މައްކާ ފިޔަވައި އެހެން ސަރަހައްދުތަކުގައި ޖަމާއަތުގައި ނަމާދުކުރެވޭނެ އިންތިޒާމް ހަމަޖެއްސުމަށް ވަކި ހާއްސަ ގަވާއިދުތަކެއް ސައުދީ އަރަބިއްޔާއިން އެކުލަވާލައިފިއެވެ.

ސައޫދީ ގެޒެޓް ނޫހުން ރިޕޯޓުކޮށްފައިވާ ގޮތުން، އެކި ފިޔަވައްސައް ބަހާލައިގެން ކޮވިޑް-19އާ ގުޅިގެން އަޅާފައިވާ ފިޔަވަޅުތަކަށް ލުއި ދިނުމަށް ސަރުކާރުން ނިންމާފައިވާއިރު، މައްކާ ފިޔަވައި އެހެން ސަރަހައްދުތަކުގައި ޖަމާއަތުގައި ނަމާދު ކުރުމާއި ހުކުރު ނަމާދުކުރުމަށް އެގައުމުގެ އިސްލާމިކް މިނިސްޓްރީން ވަނީ ގަވާއިދުތަކެއް ހަދާފައެވެ.

މިކަމާއި ގުޅިގެން، އިސްލާމިކް މިނިސްޓްރީން ވަނީ ހުރިހާ މިސްކިތްތަކެއްގެ މަސައްކަތް ކުރާ މުވައްޒަފުން އަމަލުކުރާނެ ގޮތުގެ ސާރކިއުލާއެއް ފޮނުވާފައެވެ. ސާރކިއުލާގައި ވާގޮތުން، މިސްކިތްތައް ހުޅުވުމަށް ހުއްދަ ދީފައިވަނީ ބަންގި ގޮވުމުގެ 10 މިނެޓު ކުރިންނެވެ. އަދި ނަމާދު ނިމުމަށްފަހު 10 މިނިޓެ ފަހުން މިސްކިތްތައް އަލުން ބަަންދުކުރަންޖެހޭއިރު، މިސްކިތަށް ވަނުމަށްފަހު ނަމާދު ނިމެންދެން ހުރިހާ ދޮރުތައް ހުންނަން ޖެހޭނީ ހުޅުވާފައިކަމަށް އަންގާފައިވެއެވެ. އަދި މި ވަގުތައް ހުރިހާ ހަތިމްތަކާއި ފޮތްތައް މިސްކިތުގައި ނުބެހެއްޓުމާއި ޖަމާއަތުގައި ނަމާދަށް ސަފު ހަދާއިރު ކޮންމެ މީހެއްގެ 2 މީޓަރުގެ ދުރުމިނެއް ބެހެއްޓުމަށް ވަނީ އަންގާފައެވެ.

މީގެއިތުރުން، މިސްކިތްތައް ހުޅުވަން ނިންމާފައިވާއިރު ފެން ބެހުމާއި މިސްކިތުގައި ވުޟޫކުރާތަަންތަން ބަންދުކުރުމަށް އިސްލާމިކް މިނިސްޓްރީން ވަނީ އަންގާފައެވެ.

ހުކުރު ދުވަހު އަމަލުކުރުމަށް ވަކި ހާއްސަ އުސޫލެއް ކަނޑައަޅާފައިވާއިރު، މިސްކިތްތައް ހުޅުވުމަށް ހަމަޖެހިފައިވަނީ ހުކުރު ވަގުތުގެ 20 މިނެޓު ކުރިންނެވެ. އަދި ހުކުރަށް ފަހު 20 މިނެޓު ފަަހުން މިސްކިތްތައް ބަންދުކުރަން ޖެހެއެވެ. ހުކުރު ނަމާދުގެ ދިގުމިން 15 މިނެޓަށް ވުރެ ދިގު ނުކުރުމަށްވެސް ސައުދީ އިސްލާމިކް މިނިސްޓްރީން ވަނީ އަންގާފައެވެ.

މި ފިޔަވަޅުތަކުގެ އިތުރުން، އިސްލާމިކް މިނިސްޓްރީން ވަނީ ދީނީ ކޯސްތައް ހިންގުމާއި، ދަރުސް ދިނުން އަދި މިސްކިތުގައި ގުރުއާން ކިޔެވަން ތިބުން ވަގުތީ ގޮތުން މެދުކަނޑާލަން އަންގާފައެވެ. އަދި ހާލަތު ބަދަލުވުމުން، މި ކަންތައްތަކަށް ފުރުސަތު ދެވިގެން ދާނެކަން ވަނީ ފާހަގަ ކޮށްފައެވެ. މީގެ އިތުރުން މިނިސްޓްރީން ވަނީ އިމާމުންނަށް، ރައްކާތެރިވުމުގެ ގޮތުން ފިޔަވަޅުތަކެއް އެޅުމަށް އިލްތިމާސްކޮށްފައެވެ.

އެގޮތުން، ނަމާދަށް އަންނައިރު މާސްކް އަޅައިގެން އައުމަށާއި، ގެއިން އަންނައިރު މުސައްލައެއް ގެނުމަށާއި 15 އަހަރުން ދަށުގެ ކުދިން މިސްކިތްތަކަށް ނުގެނައުމަށް ވަނީ އަންގާފައެވެ. އަދި ގެއިން ވުޟޫކޮށްގެން އައުމުގެ އިތުރުން މިސްކިތަށް އައިސް އެއްވެ ނޫޅުމަށް ވަނީ އިލްތިމާސް ކޮށްފައެވެ.

ދެ ފިޔަވައްސަކަށް ބަހާލައިގެން ލުއިތަކެއް ދިނުމަށް ނިންމާފައިވާއިރު، މެއި މަހުގެ 30ން ޖޫން މަހުގެ 20 ވަނަ ދުވަހާ ހަމައަށް ދެވަނަ ފިޔަވަހީގައި ދޫކުރުމަށް ނިންމާފައިވާ ހުރިހާ ހުއްދަތަކެއް ދޫކުރާނެ އެވެ. އެގޮތުން، މައްކާ ފިޔަވައި އެހެން ހުރިހާ ހިސާބަކަށް ހެނދުނު 6:00ން ރޭގަނޑު 8:00ށް ބޭރަށް ނުކުމެ އުޅުމާއި، ދަތުރު ކުރުމުގެ ހުއްދަ ދޭނެއެވެ. އަދި މިސްކިތްތަކުގައި ނަމާދު ކުރުމާއި، ހުކުރު ނަމާދު ކުރުމުގެ ހުއްދަ ވެސް ދޭނެއެވެ.