ޕޮޒިޓިވްވާ ޕޭޝަންޓަކު އައިސޮލޭޝަން ގެންދާއިރު އެހީތެރިވުމަށް ދިއުމަށް އައިލާއިން އެދޭނަމަ އެކަމަށް ހުއްދަދެން: ޑރ. އަފްޒަލް
26 މެއި 2020 | އަންގާރަ 23:05ހުއްދަ ދެނީ ޚާއްސަ އުސޫލެއްގެ ތެރެއިން
ބަލި މީހުން ގެންދިއުމުގެ މަސައްކަތް ކުރަނީ
ކޮވިޑް-19ށް ޕޮޒިޓިވްވާ ޕޭޝަންޓަކު އައިސޮލޭޝަންއަށް ގެންދާއިރު، ގާތުގައި އެހީތެރިވުމަށް ހުންނަ މީހާއަކީ އެކަމަށް އެއާއިލާއަކުން އެދުމުން ދެވޭ ހުއްދައެއްގެ ދަށުން ހުންނަ މީހެއް ކަމަށް ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް ވިދާޅުވެއްޖެއެވެ.
ކޮވިޑް-19ށް ޕޮޒިޓިވްވާ ހައިރިސްކް ކެޓަގަރީ ނުވަތަ އެހީތެރިކަން ބޭނުންވާ ފަދަ ފަރާތްތައް އައިސޮލޭޝަން ފެސިލިޓީތަކަށް ގެންދާއިރު، އާއިލާއިން އެހީތެރިވުމަށް މީހަކު ދިއުމަށް އެދޭނަމަ އެކަމުގެ ހުއްދަ ދަނީ ދެމުންނެވެ.
މިގޮތަށް ދެވޭ ހުއްދައާ ބެހޭ ގޮތުން އަންގާރަ ދުވަހުގެ ރޭ ނޭޝަނަލް އިމަރެޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ މި ހުއްދަ ދެނީ ޚާއްސަ އުސޫލެއްގެ ތެރެއިން ކަމަށެވެ. އެގޮތުން މަންމަ، ބައްޕަ، ނުވަތަ ދަރިފުޅު އެހީތެރިކަން ބޭނުންވާ ހަލާތުގައި އަދި އެމީހުން ބައްޔަށް ޕޮޒިޓިވްވެފައިވާއިރު ވެސް ގާތުން މަސައްކަތް ކޮށްފައިވާ މީހަކަށްވާތީ ހުއްދަދޭ ކަމަށް ޑރ. އަފްޒަލް ވިދާޅުވިއެވެ. އަދި ވިދާޅުވީ އެއީ އެއާއިލާތަކުން އެކަމަށް އެދުމުންދެވޭ ހުއްދައެއް ކަމަށެވެ.
ޑރ. އަފްޒަލް ވިދާޅުވީ އެހީތެރިވުމަށްދާ މީހުން ކޮވިޑް-19ށް ޓެސްޓް ކުރެވި ނަތީޖާ ނެގެޓިވްވުމާ ގުޅިގެން ސެޕްރޭޓް ކުރެވޭނެ ކަމަށެވެ. އަދި އުސޫލުގެ ތެރެއިން އެމީހުންނަށް ދޭންޖެހޭ ފަރުވާދޭނެކަން ޑރ. އަފްޒަލް ފާހަގަކުރެއްވިއެވެ.
