ސަދަގާތް ކުރުމުގައި އިޚްލާސްތެރި ވުމަށް ހުކުރު ޚުތުބާގައި ގޮވާލައިފި

އިޚްލާސްތެރިކަމަކީ ކޮންމެ ހެޔޮ އަމަލެއްގެ މައި ތަނބުކަން ފާހަަގަކޮށް، ޞަދަޤާތް ކުރުމުގައި އިޚްލާސްތެރި ވުމަށް ހުކުރު ޚުތުބާގައި ގޮވާލައިފި އެވެ.

'ޞަދަޤާތްކުރުމުގެ މުހިންމުކަން' މި މައުޟޫއަށް އިއްވި ހުކުރު ޚުތުބާގައި ބުނީ އިޚްލާސްތެރިކަން ނެތިކުރެވޭ ޞަދަޤާތަކީ، އަގެއް ނެތް ބާޠިލު ޢަމަލެއް ކަމަށެވެ.

ޤުދުސީ ޙަދީޘާއަކާ ޙަވާލާދީ ޚުތުބާގައި ބުނީ ޤިޔާމަތް ދުވަހު އެންމެ ފުރަތަމަ ނަރަކަޔަށް އެއްލާލެވޭ ތިން ބާވަތެއްގެ މީހުންގެ ތެރޭގައި، ރެޔާއި ދުވާލު އޭނާގެ މުދަލުން ޞަދަޤާތްކޮށް އުޅުނު މީހަކު ވާނެ ކަމަށެވެ.

ޚުތުބާގައި ބުނީ ޞަދަޤާތް ދިނުމަކީ ސިއްރާއި ފާޅުގައި ވެސް ކުރެވިދާނެ ކަމެއް ކަމަށެވެ. ނަމަވެސް މީގެ ތެރެއިން އެންމެ މޮޅު އިތުރު ގޮތަކީ، ސިއްރުން ޞަދަޤާތް ކުރުން ކަމަށް ޚުތުބާގައި ފާހަގަކޮށްފައި ވެއެވެ.

މީގެ އިތުރުން ޚުތުބާގައި ބުނީ އިޚްލާސްތެރިކަމާ އެކު ޞަދަޤާތް ކުރާ މީހާ އަށް އެއީ ފާފަތަކުގެ ކައްފާރާއެއް ކަމަށެވެ. އަދި އޭނާގެ ފާފަތައް ފުއްސަވައި، ތަނަވަސްވެގެންވާ ސުވަރުގެއާ ހަމައަށް އޭނާ ގެންގޮސްދޭނޭ ފާލަމެއް ކަމަށެވެ.

ކަލަގޮވުމުގެ ނުބައި ކަމަށް އަލިއަޅުވާލައި ޚުތުބާގައި ބުނީ ޞަދަޤާތް ދިނުމަށް ފަހު، ކަލަގޮވައި، ޞަދަޤާތް ކުރެވުނު ފަރާތްތަކަށް، އެކަން ތަކުރާރުކޮށް ހަނދާންކޮށްދީ، އެބަޔަކަށް އުނދަގޫކޮށް އުޅުމަކީ، ތިމާ ކުރި ޞަދަޤާތެއްކަން ބާޠިލުވާނެ ކަމަށެވެ. އަދި ތިމާގެ ޢަމަލުގައި އިޚުލާސްތެރިކަމެއް ނެތްކަން އަންގައިދޭ ޢަލާމާތެއް ކަމަށެވެ.