ގާނޫނު އަސާސީ އަށް އިސްލާހު ގެނައުމުގެ ބިލުގެ ބަހުސް، ބުދަ ދުވަހުގެ ޖަލްސާގައި
މި ބިލުގެ މަސައްކަތް އެޖެންޑާކުރެވިފައިވަނީ ނުނިމި ހުރި މަސައްކަތްތަކުގެ ދަށުން
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގެ ތެރެއިން
ކައުންސިލްތަކުގެ ދައުރު އިތުރުކުރަން ގާނޫނުއަސާސީއަށް ހުށަހެޅިފައިވާ އިސްލާހުގެ ބިލުގެ ބަހުސް ކުރިއަށް ގެންދިއުމަށް ބުދަ ދުވަހުގެ ޖަލްސާއަށް އެޖެންޑާކޮށްފިއެވެ.
މި ބިލުގެ މަސައްކަތް އެޖެންޑާކުރެވިފައިވަނީ ނުނިމި ހުރި މަސައްކަތްތަކުގެ ދަށުންނެވެ.
ބުދަ ދުވަހު މި ބިލަށް ބަހުސް ކުރުމަށް އެޖެންޑާކުރިއިރު، ކައުންސިލްތަކުގެ ދައުރު އިތުރުކުރަން ގާނޫނުއަސާސީއަށް ހުށަހެޅިފައިވާ އިސްލާހުގެ ބިލު ސަރުކާރުން ހުށަހެޅިގޮތަށް ފާސްކުރަން, ސަރުކާރު ހިންގާ މައި ޕާޓީ، އެމްޑީޕީގެ ޕަރލިމެންޓްރީ ގްރޫޕުން ވަނީ އަންގާރަ ދުވަހުގެ ރޭ ނިންމާފައެވެ.
ސަރުކާރުން މި ބިލު ހުށަހެޅީ ލޯކަލް ކައުންސިލްތަކުގެ އިންތިޚާބު ބޭއްވުމަށް ރައްކާތެރި މާޙައުލެއް ޤާއިމު ކުރެވެންދެން އެ އިންތިޚާބު ފަސްކުރުމަށް މަގުފަހިކޮށް، އެ އިންތިޚާބު ބާއްވައި، އާ މެންބަރުން އިންތިޚާބުވެ، މަޤާމާ ޙަވާލުވަންދެން މިހާރު އިންތިޚާބުވެފައި ތިބި އަތޮޅު ކައުންސިލުތަކާއި، ރަށު ކައުންސިލުތަކާއި، ސިޓީ ކައުންސިލުތަކުގެ މެންބަރުން، އެމީހުންގެ މަޤާމުގައި ދެމިތިބޭނެ ކަމަށް ކަނޑައެޅުމަށް ޤާނޫނުއަސާސީ އަށް ގެންނަން ޖެހޭ އިޞްލާޙުތައް ގެނައުމުގެ ބޭނުމުގަ އެވެ.
މީގެއިތުރުން، ކޮމެޓީން ހުށަހަޅާ ކަންކަމުގެ ދަށުން ތިން ރިޕޯޓެއް ހުށަހެޅުމަށް ވަނީ އެޖެންޑާކުރެވިފައެވެ. "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" ލާމަރުކަޒީ ކޮމިޓީން ދިރާސާކޮށް ނިންމިގޮތުގެ ރިޕޯޓު ބުދަ ދުވަހު ދުވަހުގެ ޖަލްސާއަށް ހުށަހެޅުމަށް އެޖެންޑާކޮށްފައިވާއިރު ކޮވިޑް-19 އާ ގުޅިގެން އަޅާ ފިޔަވަޅުތަކުގެ ސަބަބުން ސަރުކާރުން ހިންގުމަށް ނިންމާފައިވާ ޕްރޮގްރާމް ތަންފީޒުކުރުމަށް ރައްޔިތުންގެ މަޖިލީހުން ދެކޭގޮތް ކަނޑައެޅުމާ ގުޅޭގޮތުން ހުށަހަޅުއްވާފައިވާ މައްސަލައިގައި މިނިވަން މުއައްސަސާތަކުގެ ކޮމިޓީއާ ޙަވާލުކޮށްފައިވާ މަސައްކަތްތައް ދިރާސާކޮށް ނިންމިގޮތުގެ ރިޕޯޓުވެސް ވަނީ އެޖެންޑާކޮށްފައެވެ.
