އޮންލައިން ޓީޗިން ސްޓޭންޑަޑްތަކެއް ކަނޑައަޅަން ޖެހޭ: ހަޔަރ އެޑިއުކޭޝަން މިނިސްޓަރު
21 މެއި 2020 | ބުރާސްފަތި 20:08ޔުނިވާސިޓީއާ ކޮލެޖްތަކުގެ ރެޕިއުޓޭޝަން ހިފެހައްޓަން ޖެހޭ
ރައީސް އިބްރާހިމް މުހައްމަދު ސޯލިހު އަދި ހަޔަރ އެޑިއުކޭޝަން މިނިސްޓަރު ގައުމީ ޔުނިވާސިޓީއަށް ކުރެއްވި ޒިޔާރަތެއް ތެރެއިން
އޮންލައިން ޓީޗިންގ ގެ ނެޝަނަލް ސްޓޭންޑަޑްތަކެއް (ގައުމީ މިންގަނޑުތަކެއް) ކަނޑައަޅަން ޖެހޭ ކަމަށް ހަޔަރ އޭޑިޔުކޭޝަން މިނިސްޓަރު ޑރ. އިބްރާހިމް ޙަސަން ވިދާޅުވެއްޖެ އެވެ.
ބުދަ ދުވަހުގެ ރޭ ރާއްޖެޓީވީއަށް ދެއްވި އިންޓަވިއުއެއްގައި ހަޔަރ އޭޑިޔުކޭޝަން މިނިސްޓަރު ވިދާޅުވީ އޮންލައިން ޓީޗިން ފެންވަރު ކަށަވަރު ކުރުމަށް ޓީޗިންގ ނޭޝަނަލް ސްޓޭންޑަޑްތަކެއް ކަނޑައަޅަން ޖެހޭ ކަމަށެވެ. އަދި ޔުނިވާސިޓީއާ ކޮލެޖްތަކުގެ ރެޕިއުޓޭޝަން ހިފެހެއްޓުމަށް މިއީ ކުރަން ޖެހޭ ކަމަށް މިނިސްޓަރު ވިދާޅުވި އެވެ.
ކޮވިޑް-19ގެ ހާލަތާ ގުޅިގެން މޯލްޑިވްސް ކޮލިފިކޭޝަން އޮތޯރިޓީން ރާއްޖޭގެ ހުރިހާ ކޮލެޖްތަކަށް އޮންލައިންކޮށް ކިޔަވައިދިނުމުގެ ވަގުތީ ހުއްދައެއް ދީފައިވާކަން ފާހަގަކުރައްވައި މިނިސްޓަރު ވިދާޅުވީ ގާތްގަނޑަކަށް ހުރިހާ ކޯހެއް ހިންގުމަށް ހުއްދަދެވިފައިވާ ކަމަށެވެ.
މިނިސްޓަރު ވިދާޅުވީ އޮންލައިންކޮށް ކިޔަވާ ދިނުމަކީ ވަރަށް ބުރަ ކަމެއް ކަމަށާއި، މާއްދާތައް ކިޔަވައިދިނުމަށް ބަދަލުތަކެއް ވެސް ގެންނަން ޖެހޭ ކަމަށެވެ. އަދި ކޯސް ވެސް ވަކި ގޮތަކަށް ފަރުމާ ކުރަންޖެހޭކަން މިނިސްޓަރު ފާހަގަކުރެއްވި އެވެ.
މިނިސްޓަރު ވިދާޅުވީ ކޮވިޑް-19ގެ މިހާލަތާ ގުޅިގެން އޮންލައިންކޮށް ކްލާސްތައް ނަގާ ދިނުމަށް މަޖުބޫރު ވެގެން ދިއުމާ ގުޅިގެން މިއީ މުސްތަގުބަލަށް އެޅުނު ބިންގަލެއް ކަަމަށް ވިދާޅުވި އެވެ. އަދި މިކަމުގެ ސަބަބުން ދުވަހަކު ވެސް އޮންލައިން ކްލާހެއްގައި ބައިވެރިނުވާ ދަރިވަރުންނަށް ވެސް އޮންލައިން މޯޑަށް ފަރިތަވާވެވޭނެ ކަމަށް ވިދާޅުވި އެވެ.
މީގެ އިތުރުން މިނިސްޓަރު ވިދާޅުވީ އޮންލައިން ކްލާސްތައް ކުއްލިއަކަށް ބަދަލު ކުރުމުން ބައެއް ދަތިތައް ވެސް ކުރިމަތިވި ކަމަށާއި، ކްލާސްތައް ފެށުނީ ވެސް އެންމެ ފުރިހަމައަށް ތައްޔާރު ނުވެ ކަމަށެވެ. އެގޮތުން ބައެއް މައްސަލަ ދަރިވަރުން މިނިސްޓްރީގެ ސަމާލުކަމަށް ގެނެސްފައިވާތީ ކުރިއަށް އޮތްތާގައި މިމައްސަލަތަކަށް ބަލާނެ ކަަމަށް މިނިސްޓަރު ވިދާޅުވި އެވެ.
