ޔޫއެންޑީޕީ މެދުވެރިކޮށް ޖަޕާނުން ރާއްޖެއަށް އެހީވެއްޖެ

ކޮވިޑް-19ގެ ސަބަބުން ރާއްޖެއަށް ކުރިމަތިވެފައިވާ ގޮންޖެހުންތަކުން އަރައިގަތުމަށާއި، އޭގެ ސަބަބުން ލިބެމުންދާ ގެއްލުންތަކުން އަރައިގަތުމަށް ކުރަމުންދާ މަސައްކަތްތަކަށް ޖަޕާން ސަރުކާރުން ޔޫއެންޑީޕީ މެދުވެރިކޮށް ހިލޭ އެހީ ދީފިއެވެ.

ޖަޕާނުން މިއަދު ދިނީ 21،740،400 (އެކާވީސް މިލިއަން ހަތްލައްކަ ސާޅީސް ހާސް ހަތަރު ސަތޭކަ) ދިވެހި ރުފިޔާގެ އެހީއެކެވެ. މިހާރު އިޢުލާނުކޮށްފައިވާ 'ލޮކްޑައުން' ގެ ޙާލަތަށް ނިމުމެއް އައިސް، އިޤުތިޞާދު އަލުން ހުޅުވޭއިރު، މިއެހީގެ ސަބަބުން ސަރުކާރަށާއި، ވިޔަފާރިތަކަށް ފަސޭހަތަކެއް ލިބިގެންދާނެ ކަމަށް މިނިސްޓްރީ އޮފް ފޮރިން އެފެއަރޒުން ބުނެއެވެ. އަދި އިޤުތިޞާދީ ބޭސް ފުޅާކޮށް، އައު ވިޔަފާރިތަކަށް ފުރުޞަތު ހުޅުވާލުމަށް ކުރެވޭ މަސައްކަތަށް ވެސް މިއެހީގެ ސަބަބުން އިތުރު ބާރެއް ލިބިގެންދާނެ ކަމަށް ފޮރިން މިނިސްޓްރީން ބުނެއެވެ.

މީގެ އިތުރުން ރާއްޖެއަށް މި އެހީ ފޯރުކޮށްދިނުމަށް ޔުނައިޓެޑް ނޭޝަންސް ޑެވެލޮޕްމަންޓް ޕްރޮގްރާމް (ޔޫއެންޑީޕީ) އިން ކުރި މަސައްކަތަށާއި، ހިލޭ އެހީގެ ގޮތުގައި މިފައިސާ ހަމަޖައްސައިދިން ކަމަށްޓަކައި ދިވެހި ސަރުކާރުން ޝުކުރު އަދާކޮށްފައި ވެއެވެ. ޖަޕާނަކީ ރާއްޖޭގެ ގިނަ ދުވަސްވީ ތަރައްޤީގެ ބައިވެރިއެކެވެ. އަދި ކޮވިޑް-19 އާ ދެކޮޅަށް ކުރެވޭ މަސައްކަތުގައި ޞިއްޙީ ދާއިރާ އިތުރަށް ހަރުދަނާކުރުމަށް ޖަޕާނުގެ އެހީތެރިކަން ހޯދުމާ ގުޅޭ ގޮތުން މިހާރުވެސް ޖަޕާނުގެ ސަރުކާރާއެކު ދަނީ މަޝްވަރާ ކުރެވެމުންނެވެ.

މިމަހުގެ ކުރީކޮޅުވެސް ޖަޕާނު ސަރުކާރުން ވަނީ ޔުނައިޓެޑް ނޭޝަންސް ޗިލްޑްރަން ފަންޑް (ޔުނިސެފް) މެދުވެރިކޮށް 5،346،600 (ފަސް މިލިއަން ތިންލައްކަ ސާޅީސް ހަހާސް ހަސަތޭކަ) ރުފިޔާ އަދި ދިވެހި ރެޑް ކްރެސެންޓް މެދުވެރިކޮށް 2،775،000 (2 މިލިއަން ހަތްލައްކަ ހަތްދިޔަ ފަސްހާސް) ރުފިޔާގެ ހިލޭ އެހީވެސް ރާއްޖެއަށް ދީފައެވެ.