މަޝްވަރާތައް ކޮޅެއްގައި ނުޖެހި އިގާލޯ އެނބުރި ޗައިނާ އަށް

ޝަންހާއި ގްރީންލެންޑް ޝެންހުއާ އާއި މެންޗެސްޓާ ޔުނައިޓެޑުގެ މަޝްވަރާތައް ކޮޅެއްގައި ނުޖެހި ނައިޖީރިއާގެ ފޯވާޑް އޮޑިއޯން އިގާލޯ އެނބުރި ޗައިނާއަށް ދާން ޖެހިއްޖެއެވެ.

ޗައިނާގެ ޝަންހާއި އިން ޔުނައިޓެޑަށް އިގާލޯ ބަދަލުވީ ޖެނުއަރީ މަހު ލޯނު އެއްބަސްވުމެއް ދަށުންނެވެ. ޔުނައިޓެޑާއެކު އިގާލޯ ހަދާފައިވާ އެއްބަސްވުމުގެ މުއްދަތު މިމަހުގެ 31 ގައި ހަމަވާއިރު، އިނގިރޭސި ޕްރިމިއާ ލީގު ޖޫން މަހުގެ ތެރޭގައި ފެށުމަށް އަންނަނީ ތައްޔާރުވަމުންނެވެ. އެހެންކަމުން މި ހަފުތާ ތެރޭ، އިގާލޯ އެނބުރި ޗައިނާއަށް ދިޔުމަށް މިހާރު އަންނަނީ ތައްޔާރުވަމުންނެވެ.

މީގެ ކުރިން އިގާލޯ ވަނީ މި ސީޒަން ނިމެންދެން ޔުނައިޓެޑްގައި މަޑުކުރަން ބޭނުންވާ ކަމަށް ބުނެފައެވެ.

ޔުނައިޓެޑުން އިގާލޯގެ އެއްބަސްވުން ދާއިމީ ކުރުމަށް މަސައްކަތް ކުރަން މަސައްކަތް ކުރިއިރު ޝަންހާއި އިން އެކަމަށް އެއްބަސްވާނީ އިގާލޯ ގަތުމަށް 20 މިލިއަން ޕައުންޑު ދެއްކުމުން ކަމަށް މީގެ ކުރިން ރިޕޯޓުތައް ބުންޏެވެ. އެކަމަކު ޗައިނީސް ސުޕަ ލީގު އަލުން ފަށަން ތައްޔާތުވަމުންދާތީ ޝަންހާއި އިން ވަނީ އިގާލޯ އެނބުރި ގެންދަން ވެސް މަސައްކަތް ކޮށްފައެވެ.

ދެ ކްލަބުގެ މެދުގައި ދެކެނު ވާހަކަތައް ކޮޅެގައި ނުޖެހި، އިގާލޯ އެނބުރި ޗައިނާއަށް ދާން ޖެހިފައިވާއިރު، އެންމެ ފަހު ވަގުތުވެސް ޔުނައިޓެޑުން އަންނަނީ އިގާލޯގެ ކަންތައް ކޮޅެއްގައި ޖެހޭތޯ މަޝްވަރާ ކުރަމުން ކަމަށް ރިޕޯޓުތައް ބުނެއެވެ.

ޔުނައިޓެޑަށް މިހާތަނަށް ކުޅުނު 8 މެޗުގައި 4 ލަނޑު ކާމިޔާބުކޮށްފައިވާ އިގާލޯ، ޝަންހާއި އާއެކު ހަދާފައިވާ އެއްބަސްވުން އާކުރަން އެ ކްލަބުންވެސް މިހާރު އަންނަނީ މަސައްކަތް ކުރަމުންނެވެ. ޝަންހާއި އާއެކު އިގާލޯ ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، އެ ކްލަބުން އަންނަނީ 2024 ގެ ނިޔަލަށް އިގާލޯގެ އެއްބަސްވުން އާކުރަން މަސައްކަތް ކުރަމުންނެވެ.