ޤާނޫނު އަސާސީއަށް އިސްލާހު ގެނައުމުގެ ބިލްގެ ބަހުސް ކުރިޔަށް ގެންދިޔުމަށް މިރޭ ޖަލްސާ ބާއްވަނީ
29 މެއި 2020 | ހުކުރު 14:00މިކަމުގައި ސްޕްރީމް ކޯޓުން ވަނީ އިސްތިޝާރީ ލަފައެއް ލަފައެއް ދީފައި
ރައްޔިތުންގެ މަޖިލީހުން ކުރިޔަށް ގެންދިޔަ ޖަލްސާއެއްގެ ތެރެއިން
ދިވެހި ޖުމްހޫރިއްޔާ ގެ ޤާނޫނު އަސާސީއަށް 5 ވަނަ އިސްލާހު ގެނައުމުގެ ޤާނޫނަށް އިސްލާހު ގެނައުމުގެ ބިލްގެ ބަހުސް ކުރިޔަށް ގެންދިޔުމަށް ހުކުރު ދުވަހުގެ ރޭ ރައްޔިތުންގެ މަޖިލީހުގެ ޖަލްސާ އެއް ބޭއްވުމަށް އެޖެންޑާ ކޮށްފި އެވެ.
ހުކުރު ދުވަހުގެ ރޭ 9 ޖަހާއިރު ބޭއްވުމަށް ހަމަޖެހިފައިވާ ޖަލްސާއަށް މިކަންތައް ކުރިޔަށް ގެންދިޔުމަށް އެޖެންޑާ ކޮށްފައިވާއިރު ސަރުކާރުން މި ބިލު ހުށަހެޅީ ލޯކަލް ކައުންސިލްތަކުގެ އިންތިޚާބު ބޭއްވުމަށް ރައްކާތެރި މާޙައުލެއް ޤާއިމު ކުރެވެންދެން އެ އިންތިޚާބު ފަސްކުރުމަށް މަގުފަހިކޮށް، އެ އިންތިޚާބު ބާއްވައި، އާ މެންބަރުން އިންތިޚާބުވެ، މަޤާމާ ޙަވާލު ވަންދެން މިހާރު އިންތިޚާބުވެފައި ތިބި އަތޮޅު ކައުންސިލުތަކާއި، ރަށު ކައުންސިލުތަކާއި، ސިޓީ ކައުންސިލުތަކުގެ މެންބަރުން، އެމީހުންގެ މަޤާމުގައި ދެމިތިބޭނެ ކަމަށް ކަނޑައެޅުމަށް ޤާނޫނުއަސާސީ އަށް ގެންނަން ޖެހޭ އިޞްލާޙުތައް ގެނައުމުގެ ބޭނުމުގަ އެވެ.
ނަމަވެސް ބިލްގެ ބަހުސް މަރުހަލާގައި މިހާލަތުގައި ޤާނޫނު އަސާސީ އިސްލާހު ކުރެވޭނެތޯ މެމްބަރުންގެ މެދުގައި އުފެދުނު ޚިޔާލު ތަފާތުވުން ތަކާއެކު އެންމެފަހުން މަޖިލީހުން ވަނީ މިކަމުގައި އިސްތިޝާރީ ލަފަކަށް ސުޕްރީމް ކޯޓުގައި އެދުމަށް ފާސްކޮށްފަ އެވެ.
އެ އެދުމުގެ މަތިން ސްޕްރީމް ކޯޓުން ނެރުނު އިސްތިޝާރީ ލަފާގައި ވަނީ ގާނޫނު އަސާސީގައި އިންތިގާލީ މާއްދާއެއް ހިމަނަން ލަފާދީފަ އެވެ.
މީގެއިތުރުން ޖަލްސާއަށް ވަނީ ކޮމެޓީން ހުށަހަޅާ ކަންކަމުގެ ދަށުން ތިން ރިޕޯޓެއް ހުށަހެޅުމަށް އެޖެންޑާ ކުރެވިފައެވެ. "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" ލާމަރުކަޒީ ކޮމިޓީން ދިރާސާކޮށް ނިންމިގޮތުގެ ރިޕޯޓު ބުދަ ދުވަހު ދުވަހުގެ ޖަލްސާއަށް ހުށަހެޅުމަށް އެޖެންޑާކޮށްފައިވާއިރު ކޮވިޑް-19 އާ ގުޅިގެން އަޅާ ފިޔަވަޅުތަކުގެ ސަބަބުން ސަރުކާރުން ހިންގުމަށް ނިންމާފައިވާ ޕްރޮގްރާމް ތަންފީޒުކުރުމަށް ރައްޔިތުންގެ މަޖިލީހުން ދެކޭގޮތް ކަނޑައެޅުމާ ގުޅޭގޮތުން ހުށަހަޅުއްވާފައިވާ މައްސަލައިގައި މިނިވަން މުއައްސަސާތަކުގެ ކޮމިޓީއާ ޙަވާލުކޮށްފައިވާ މަސައްކަތްތައް ދިރާސާކޮށް ނިންމިގޮތުގެ ރިޕޯޓުވެސް ވަނީ އެޖެންޑާކޮށްފައެވެ.
