޔުމުގެ މަސައްކަތް ދަނީ ކުރަމުންނެވެ.
