ކޮވިޑް-19 އާއި ގުޅިގެން ކުޅުދުއްފުށީ ސިޓީގައި ހިންގަމުން އައި ކާފިއުގެ އަމުރު އުވާލައިފި އެވެ.
ކުޅުދުއްފުށި ސިޓީ ކައުންސިލުން ބުނީ ކޮވިޑް-19 ނެތް ރަށް ތަކުގައި ޖަމާއަތުގައި ނަމާދު ކުރަން ފެށުމަށް ނިންމުމާއި ގުޅިގެން ކުޅުދުއްފުށީގައި ހިންގާފައިވާ ކާފިއު މިވަގުތަށް ނިމުމަކަށް ގެނައުމަށް ކުޅުދުއްފުށި ކޮވިޑް-19 ޓާސްކް ފޯސްއިން ނިންމާފައިވާ ކަމަށެވެ.
އަދި ޖަމާއަތަށް ދިއުމުގައި މި ދަނޑިވަޅުގައި ސިއްހީ މާހިރުންގެ ލަފަޔަށް ބޯލެބުމަށް އިލްތިމާސް ކޮށްފައި ވެއެވެ. މިސްކިތްތަކުގައި ނަމާދުގެ ޖަމާޢަތް ނަހަދާ ރަށްތަކުގެ ލިސްޓުގައި ކުޅުދުއްފުށި ހިމަނާފައި ވާތީ، މިނިސްޓްރީ އޮފް އިސްލާމިކް އެފެއަރޒުން އެހެން ގޮތަކަށް އަންގަންދެން ކުޅުދުއްފުށީގައި ޖަމާޢަތުގައި ނަމާދު ނުކުރާނެ ކަމަށެވެ.
އެރަށު ކައުންސިލުން ބުނީ ކާފިއު ނިމުނު ކަމުގައިވިޔަސް އެއްރަށުން އަނެއް ރަށަށް ދަތުރު ކުރުމުގައި އަމަލު ކުރަމުންދާ އުސޫލަށް ބަދަލެއް ނާންނާނެ ކަމަށާއި، ޕާކުތަކާއި، ކުޅިވަރު ކުޅޭ ތަންތަން އަދި އާންމު ސަރަހައްދުތައް ވެސް ވަކި ގޮތެއް އަންގަންދެން ބަންދު ކުރެވިފައިއޮތް އޮތުން ދެމި އޮންނާނެ ކަމަށެވެ.
އަދި ކާފިއުއަށް ނިމުން ގެނައި ކަމުގައިވިޔަސް އިޖުތިމާއީ ގައިދުރުކަން ހިފެހެއްޓުމަށާއި ސާފުތާހިރުކަމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައި ވެއެވެ. އަދި މި ފުރުޞަތުގައި ބަލި ކޮންޓްރޯލް ކުރުމަށް ރައްޔިތުންގެ ފަރާތުން ލިބޭ އެއްބާރުލުން ފާހަގަކޮށް އެކަމަށް ކުޅުދުއްފުށީ ސިޓީ ކައުންސިލުން ވަނީ ޝުކުރު އަދާކޮށްފަ އެވެ.
