ނޭމާ އަށް ކޯޗުކޮށްދޭން ބޭނުން: ސެޓިއެން

ޕީއެސްޖީ އަށް ކުޅެމުން އަންނަ ބްރެޒިލްގެ ތަރި ނޭމާ އަށް ކޯޗުކޮށްދޭން ބޭނުންވާ ކަމަށް ބާސެލޯނާގެ ކޯޗު ކިކޭ ސެޓިއެން ބުނެފި އެވެ.

ބާސާ ދޫކޮށް 2017 ވަނަ އަހަރު ނޭމާ ޕީއެސްޖީއަށް ބަދަލުވީ ދުނިޔޭގެ ރެކޯޑް އަގެއް ކަމަށްވާ 222 މިލިއަން ޔޫރޯ އަށެވެ. އެކަމަކު ބާސާ އިން ވަނީ އެޓީމުގެ ކުރީގެ ކުޅުންތެރިޔާ އަލުން އަނބުރާ ގެނައުމަށް މިސީޒަން ފެށުމުގެ ކުރިން ވެސް މަސައްކަތް ކޮށްފައެވެ. އަދި ނޭމާ ވެސް ވަނީ އޭނާ އެނބުރި ބާސާއަށް ބަދަލުވާން ބޭނުންވާކަން ހާމަކޮށްފައެވެ.

ބާސާއާ މި އަހަރުގެ ޖެނުއަރީ މަހު ހަވާލުވި ސެޓިއެން ބުނީ ކޮންމެވެސް ދުވަހަކުން ނޭމާ އަށް ކޯޗުކޮށްދިނުމުގެ ފުރުސަތު ލިބުމަށް އެދޭ ކަމަށެވެ. އެގޮތުން އޭނާގެ އެއް ހުވަފެން ކަމަށްވާ ލިއޮނެލް މެސީ އަށް ކޯޗުކަށް ކޮށްދިނުން މިހާރު ހަގީގަތަކަށް ވެފައިވާ ކަމަށާއި ނޭމާ އަތުވެއްޖެ ނަމަ ވަރަށް އުފާވާނެ ކަމަށް ވަނީ ބުނެފައެވެ.

ރިޕޯޓުތައް ބުނާ ގޮތުން ނޭމާ އަލުން އަނބުރާ ހޯދުމަށްކުރިއަށް އޮތް ޓްރާންސްފާ ބާޒާރުގައި ބާސާ އިން އެ ކްލަބުގެ ފްރާންސް ފޯވާޑް އެންޓޮއިން ގްރީޒްމަން އާއި ނޭމާ ބަދަލުކުރަން ހުށަހަޅަން އަންނަނީ ތައްޔާރުވަމުންނެވެ.

ދާދި ފަހުން ފީފާ އިން އެކުވާލި އާ ޓްރާންސްފާ ގަވާއިދުގައިވާ ގޮތުން އެއްބަސްވުން އުވާލަން ދައްކަން ޖެހޭ އަދަދު ނުހިމަނައި ހަދާ އެއްބަސްވުންތަކުގެ ފުރަތަމަ ތިން އަހަރު ހަމަވުމާއެކު، ކުޅުންތެރިޔާ ކްލަބު ބަދަލުކުރަން ބޭނުންވެއްޖެނަމަ، އެ ކުޅުންތެރިޔާ ވިއްކާނެ އަގެއް ކަނޑައަޅާނީ ފީފާ އިންނެވެ. ސްޕެއިންގެ މީޑިއާ ރިޕޯޓުތައް ކުރިން ބުނި ގޮތުގައި ފީފާ އިން ނޭމާގެ އެއްބަސްވުމަށް ބެލުމަށް ފަހު، އޭނާގެ އަގު ކަނޑަޅާއިރު އެ އުޅޭނީ 180 މިލިއަން ޔޫރޯގަ އެވެ. އެހެންކަމުން ބާސާ އިން ނޭމާ ހޯދަން ކުރާ ބިޑުގައި މި ސީޒަނުގައި އެ ޓީމާ ގުޅުނު ގްރީޒްމަން ހިމަނާނެ ކަމަށްވެސް ރިޕޯޓުތައް ބުނެއެވެ.

2017 ވަނަ އަހަރު ޕީއެސްޖީއާ ގުޅުނު ނޭމާ އަށް އަދި މިހާތަނަށް އެޓީމުގައި އެންމެ އެދެވޭ ކުޅުމެއް ދެއްކިފައި ނުވި ނަމަވެސް، މިހާތަނަށް އޭނާ ޕީއެސްޖީއަށް ކުޅެދިން 52 މެޗުގައި ވަނީ 47 ލަނޑު ކާމިޔާބުކޮށްފައެވެ.