އެމްއެމްޕީއާރުސީއާއި މަރުކޮމިޝަންގެ މަސައްކަތާއި ގުޅިގެން މަޖިލީހަށް ހުށަހެޅި މައްސަލަ ކޮމިޓީތަކަށް
24 މެއި 2020 | އާދީއްތަ 13:21ޖުޑީޝިއަރީ ކޮމިޓީއަށާއި 241 ކޮމިޓީއަށް މަޖިލީހުގެ ރައީސް، ރައީސް މުހައްމަދު ނަޝީދު ވަނީ މައްސަލަ ފޮނުއްވާފައި
އެމްއެމްޕީއާރުސީއާއި މަރުކޮމިޝަންގެ މަސައްކަތާއި ގުޅޭ މައްސަލަ ހުށަހެޅުއްވި ހެންވޭރު އުތުރު ދާއިރާގެ މެންބަރު އިބްރާހިމް މުއިއްޒު؛ މި މައްސަލަ ވަނީ 2 ކޮމިޓީއަކަށް ފޮނުވާފައި
އެމްއެމްޕީއާރުސީއާއި މަރުކޮމިޝަންގެ މަސައްކަތްތައް ބައްލަވައިދެއްވުމަށް އެދި ހެންވޭރު އުތުރު ދާއިރާގެ މެންބަރު އިބްރާހިމް މުއިއްޒު ހުށަހެޅުއްވި މައްސަލަ މަޖިލީހުގެ ކަމާ ގުޅުންހުރި ކޮމިޓީތަކަށް ފޮނުވައިފިއެވެ.
ރައްޔިތުންގެ މަޖިލީހުން ބުނީ އެމްއެމްޕީއާރސީގެ ބޮޑު ޚިޔާނާތުގެ މައްސަލައާއި މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤުކުރާ ކޮމިޝަނުން ކުރަމުންދާ މަސައްކަތް ބައްލަވާ ދެއްވުން އެދި ހުށަހަޅާފައިވާ މައްސަލަ، ޖުޑީޝިއަރީ ކޮމިޓީއަށާއި 241 ކޮމިޓީއަށް މަޖިލީހުގެ ރައީސް، ރައީސް މުހައްމަދު ނަޝީދު ފޮނުއްވާފައިވާ ކަމަށެވެ.
މަޖިލީހުގެ ރައީސް، ރައީސް މުހައްމަދު ނަޝީދަށް މުއިއްޒު ފޮނުއްވި ސިޓީގައި ވިދާޅުވެފައިވަނީ މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން (އެމްއެމްޕީއާރުސީ) ގެ ބޮޑު ޚިޔާނާތުގެ މައްސަލައާއި، ގެއްލުވާލާފައިވާ މީހުންނާއި ގޮތް ނޭނގޭގޮތަށް މަރާލާފައިވާ މީހުންގެ މައްސަލަތައް ތަޙްޤީޤުކޮށް އިންސާފުހޯދައި ދިނުމަކީ އޭނާ ނިސްބަތްވާ ޕާޓީއާއި، ސަރުކާރުގެ ވައުދެއް ކަމަށެވެ.
އަދި ރައްޔިތުން ވޯޓުދެއްވައި ރައްޔިތުންގެ މަޖިލީހަށް އިންތިޚާބު ކުރެއްވުމުގެ ސަބަބަކީވެސް އެއީ ކަމަށާއި، އެމްއެމްޕީއާރުސީ ގެ ބޮޑު ޚިޔާނާތުގެ މައްސަލައާއި ގެއްލުވާލާފައިވާ މީހުންނާއި ގޮތް ނޭނގޭގޮތަށް މަރާލާފައިވާ މީހުންގެ މައްސަލަތަކަކީ، އެކަމުގައި ޢާންމު މަސްލަޙަތު ހިމެނޭ މައްސަލަތަކެއް ކަމަށެވެ. އަދި އެ މައްސަލަތަކުގެ ތަޙްޤީޤުތަކާއި، ނުވަތަ ދައުވާ އުފުއްލެވުމާއި އަދި ޝަރީޢަތްތައް ހިނގާގޮތުގެ ޢުލޫމާތު ރައްޔިތުންނާ ޙިއްޞާ ކުރެއްވުން މަދުކަމަށް ޤަބޫލުކުރެއްވޭ ކަމަށް މި ސިޓީގައި ވިދާޅުވެފައިވެއެވެ.
އަދި އެ މައްސަލަތައް މިހާރު ގޮސްފައިވާ ހިސާބު ސާފުނުވާތީ، އެ މައްސަލަތައް ބެއްލެވުމުގެ މަސައްކަތް މިހާރު ގޮސްފައިވާ ހިސާބާއި، އެ މައްސަލަތައް ބެއްލެވުމާއި، ދަޢުވާ އުފުއްލެއްވުން ނުވަތަ ޝަރީޢަތް ހިންގެވުން ލަސްވުމަށް ހުރި ސަބަބުތަކާއި، ނުފޫޒެއް ނެތި އިތުބާރުހިފޭ ނިޒާމެއްގެ ތެރެއިން، ނަތީޖާ ނެރެވޭނޭ ފަދައިން އެ ތަކާމެދު ޢަމަލުކުރެވެމު ދޭތޯ ޔަޤީންކުރުމަށް ބޭނުންވާތީ، އެކަން ރައްޔިތުންގެ މަޖިލީހުން ބައްލަވައިދެއްވުމަށް އެދިވަޑައިގަންނަވާ ކަމަށް މުއިއްޒު ފޮނުއްވި ސިޓީގައި ވިދާޅުވެފައިވެއެވެ.
