ފަގީރުންނާއި ނިކަމެތިންނަށް އަޅާލުމުގައި ދެމިތިބެން ޖެހޭ: މިނިސްޓަރު އިމްރާން
24 މެއި 2020 | އާދީއްތަ 15:50ފަގީރުންގެ އިހުސާސް ކޮށްމެވެސް ވަރަކަށް އާންމުންނަށް ކުރެވިފައިވާނެ
ހޯމް މިނިސްޓަރު ޝައިޚް އިމްރާން ޢަބްދުﷲ، ކޮވިޑް-19ގެ ހާލަތުގައި ފަގީރު އާއިލާތަކަށް ގިނަ ބަޔަކު އެހީވެދިފައިވާކަން ފާހަގަކުރައްވަފައިވޭ
ރަމަޟާން މަސް ނިމުނު ނަމަވެސް ފަގީރުންނާއި ނިކަމެތިންނަށް އަޅާލުމުގައި ދެމިތިބުމަށް ހޯމް މިނިސްޓަރު ޝައިޚް އިމްރާން ޢަބްދުﷲ އެދިވަޑައިގެންފި އެވެ.
ފިތުރު އީދުގެ ތަހުނިޔާ އަރިސްކުރައްވާ އާންމުކޮށްފައިވާ ކޮށްފައިވާ ވީޑިއޯގައި މިނިސްޓަރު އިމްރާން ވިދާޅުވީ މިއަހަރުގެ ރަމަޟާން މަސް ހޭދަ ކުރަން ޖެހުނީ ދުވަހަކު ވެސް ރަމަޟާން މަސް ބައްދަލު ނުކުރާހާ ތަފާތު ގޮތަކަށް ކަމަށެވެ.
މިނިސްޓަރު އިމްރާން ވިދާޅުވީ މި ހާތަލުގެ ސަބަބުން ދަތިހާލުގައި އުޅެން ޖެހުނު ފަގީރުންނާއި، މިސްކީނުންގެ ދަތިހާލު ކޮންމެވެސް ވަރަކަށް އާންމުންނަށް އިހުސާސް ކުރަން ޖެހުނު ކަމަށާއި، މި ހާލަތުގައި ފަގީރުންނަށް އިތުރު ދަތިއުދަނގޫތައް ކުރިމަތިވެގެން ދިޔަ ކަމަށެވެ.
ނަމަވެސް ދަތިހާލުގައި ފަގީރުންނާ މެދު ގާތްކަން ބަހައްޓާ ބަޔަކު މީހުން ދީލަތި އެހީތެރިކަން ފޯރުކޮށްދެމުން ގެންދިޔަކަން މިނިސްޓަރު ފާހަގަކުރެއްވި އެވެ.
ތިމާގެ އާއިލާއަށާއި، ރައްޓެހި ރަހުމަތްތެރިންނަށް އަދި ގާތްތިމާގެ މީހުން އުފާ ފާގަތިކަން ފޯރުކޮށްދިނުމަކީ މުހިންމު ކަމެއްކަން ފާހަގަކުރައްވައި މިނިސްޓަރު އިމްރާން ވިދާޅުވީ, ގާތްތިމާގެ މީހުންނަށް ގުޅާ, ގުޅުން ބަދަހި ކުރަންޖެހޭ ކަމަށެވެ. އަދި ނިކަމެއްޗެއް ފަގީރެއް ތަފާތު ކުރުމެއް ނެތި, އުފަލުގައި ބައިވެރިކޮށް އުފާވެރި މާހައުލެއް ގާއިމް ކުރުމަށް މިނިސްޓަރު އެދިވަޑައިގެންނެވި އެވެ.
