ދުބާއިން 10 ވެންޓިލޭޓަރެއް ގެނެސްފައިވާކަމަށް ނޭޝަނަލް އިމަރޖެންސީ އޮޕަރޭޝަން ސެންްޓަރުން ހާމަކޮށްފި އެވެ.

ބުރާސްފަތި ދުވަހުގެ ރޭ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓާސްކްފޯހުގެ ތަރުޖަމާން މަބްރޫކް އަޒީޒް ވިދާޅުވީ ދުބާއިން ގެނައުމަށް މަސައްކަތްކުރާާ ވެންޓިލޭޓަރުތަކުގެ ތެރެއިން 10 ވެންޓިލޭޓަރެއް ގެނެވިފައިވާކަމަށާއި އެއާއި އެކު ޖުމްލަ 129 ވެންޓިލޭޓަރު މިވަގުތު ރާއްޖޭގައި އެބަހުރިކަމަށެވެ.

ކޮވިޑް-19 ޖެހޭ މީހުންނަށް ހާއްސަކޮށްގެން ސަރުކާރުން ވަނީ 145 ވެންޓިލޭޓަރެއް ރާއްޖެ ގެނައުމަށް ތިން ކުންފުންޏަކާއި ހަވާލުކޮށްފަ އެވެ. މިއީ ދައުލަތުން ގާތްގަނޑަކަށް 56 މިލިއަން ރުފިޔާ ހަރަދުކޮށްގެން ކުރިއަށްގެންދާ މަސައްކަތެކެވެ. މި ކުންފުނިތަކަށް މި މަސައްކަތް ހަވާލުކޮށްފައިވަނީ "ސިންގަލް ސޯސް ޕްރޮކިއުމަންޓް" އުސޫލުންނެވެ.

އެގޮތުން 20 ވެންޓިލޭޓަރު ގެނައުމަށް ނާޑް ނަމަކަށް ކިޔާ ކުންފުންޏަކާއި، 50 ވެންޓިލޭޓަރު ގެންނަން މެޑްޓެކް ކުންފުންޏާއި ވަނީ ހަވާލުކޮށްފަ އެވެ. އަދި 75 ވެންޓިލޭޓަރު ގެންނަން ހަވާލުކޮށްފައިވަނީ، ދުބާއީގެ ކުންފުންޏެއް ކަމަށްވާ އެކްސެކިއުޓަރ ޖެނެރަލް ޓްރޭޑިންއާ އެވެ. 75 ވެންޓިލޭޓަރ ހޯދުމަށް ޑުބާއީ ކުންފުންޏެއް ކަމަށްވާ އެކްސެކިއުޓާ ޖެނެރަލް ޓްރޭޑިންގ އާއި ހަވާލުކޮށްފައިވަނީ 02 އޭޕްރިލް 2020 ގަ އެވެ.