އެމްއެމްޕީއާރުސީއާއި މަރު ކޮމިޝަނުން ބަލަމުންދާ މައްސަލަތައް ހިނގާގޮތް ސާފުކުރަން ހުށަހަޅައިފި
އެމްއެމްޕީއާރުސީ އަދި މަރުކޮމިޝަނުން ބަލާ މައްސަލަތަކަކީ އާންމުންނާއި ގުޅިފައިވާ މައްސަލަތަކެއް
ހެންވޭރު އުތުރު ދާއިރާގެ މެންބަރު އިބްރާހިމް މުއިއްޒު؛ މައްސަލަތައް ހިންގަމުންދާ ގޮތް ސާފުކޮށްދެއްވުމަށް ވަނީ އެދިވަޑައިގެންފައި
އެމްއެމްޕީއާރުސީގެ ބޮޑު ޚިޔާނާތުގެ މައްސަލައާއި ގެއްލުވާލާފައިވާ މީހުންނާއި ގޮތް ނޭނގޭގޮތަށް މަރާލާފައިވާ މީހުންގެ މައްސަލަތައް ހިނގާ ގޮތުގެ މަޢުލޫމާތު ސާފުކުރުމަށް ހެންވޭރު އުތުރު ދާއިރާގެ މެންބަރު އިބްރާހިމް މުއިއްޒު ރައްޔިތުންގެ މަޖިލީހަށް ހުށަހަޅުއްވައިފި އެވެ.
މަޖިލީހުގެ ރައީސް، ރައީސް މުހައްމަދު ނަޝީދަށް ފޮނުއްވި ސިޓީގައި ބުނެފައިވަނީ މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން (އެމްއެމްޕީއާރުސީ) ގެ ބޮޑު ޚިޔާނާތުގެ މައްސަލައާއި، ގެއްލުވާލާފައިވާ މީހުންނާއި ގޮތް ނޭނގޭގޮތަށް މަރާލާފައިވާ މީހުންގެ މައްސަލަތައް ތަޙްޤީޤުކޮށް އިންސާފު ހޯދައި ދިނުމަކީ އޭނާ ނިސްބަތްވާ ޕާޓީއާއި، ސަރުކާރުގެ ވައުދެއް ކަމަށެވެ.
އަދި ރައްޔިތުން ވޯޓުދެއްވައި ރައްޔިތުންގެ މަޖިލީހަށް އިންތިޚާބު ކުރެއްވުމުގެ ސަބަބަކީވެސް އެއީ ކަމަށާއި، އެމްއެމްޕީއާރުސީ ގެ ބޮޑު ޚިޔާނާތުގެ މައްސަލައާއި ގެއްލުވާލާފައިވާ މީހުންނާއި ގޮތް ނޭނގޭގޮތަށް މަރާލާފައިވާ މީހުންގެ މައްސަލަތަކަކީ، އެކަމުގައި ޢާންމު މަސްލަޙަތު ހިމެނޭ މައްސަލަތަކެއް ކަމަށެވެ. އަދި އެ މައްސަލަތަކުގެ ތަޙްޤީޤުތަކާއި، ނުވަތަ ދައުވާ އުފުއްލެވުމާއި އަދި ޝަރީޢަތްތައް ހިނގާގޮތުގެ މަޢުލޫމާތު ރައްޔިތުންނާ ޙިއްޞާ ކުރެއްވުން މަދުކަމަށް ޤަބޫލު ކުރެއްވޭ ކަމަށް މި ސިޓީގައި ވިދާޅުވެފައި ވެއެވެ.
އަދި އެ މައްސަލަތައް މިހާރު ގޮސްފައިވާ ހިސާބު ސާފު ނުވާތީ، އެ މައްސަލަތައް ބެއްލެވުމުގެ މަސައްކަތް މިހާރު ގޮސްފައިވާ ހިސާބާއި، އެ މައްސަލަތައް ބެއްލެވުމާއި، ދަޢުވާ އުފުއްލެއްވުން ނުވަތަ ޝަރީޢަތް ހިންގެވުން ލަސްވުމަށް ހުރި ސަބަބުތަކާއި، ނުފޫޒެއް ނެތި އިތުބާރު ހިފޭ ނިޒާމެއްގެ ތެރެއިން، ނަތީޖާ ނެރެވޭނޭ ފަދައިން އެ ތަކާމެދު ޢަމަލުކުރަމުން ދޭތޯ ޔަޤީންކުރުމަށް ބޭނުންވާތީ، އެކަން ރައްޔިތުންގެ މަޖިލީހުން ބައްލަވައި ދެއްވުމަށް އެދިވަޑައިގަންނަވާ ކަމަށް މުއިއްޒު ފޮނުއްވި ސިޓީގައި ވިދާޅުވެފައި ވެއެވެ.
