ބެލަޜޫސް އާއި އިނގިރޭސި ވިލާތުގައި ތިބި ދިވެހިން ރާއްޖެ ގެންނަނީ

ބެލަރޫސްގައި ތިބި ދިވެހި ދަރިވަރުންގެ ތެރެއިން ރާއްޖެ އަންނަން ބޭނުންވާ 50 ދަރިވަރުންނާއި، އިނގިރޭސިވިލާތުގައި ތިބި 23 ދިވެއްސަކު، އަންނަ އާދިއްތަ ދުވަހު ރާއްޖެ އަންނާނެކަމަށް މިނިސްޓްރީ އޮފް ފޮރިން އެފެއަރޒުން ބުނެފި އެވެ.

މި ދިވެހިން ދަތުރުކުރުމަށް ހަަމަޖެހިފައި ވަނީ ލަންޑަނުން، ސްރީލަންކަން އެއަރލައިންސްގެ ބޯޓެއްގަ އެވެ.

މި ފްލައިޓުގައި ދަތުރުކުރަން ހަމަޖެހިފައިވާ ބެލަރޫސްގައި ތިބި ދަރިވަރުން ހޮނިހިރު ދުވަހު މިންސްކް އިން ލަންޑަނަށް ދަތުރުކުރާނެ ކަމަށް ފޮރިން މިނިސްޓްރީން ބުނެއެވެ. މި ފްލައިޓްގެ އިންތިޒާމުތައް ހަމަޖެއްސުމަށް ފޮރިން މިނިސްޓްރީއާ، ޖަރުމަންވިލާތުގައި ހުންނަ ދިވެހި އެމްބަސީއާ، އިނގިރޭސިވިލާތުގައި ހުންނަ ދިވެހި ހައިކޮމިޝަނުން ދަނީ ސްރީލަންކަން އެއަރލައިންސްއާ އިނގިރޭސިވިލާތުގެ ކަމާ ބެހޭ ފަރާތްތަކާ ގުޅިގެން މަސައްކަތް ކުރަމުންދާ ކަމަށް ފޮރިން މިނިސްޓްރީން މަޢުލޫމާތު ދެއެވެ.

ފޮރިން މިނިސްޓްރީން ބުނީ މި ފްލައިޓްގައި އަންނަ ދިވެހިން ދަތުރުގެ ޓިކެޓް ނަގާނީ އަމިއްލަ ޚަރަދުގައި ކަމަށާއި ރާއްޖެ އައުމަށް ފަހު 14 ދުވަހުގެ މުއްދަތަކަށް ކަރަންޓީނު ކުރާނެ ކަމަށެވެ.