އިޓަލީގެ ސަރުކާރުގެ ހުއްދަ އާއެކު އިޓާލިއަން ލީގު ޖޫން މަހުގެ 20 ވަނަ ދުވަހު ފަށަން ނިންމައިފި އެވެ.

އިޓާލިއަން ލީގު އަލުން ފެށުމާމެދު ސަރުކާރުން ވަކި ގޮތެއް ކަނޑައަޅެޅުމަށް ބުރާސްފަތި ދުވަހު ކްލަބުތަކުން ވަނީ އިޓަލީގެ ކުޅިވަރާ ބެހޭ ވަޒީރު ވިންޗެންޒޯ ސްޕަޑަފޯރާ އާއެކު ބައްދަލުވުމެއް ބާއްވާފައެވެ.

މި ބައްދަލުވުމުގައި ވަނީ އިޓާލިއަން ލީގު ޖޫން މަހުގެ 20 ވަނަ ދުވަހު ފަށަން ނިންމާފައެވެ. އަދި އޭގެ ކުރިން ޖޫން މަހުގެ 13 ވަނަ ދުވަހު އިޓާލިއަން ކަޕްގެ ސެމީ ފައިނަލް މެޗުތައް ކުޅުމަށް ވެސް ވަނީ ތާވަލު ކޮށްފައެވެ.

ބުރާސްފަތި ދުވަހު އޮތް ބައްދަލުވުމަށްފަހު އިޓަލީގެ ކުޅިވަރާ ބެހޭ ވަޒީރު ވިންޗެންޒޯ ސްޕަޑަފޯރާ ވިދާޅުވީ ފުޓްބޯޅަ އަލުން ފަށަން ނިންމީ ހާއްސަ އުސޫލުތަކެއް ކަނޑައެޅުމަށްފަހު ކަމަށެވެ. އަދި ފުޓްބޯޅަ އަލުން ފެށުމާ ގުޅޭ ގޮތުން އިޓަލީގެ ބޮޑު ވަޒީރު ޖިސެއްޕޭ ކޮންޓޭއާ މަޝްވަރާ ކޮށްފައިވާ ކަމަށާއި، ސަރުކާރުން މިކަމަށް ފުރިހަމަ އަށް ތާއީދު ކޮށްފައިވާ ކަމަށްވެސް ބުންޏެވެ.

ޖޫން މަހުގެ 20 ވަނަ ދުވަހު އިޓާލިއަން ލީގު އަލުން ފަށާއިރު، އޮގަސްޓް މަހުގެ 20 ވަނަ ދުވަހުގެ ކުރިން އިޓާލިއަން ލީގު ނިންމަން މީގެ ކުރިން ވަނީ ކަނޑައަޅާފައެވެ.

އީޓާލިއަން ފުޓްބޯލް ފެޑެރޭޝަންގެ ރައީސް ގެބްރިއަލީ ގްރަވީނާ އާއި ލެގާ ސެރިއާގެ ރައީސް ޕައޯލޯ ދަލް ޕީނޯ އަދި ލީގުގެ ހިއްސާދާރުންނާއެކު މީގެ ކުރިން ބޭއްވި ބައްދަލުވުމެއްގައި ވަނީ މި ސީޒަން އޮގަސްޓް މަހުގެ 20 ވަނަ ދުވަހު ނިންމާ، އަންނަ ސީޒަން ސެޕްޓެމްބަރު މަހުގެ އެއްވަނަ ދުވަހު ފަށަން ނިންމާފައެވެ.

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ އިޓާލިއަން ލީގު ޖޫން މަހުގެ 20 ވަނަ ދުވަހު ފަށަން ތާވަލުކުރިއިރު، އިޓާލިއަން ލީގުގެ ކްލަބުތަކުން ކުޅުންތެރިން ވަނީ ކޮވިޑް-19ށް ޓެސްޓު ކޮށްފައެވެ. އެގޮތުން މިހާތަނަށް ޕާމާގެ ދެ ކުޅުންތެރިއަކާއި، ސަމްޕްޑޯރިއާގެ ހަތަރު ކުޅުންތެރިއަކާއި، ޓޮރީނޯގެ ކުޅުންތެރިއެއްގެ އިތުރުން ފިއޮރެންޓީނާގެ ތިން ކުޅުންތެރިއަކު ވަނީ ކޮވިޑް-19ށް ޕޮޒިޓިވް ވެފައެވެ.

އިޓާލިއަން ލީގުގައި ބާކީ އޮތް ބައިގައި، އަށް ޓީމަކުން 13 މެޗު ކުޅެން ޖެހޭއިރު، ބާކީ ޓީމުތަކަށް އޮތީ 12 މެޗެވެ. އިޓާލިއަން ލީގު މެދުކަނޑާލިއިރު، އެންމެ ފަހުގެ ޗެމްޕިއަން ޔުވެންޓަސް އޮތީ ތާވަލުގެ އެއްވަނައިގައި 26 މެޗުން 63 ޕޮއިންޓާއެކުގައެވެ. ދެވަނައިގައި އޮތް ލާޒިއޯ އަށް 26 މެޗުން ލިބިފައިވަނީ 62 ޕޮއިންޓެވެ.