ޖަލުތަކުން ކޮވިޑް-19 ނުފެނުނީ އެޅުނު ހަރުދަނާ ފިޔަވަޅުތަކުގެ ސަބަބުން: ކޮމިޝަނަރ އަހުމަދު
ރާއްޖެއިން ކޮވިޑް-19 ފެނުމާއެކު ހަރުދަނާ ފިޔަވަޅުތަކެއް އެޅި
ކޮމިޝަނަރު އޮފް ޕްރިޒަންސް އަހުމަދު މުހައްމަދުފުޅު: ކޮވިޑް-19 ޖަލުތަކުގެ ފެތުރުނަ ނުދިނުމަށްޓަކައި ހަރުދަނާ ފިޔަވަޅުތަކެއް އެޅުއްވި ކަމަށްވިދާޅުވި
ރާއްޖޭގެ ޖަލުތަކުގައި ކޮވިޑް19 ނުފެނުނީ ކުރިން އެޅުނު ހަރުދަނާ ފިޔަވަޅުތަކުގެ ސަބަބުން ކަމަށް ކޮމިޝަނަރު އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެ އެވެ.
ޓްވިޓަރ މެދުވެރިކޮށް، ފިތުރު އީދުގެ ތަހުނިޔާ ވިދާޅުވެ އާންމު ކުރެއްވި ވީޑިއޯ މެސެޖުގައި އަހުމަދު ވިދާޅުވީ ރާއްޖެއިން ކޮވިޑް-19 ފެނުމާއި އެކު ޖަލުތަކުގައި އެ ވައިސް ފެތުރުނަ ނުދިނުމަށްޓަކައި ގިނަ ކަންތަކެއް ކުރެވުނު ކަމަށެވެ. އެގޮތުން ގައިދީންނާއި ބަންދު ކުރެވިފައިވާ މީހުންނާއި އޮފިސަރުންގެ ސަލާމަތާ ރައްކާތެރިކަމަށްޓަކައި ހަރުދަނާ ފިޔަވަޅުތަކެއް އެޅުނު ކަމަށްވެސް އަހުމަދު ވިދާޅުވި އެވެ.
މީގެ އިތުރުން, މާލެ ސަރަހައްދު ފުރަބަންދު ކުރުމާއި އެކު ކަރެކްޝަންސްގެ ހިދުމަތްތައް އޮންލައިން ކޮށް ޖަލުތައް އެލާޓަށް ގެނެވުނު ކަމަށް އަހުމަދު ވިދާޅުވި އެވެ. ޖަލުތަކުގައި ތިބި ގައިދީންނާއި ބަންދުކުރެވިފައިވާ މީހުންނާއި އަދި ޖަލުތަކުގައި ތިއްބަވާ އޮފިސަރުންގެ ރައްކާތެރިކަމަށް ވަރަށް ބޮޑަށް އިސްކަންދެއްވައި، ކަމާބެހޭ އެކިއެކި ފަރާތްތައް މެދުވެރިކޮށް، ކޮވިޑް-19 އިން ރައްކާތެރިވުމަށް އަޅަންޖެހޭ ރައްކާތެރިކަމުގެ ފިޔަވަޅުތަކާގުޅޭ ސެޝަންތައް ބާއްވައި، ހޭލުންތެރިކަން އިތުރުކުރެވުނު ކަމަށް ވެސް އަހުމަދު ވިދާޅުވި އެވެ.
އަހުމަދު ވިދާޅުވީ، ފުރަބަންދު ކުރުމާއި ގުޅިގެން ޖަލުތަކުގައި ތިއްބެވި އޮފިސަރުންނަށް ވެސް އެމުވައްޒަފުންގެ އާއިލާތަކާއި ދުރުގައި، ވަޒީފާގެ ޒިންމާ އަދާކުރެއްވުމުގައި ތިއްބެވި ކަމަށެވެ.
ކަރެކްޝަންސް ބެލުމުގެ ދަށުގައި ހަތަރު ޖަލެއް ހިމެނޭއިރު އެ ހުރިހާ ޖަލުތަކުގައި ވެސް ވައިރަސް ނެތްކަން ޔަގީން ކުރުމަށް ރެންޑަމް ސާމްޕަލް ނެގި އެވެ. ހުޅުމާލެ ޖަލު ފިޔަވާ އެހެން ހުރިހާ ޖަލެއްގެ ސާމްޕަލްތައް ލިބިފައިވާއިރު ލިބުނު ހުރިހާ ސާމްޕަލްތަކެއް ވަނީ ނެގެޓިވްވެފަ އެވެ.
