ކޮވިޑް-19 އާ ގުޅިގެން އަޅާފައިވާ ލޮކްޑައުންގެ ފިޔަވަޅުތަކަށް ލުއިތައް ދިނުމުގެ ވާހަކަތައް ދައްކަމުން ދާއިރު ނިއު ނޯމަލްގައި ރައްޔިތުންގެ މަޖިލީހުގެ ޖަލްސާއެއް ކުރިޔަށްދާނެ ގޮތް މިވަނީ ފެނިގެންގޮސްފަ އެވެ. ޤާނޫނު އަސާސީއަށް އިސްލާހު ގެނައުމުގެ ބިލު އެޖެންޑާ ކުރުމާއެކު ހެލްތު ޕްރޮޓެކްޝަން އެޖެންސީ(އެޗްޕީއޭ) އިން ވަކި ޚާއްސަ ހުއްދަ އެއް ނަގައިގެން އެޗްޕީއޭއިން ދީފައިވާ އިރުޝާދާއެކު އަންގާރަ ދުވަހުގެ ޖަލްސާ ވަނީ ފަށާފަ އެވެ. މިދައުރުގެ 40 ވަނަ ޖަލްސާ ތަފާތުވާ އެކި ސަބަބުތައް ހުރިއިރު ޖަލްސާ ކުރާ މާލަމުގައި މެންބަރުން އެތުރިގެން ތިއްބެވި ގޮތާއި މާސްކު އަޅައިގެން ހުރިހާ މެންބަރުންނާއި އިދާރާގެ މުވައްޒަފުން ޗެމްބަރުގައި ހަރަކާތްތެރިވެ ވަޑައިގަންނަވާ އިރު އެއީ ފަސޭހަ ކަމެއް ނޫންކަން ދޭހަވެ އެވެ.

ގައިދުރުކަން ބެހެއްޓުމަށް ކޮންމެ މެންބަރެއްގެ ދެމެދުގައި ވަކި ދުރުމިނެއް ބަހައްޓައިގެން ޖަލްސާ ފެށިއިރު އެންމެ ފުރަތަމަ ކަމެއްގެ ގޮތުގައި ޖަލްސާއިން ފާހަގަވެގެންދިޔަ ކަމަކީ މެންބަރުން އިށީންދެގެން ތިއްބަވަންޖެހޭ ގޮތުގެ ތަރުތީބު ނުވަތަ ސީޓިންގ އެރޭންޖްމަންޓެވެ. އިތުރަށް ތަޅުމުގައި ގޮނޑި ޖަހާފައި ވާއިރު، އިތުރަށް ޖަހާފައިވާ ގޮނޑިތަކުގައި ތިއްބެވި މެންބަރުން މޭޒުކޮޅު ކައިރިއަށް ދެވޭނީ 30 މިނިޓް ފަހުން ކަމަށް މަޖިލީހުގެ ރައީސް ވިދާޅުވި އެވެ. މަޖިލީހުގެ ތަޅުމުގައި 30 މިނެޓުން މެންބަރުން ބަދަލުވާ ގޮތަށް ހަމަޖެހިފައި ވާއިރު އެކަމުގައި ކަންކުރަންވީ ގޮތް މެންބަރުންނަށް ވަނީ ކޮންމެސް ވަރަކަށް އައު ކަމަކަށްވެފަ އެވެ. އެހެންކަމުން އެކަމުގެ އިރުޝާދުތައް އަމީން އާންމު މެންބަރުންނަށް ދެއްވަމުން ގެންދެވި އެވެ.

ޖަލްސާއަށް އެޖެންޑާ ކޮށްފައިވާ ޤަނޫނު އަސާސީއަށް އިސްލާހު ގެނައުމުގެ ބިލު، ބިލެތްދޫ ދާއިރާގެ މެންބަރ އަހުމަދު ހަލީމު ހުށަހެޅުއްވުމާއެކު ދެން ހުޅުވާލެވިގެން ދިޔައީ އާދައިގެ މަތިން އެބިލަށް ބަހުޘް ކުރުމަށެވެ. އެއާއެކު މަޖިލީހުގެ ރިޔާސަތުގައި އިންނެވި، މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ މޭޒުކޮޅުތަކުގައި އިށީނދެ ވަޑައިގެން ތިއްބެވީ އޮނަހިރި އަދަދަށް ވާ މެންބަރުން ކަމަށެވެ. އަދި އޮނަހިރި އަދަދަކަށް ނުވާ މެމްބަރެއް ކަމުގައިވާނަމަ އެމެމްބަރަކު އިށީންދެ ވަޑައިގަނަންވަން ޖެހިވަޑައި ގަންނަވަނީ ތަޅުމުގައި ޖަހާފައިވާ ގޮނޑިތަކުގަ އެވެ.

ބިލަށް ބަހުސް ކުރެއްވުމުގެ ފުުރުސަތު އެންމެ ފުރަތަމަ ލިބިވަޑައި ގެންނެވީވެސް މޭޒުކޮޅު ކައިރީގައި އިށީންދެ ވަޑައިގެން ތިއްބެވި މެމްބަރުންނަށެވެ. އެއާއެކު ބަހުސް ކުރައްވަން ފެށިއިރު ދެންވެސް ފާހަގަ ވެގެންދިޔައީ ނިއުނޯމަލްގައި އަމަލުކުރަންޖެހޭ ކަމެއްގެ ސަބަބުން ދިމާވާ ދައްޗެކެވެ. މާސްކު އަޅައިގެން ވާހަކަ ދައްކަވަން އުނދަގޫ ކަމުގެ ޝަކުވާ މެމްބަރުން ކުރައްވަން ފެއްޓިވެ އެވެ. އެގޮތުން އެންމެ ފުރަތަމަ ވާހަކަ ދައްކަވަން ފެއްޓެވި ހުޅުމާލެ ދާއިރާގެ މެމްބަރ އަލީ ނިޔާޒު މާސްކް އަޅުއްވައިގެން ވާހަކަދައްކަން ވަރަށް އުނދަގޫ ކަމަށް ވިދާޅުވި އެވެ. އަދި މެމްބަރ ނިޔާޒު އެކި ފަހަރު މަތިން މާސްކު ރަނގަޅު ކުރައްވަމުން ގެންދެވިތަން ވަނީ ފެނިފަ އެވެ.

"ކުޑަކުޑަ ދަތިކަމެއް އެބަހުރި އިނގޭތޯ މާސްކު އަޅައިގެން ވާހަކަ ދައްކާތީވެ." މެމްބަރު ވާހަކަ ދައްކަވަމުން ވިދާޅުވި އެވެ. މެމްބަރަށް ޖަވާބު ދެއްވަމުން ރައީސް ނަޝީދު ވިދާޅުވީ މިޖަލްސާ ކުރިޔަށްދަނީ ހެލްތު ޕްރޮޓެކްޝަން އެޖެންސީގެ ލަފަ އާއި އިރުޝާދުގެ މަތިން ކަމަށެވެ.

އޭގެ ފަހުން ވާހަކަ ދައްކަވަން ފެއްޓެވި ހޯރަފުށި ދާއިރާގެ މެމްބަރ އަހުމަދު ސަލީމްވެސް ވަނީ މާސްކު އަޅުއްވައިގެން ވާހަކަ ދައްކަވަން އުނދަގޫކަން ފާހަގަ ކުރައްވާފަ އެވެ. "ހަގީގަތުގައިވެސް އިއްޒަތްތެރި ރައީސް ވަރަށް އުނދަގޫ މާސްކު އަޅައިގެން ވާހަކަ ދައްކަން. އެހެންވެގެން ހުއްޓުންތަކެއް އަންނަނީ" ސަލީމް ވާހަކަ ދައްކަވަމުން ވިދާޅުވި އެވެ.

އެކަމަށް ޖަވާބު ދެއްވަމުން ރައީސް ނަޝީދު ވިދާޅުވީ "އިސާހިތަކު މާސްކު އަޅައިގެން ވާހަކަ ދެއްކުމުގެ ފުރުސަތު އަޅުގަނޑުމެންނަށް ލިބޭނެ." ކަމަށެވެ.

އޭގެފަހުން މެދުހެންވޭރު ދާއިރާގެ މެމްބަރ އަދި އެމްޑީޕީގެ ޕާލަމަންޓްރީ ގްރޫޕްގެ ލީޑަރ އަލީ އާޒިމް ނިޒާމީ މައްސަލަ ނަންގަވާ ވިދާޅުވީ މިއީ ވަރަށް އުނދަގޫ ހާލަތެއް ކަމަށެވެ.

އާޒިމްގެ މި ވާހަކަތަކަށް ޖަވާބު ދެއްވަމުން ރައީސް ނަޝީދު ވިދާޅުވީ މިކަމާއި ގުޅިގެން ބައެއް ޑޮކްޓަރުންނާ މަޝްވަރާ ކުރެއްވި ކަމަށެވެ. އަދި މިކަމުގައި ޑޮކްޓަރުން ދެއްވާ ލަފަ އާއި އިރުޝާދު ބަދަލުވަމުންދާ ކަމަށް ރައީސް ނަޝީދު ވިދާޅުވި އެވެ. އެއީ ބައްޔަކީވެސް ކޮން އެއްޗެއްކަން ޑޮކްޓަރުން ނަށްވެސް މާބޮޑަށް ސާފުނުވާތީ ކަމަށް ރައީސް ނަޝީދު ވިދާޅުވި އެވެ.

މަޖިލީހުގެ ޖަލްސާ ބޭއްވުމަށް އެޗްޕީއޭ އިން ހުއްދަދިނީ އުސޫލުތަކަކަށް އަމަލުކުރުމަށް އެންގުމަށް ފަހު އެވެ. އޭގެ ތެރޭގައި މެމްބަރުން މާސްކް އެޅުމާއި، ޖަލްސާއަށް ވަނުމުގެ ކުރިން ހުން ބެލުމާއި، ދުރުދުރުގައި ތިބުން ހިމެނެ އެވެ.