ރާއްޖޭގެ ބޯޑަރު އަލުން ހުޅުވާލާ ރިސޯޓުތަކާއި ފަތުރުވެރިކަމުގެ ޚިދުމަތްދޭ އުޅަނދުތައް އައުމަށް ޖޫން 1 ގައި ހުއްދަ ދިނުމަށް ނިންމާފައިވާ ކަމަށް ސޭފް ޓުއަރިޒަމް ގައިޑްލައިންގެ ދެލިކޮޕީގައި ބުނެފި އެވެ.

މި ގައިޑްލައިނަކީ ކޮވިޑް-19 ގެ ސަބަބުން ރާއްޖޭގެ ބޯޑަރ ބަންދު ކުރުމާއި ގުޅިގެން ފަތުރުވެރިކަން ހުއްޓިފައި އޮތް އޮތުން ނިމުމަކަށް ގެނެސް، އަލުން ފެށުމަށްޓަކައި އެކަމަށް ބޭނުންވާ ކަންކަން ހިމަނައިގެން ހަދާފައިވާ ގައިޑްލައިނެކެވެ.

މި ގައިޑްލައިންގެ ޓައިމް ލައިންގައި ބުނެފައިވަނި ރިސޯޓާއި، ފަތުރުވެރިކަމުގެ އުޅަނދު (ޕްރައިވެޓް ޖެޓް އަދި ސުޕަރ ޔޮޓް) ފަހަރުތައް އައުމަށް 1 ޖޫންގައި ހުޅުވާލެވޭނެ ކަމަށެވެ. މީގެ އިތުރުން ޗާޓަރ ފުލައިޓްތައް އަދި ކޮމަރޝަލް އެއަރ ލައިންތަކަށް ހުޅުވާލާނީ ޖުލައި 1 ގައި ކަމަށާއި، ގެސްޓް ހައުސްތަކާއި ހޮޓެލްތައް ހުޅުވާލާނީ އޮގަސްޓް 1 ގައި ކަމަށެވެ.

މިގޮތަށް މި ގައިޑްލައިންގައި ބުނެފައިވީ ނަމަވެސް "މޯލްޑިވްސް ސޭފް ޓޫރިޒަމް ގައިޑްލައިން" ގެ ފުރަތަމަ ދެލިކޮޕީ ފަތުރުވެރިކަމުގެ ޞިނާޢަތުގެ މަސްލަޙަތުވެރިންނާ ވަނީ ހިއްސާކޮށްފަ އެވެ. އަދި މިދެލިކޮޕީއަށް އިޞްލާޙު ހުށަހެޅުމުގެ ފުރުޞަތު މި މަހުގެ 25 ވަނަ ދުވަހުގެ ނިޔަލަށް އެ ފަރާތްތަކަށް ހުޅުވާލާފައިވާ ކަމަށް ޓުއަރިޒަމް މިނިސްޓްރީން ބުނެއެވެ. އެ މިނިސްޓްރީން ބުނީ މިގައިޑްލައިން ފުރިހަމަކޮށް ސަރުކާރުގެ ފައިނަލް ޕޮލިސީ ޢާންމުކުރާނީ ފަތުރުވެރިކަމުގެ ޞިނާޢަތުގެ މަސްލަޙަތުވެރިންގެ ޚިޔާލާއި މަޝްވަރާއާއެކު ކަމުގައެވެ.

ޕްރައިވެޓް ޖެޓް އަދި ސުޕަރ ޔޮޓްތައް އައުމުގެ ހުއްދަ 1 ޖޫންގައި ދިނުމަށް ނިންމާފައިވާ އިރު، މި ގައިޑްލައިންގައި ބުނެފައިވަނީ ޗާޓަރ ފުލައިޓްތަކާއި ޕްރައިވެޓް ޖެޓްތަކުގެ ލޭންޑިންގ ފީއެއްގެ ގޮތުގައި 50،000 ޑޮލަރު ނަގާނެ ކަމަށެވެ. އަދި ރާއްޖޭގެ ކަނޑުގެ ޞަރަޙައްދަށް ވަންނަ ފަތުރުވެރިކަމުގެ ޚިދުމަތްދޭ ކަނޑު އުޅަނދުތަކުން 10،000 ޑޮލަރުގެ ފީއެއް ނެގުމާއި، ސަރުކާރުން ވަކި އެއްޗެއް އަންގަންދެން ކުރޫސް ލައިނަރ ތައް އައުން މަނާވާނެ ކަމަށް ބުނެފައިވެއެވެ. މީގެ އިތުރުން ފަތުވެރިން އުޅަނދަށް އަރުވުމައި ބޭލުމުގެ ކަންކަން ހަމަޖެހިފައި އޮންނަން ޖެހޭނީ ސޭފް ޓުއަރިޒަމަށް ޚާއްޞަވާ އެއަރޕޯޓެއްގައި ކަމަށް ވަނީ ބުނެފައެވެ.