ޓެކްސްޕޭޔަރ ސަރވިސް ސެންޓަރު ހުޅުވާލައި ޚިދުމަތްދޭނެ ގޮތްތަކާ މެދު ދަނީ މަޝްވަރާ ކުރަމުން: މީރާ
27 މެއި 2020 | ބުދަ 22:37ގިނަ ބަޔަކު ޚިދުމަތް ހޯދާ ސެންޓަރެއް
މޯލްޑިވްސް އިންލެންޑް ރެވެނިއު އޮތޯރިޓީ - ނިއު ނޯމަލްގައި ޚިދުމަތް ދިނުމަށް ދަނީ ތައްޔާރުވަމުން
ނިއު ނޯމަލްގައި ޓެކްސްޕޭޔަރ ސަރވިސް ސެންޓަރު އާންމުންނަށް ހުޅުވާލައި ޚިދުމަތްދޭނެ ގޮތްތަކާ މެދު މަޝްވަރާތައް ކުރަމުންދާ ކަމަށް ކޮމިޝަނަރ ޖެނެރަލް އޮފް ޓެކްސޭޝަން ފަތުހުއްﷲ ޖަމީލު ވިދާޅުވެއްޖެ އެވެ.
ނެޝަނަލް އެމަރޖެންސީ އޮޕަރޭޝަން ސެންޓަރުގައި ބުދަ ދުވަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފަތުހުއްﷲ ވިދާޅުވީ ޓެކްސްޕޭޔަރ ސަރވިސް ސެންޓަރަކީ ވަރަށް ގިނަ ފަރާތްތަކުން ފައިސާ ދެއްކުމަށްށާއި، އެހެން ކަންކަމަށް ޒިޔާރަތް ކުރާތަނެއް ކަމަށެވެ.
ފަތުހުއްﷲ ވިދާޅުވީ ވަރަށް ގިނަ ފަރާތްތަކުން އެއް ފަހަރާ މީރާގެ ކައުންޓަރުތަކަށް އަންނަކަމުގައިވާނަމަ ނިއު ނޯމަލްގައި ބަހައްޓަންޖެހޭ އިޖްތިމާއީ ގައިދުރުކަން ބެހެއްޓޭ ގޮތަށް އިންތިޒާމްތައް ހަމަޖައްސަމުންދާ ކަމަށެވެ. އަދި ޚިދުމަތް ހޯދުމަށް އަންނަ މީހުން ވެސް އަމިއްލަ ރައްކާތެރިކަން ކަށަވަރު ކުރުމަށް މާސްކް އެޅުން ފަދަ ކަންކަން ކުރުމަށް އޭނާ ވަނީ އިލްތިމާސްކޮށްފައެވެ.
އަތޮޅުތެރޭގެ ރަށްރަށުގައި ހުރި މީރާގެ އޮފީސްތައް ހުޅުވާ ޚިދުމަތް ދޭން ފަށާފައިވާކަން ފާހަގަކުރައްވައި ފަތުހުﷲ ވިދާޅުވީ މި އޮފީސްތަކުގައިވެސް ނިއު ނޯމަލްގައި އަމަލުކުރާ އުސޫލުން އިންތިޒާމްތައް ހަމަޖައްސަމުންދާ ކަމަށެވެ.
ފަތުހުﷲ ވިދާޅުވީ މީރާއިން މަސައްކަތް ކުރަނީ މުވައްޒަފުންގެ ސަލާމަތާ ރައްކާތެރިކަމަށް ޚާއްސަ ސަމާލުކަމެއް ދިނުމަށްފަހު ރައްޔިތުންނަށް ރަނގަޅު ޚިދުމަތެއް ފޯރުކޮށްދިނުމަށެވެ. އެހެންކަމުން ކުރަމުންދާ މަސައްކަތްތަކުގައި ރައްޔިތުން ވެސް އެއްބާރުލުން ދިނުމަށް އިލްތިމާސްކުރެއްވިއެވެ.
