ކޮވިޑް-19 ގެ ސަބަބުން ލިބޭ ގެއްލުންތައް ބޮޑުވާނެ ކަމަށާއި އެކަންކަމުން އަރައިގަތުމަށް ރާއްޖެ ފަދަ ޖަޒީރާ ޤައުމުތަކަށް ކޮމަންވެލްތުގެ އެހީތެރިކަން ބޭނުންވާ ކަމަށް ޓުއަރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
ރާއްޖޭގެ އިޤްތިޞާދާއި ފަތުރުވެރިކަމަށް މި ޕެންޑެމިކްގެ ސަބަބުން ކޮށްފައިވާ އަސަރުތަކާއި ރާއްޖޭގެ އިޤްތިޞާދު އަލުން ދިރުވުމަށް ކުރެވެމުންދާ މަސައްކަތްތަކާއި ގުޅޭގޮތުން ސެމިނަރގައި ވާހަކަ ދައްކަދައްކަވަމުން ޓުއަރިޒަމް މިނިސްޓަރ އަލީ ވަހީދު ވިދާޅުވީ ފަތުރުވެރިކަން އަލުން ފަށައިގަތުމުގެ މަސައްކަތުގައި ބޮޑެތި ގޮންޖެހުންތަކެއް ކުރިމަތިވަމުންދާ ކަމަށެވެ.
މި ސެމިނަރގައި ރިޔާސަތު ބެލެހެއްޓެވީ ކޮމަންވެލްތުގެ ސެކްރެޓަރީ ޖެނެރަލްއެވެ. އަދި މި ސެމިނަރގައި މާލްޓާގެ ކުރީގެ ބޮޑުވަޒީރު ބައިވެރިވެވަޑައިގެންނެވިއެވެ.
ކޮމޮންވެލްތު ފަދަ ބައިނަލްއަޤްވާމީ ޖަމިއްޔާތަކުގެ އެހީތެރިކަމަށް އެދިވަޑައިގެން މިނިސްޓަރ ވިދާޅުވީ ދޭދޭ ގައުމުތަކުގެ ދޭތެރޭގައި ރައްކާތެރިކަމާއި އެކީ ދަތުރު ފަތުރު ކުރެވޭނެ އުސޫލުތަކެއް އެކުލަވާލަން ޖެހޭ ކަމަށެވެ. މިއީ ތިމާވެށި ރައްކާތެރިކޮށް މޫސުމީ ބަދަލުތައް ހުއްޓުވުމަށް ބޭނުންވާ ސިޔާސަތުތައް ކަނޑައަޅައި ތަންފީޛުކުރުމަށް ރަނގަޅު ފުރުޞަތެއްކަން ފާހަގަކުރަައްވާ މިނިސްޓަރ ވިދާޅުވީ މިއީ ފަތުރުވެރިކަން އަލުން ފެށުމުގެ ތެރޭގައި ދިވެހި މުވައްޒަފުންނަށް އިތުރު ވަޒީފާގެ ފުރުޞަތު ހޯދައި ދިނުމަށާއި ޖިންސުގެ ތަފާތުކުރުން ނައްތާލުމަށް ލިބިގެންދާ ފުރުޞަތެއް ކަމަށެވެ.
