މެޑިކަލް ފެސިލިޓީ ފުލް ކެޕޭސިޓީގައި ބޭނުންކުރާއިރު 63 ޑޮކްޓަރުންނާއި 130 ނަރުހުން ހަރަކާތްތެރިވާނެ
ފުރަތަމަ ބޭނުން ކުރާނީ 68 ބެޑް
ހުޅުމާލޭގައި ހެދި މެޑިކަލް ފެސިލިޓީ: މިތަނުގައި އެއްފަހަރާ 289 މީހަކަށް ފަރުވާ ދެވޭނެ
ހުޅުމާލެ މެޑިކަލް ފެސިލިޓީ ފުލް ކެޕޭސިޓީގައި ބޭނުންކުރާ އިރު 63 ޑޮކްޓަރުންނާއި 130 ނަރުހުން ހަރަކާތްތެރިވާނެ ކަމަށް އައިޖީއެމްއެޗްގެ މެޑިކަލް ޑިރެކްޓަރ ޑރ. އަލީ ނަޒީމް ވިދާޅުވެއްޖެއެވެ.
ބުދަ ދުވަހުގެ ރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ވާހަކަދައްކަވަމުން އައިޖީއެމްއެޗްގެ މެޑިކަލް ޑިރެކްޓަރ ޑރ. އަލީ ނަޒީމް ވިދާޅުވީ ހުޅުމާލެ ފެސިލިޓީގެ ބީ ބްލޮކްގައި އިން 68 ބެޑަށް މިވަގުތު ޓާގެޓްކުރާ އިރުގައި އެ ކެޕޭސިޓީގައި ރައުންޑް ހަދާ 3 ސްޕެޝަލިސްޓުން، އެގޮތުން ފިޒިޝަނުން ނުވަތަ ޕުލްމޮނަލަޖިސްޓުން ހިމެނޭނެ ކަމަށާއި، ޝިފްޓް ޑިއުޓީ އުސޫލުން 10 މެޑިކަލް އޮފިސަރުން އަދި 30 ނަރުހުން މަސައްކަތް ފަރުވާދިނުމުގައި މަސައްކަތް ކުރައްވާނެ ކަމަށެވެ.
މީގެ އިތުރުން ހުޅުމާލެ މެޑިކަލް ފެސިލިޓީ ހިންގުމުގައި ބައިވެރިވަނީ އައިޖީއެމްއެޗްއަކުން އެކަނި ނޫން ކަމަށާއި، އެޑްމިނިސްޓްރޭޓިވް އަދި މެނޭޖްމަންޓުގެ އިތުރުން ކްލިނިކަލް މެނޭޖްމަންޓުގެ ކަންކަމުގައި ހުޅުމާލެ ހޮސްޕިޓަލް ވެސް ބައިވެރިވާނެ ކަމަށް ޑރ. ނަޒީމް ވިދާޅުވި އެވެ.
ޑރ. ނަޒީމް ވިދާޅުވީ ކޮމިއުނިޓީ ބޭސްޑް ފެސިލިޓީ އަދި ހޮސްޕިޓަލް ފެސިލިޓީ (ޑީއެޗް 11 ގެ 10 ބެޑް އައިސީޔުއާއެކު މިހާރު މިހާތަނަށް އެންގޭޖްވެފައި އެބަތިބި ފަރުކޮޅުފުށި އެޗްއައިއެޗް އެނބޫދޫ ކުޑަބަނޑޮސް މި ފެސިލިޓީތަކުގައި) ތިބި ޕޮޒިޓިވް ޕޭޝަންޓުންނާއެކު 14 ވަރަކަށް ފެސިލިޓީ އައިޖީއެމްއެޗުން މެނޭޖްކުރަމުންދާ ކަމަށެވެ. އަދި މިވަގުތުވެސް އައިޖިއެމްއެޗްގެ 50 މެޑިކަލް އޮފިސަރުންނާއި 120 ނަރުހުންނާއި 6 ސްޕެޝަލިސްޓުން މި ފެސިލިޓީތަކުގައި މަސައްކަތް ކުރައްވަމުން ގެންދަވާ ކަމަށް ޑރ. އަލީ ނަޒީމް ވިދާޅުވިއެވެ.
