ޓޫރިޒަމް ގައިޑްލައިނަށް އިސްލާހު ހުށަހެޅުމަަށް ފުރުސަތު ހުޅުވާލައިފި

ފަތުރުވެރިކަމަށް އަލުން ހުޅުވާލާއިރު އަމަލުކުރަން ހަދާފައިވާ މޯލްޑިވްސް ސޭފް ޓޫރިޒަމް ގައިޑްލައިންގެ ދެލިކޮޕީއަށް އިސްލާހު ހުށަހެޅުމުގެ ފުރުސަތު ހުޅުވާލައިފި އެވެ.

ޓުއަރިޒަމް މިނިސްޓްރީން ބުނީ ކޮވިޑް-19 ގެ ސަބަބުން ރާއްޖޭގެ ބޯޑަރ ބަންދު ކުރުމާއި ގުޅިގެން ފަތުރުވެރިކަން ހުއްޓިފައި އޮތް އޮތުން ނިމުމަކަށް ގެނެސް، އަލުން ފެށުމަށްޓަކައި އެކަމަށް ބޭނުންވާ ގައިޑްލައިން "މޯލްޑިވްސް ސޭފް ޓޫރިޒަމް ގައިޑްލައިން" ގެ ފުރަތަމަ ދެލިކޮޕީ ފަތުރުވެރިކަމުގެ ޞިނާޢަތުގެ މަސްލަހަތުވެރިންނާ ހިއްސާކޮށްފައިވާ ކަމަށެވެ.

އަދި މި ދެލިކޮޕީއަށް އިޞްލާޙު ހުށަހެޅުމުގެ ފުރުޞަތު މި މަހުގެ 25 ވަނަ ދުވަހުގެ ނިޔަލަށް އެފަރާތްތަކަށް ހުޅުވާލާފައިވާ ކަމަށް ޓުއަރިޒަމް މިނިސްޓްރީން ބުނެ އެވެ. އެ މިނިސްޓްރީން ބުނީ މި ގައިޑްލައިން ފުރިހަމަކޮށް ސަރުކާރުގެ ފައިނަލް ޕޮލިސީ އާންމުކުރާނީ ފަތުރުވެރިކަމުގެ ޞިނާޢަތުގެ މަސްލަހަތުވެރިންގެ ޚިޔާލާއި މަޝްވަރާއާއެކު ކަމުގަ އެވެ.

މި ގައިޑްލައިންގައިވާ ގޮތުން ކޮންމެ ފަތުރުވެރިއެއްގެ އަތުން 100 ޑޮލަރުގެ ވިސާ ފީއެއް ނަގަން ވަނީ ހިމަނާފަ އެވެ. މީގެ އިތުރުން ވިސާ ދޭނީ މަދުވެގެން ރާއްޖޭގައި 14 ދުވަސް ހޭދަ ކުރާ ފަތުރުވެރިންނަށް ކަމަށާއި، އެމީހަކު ހުންނަން ޖެހޭނީ އެންމެ ތަނެއްގައި ކަން ވާންޖެހޭނެ ކަމަށް ބުނެފައި ވެއެވެ.

މި ގައިޑްލައިންގައި ޗާޓާޑް ފުލައިޓްތަކާއި ޕްރައިވެޓް ޖެޓް އަދި ފަތުރުވެރިކަމުގެ ހިދުމަތްދޭ ބޭރުގެ ކަނޑު އުޅަނދު ފަހަރަށް ވެސް ވަކި ކަންތައްތަކެއް ވަނީ ހިމަނާފައެވެ. އެގޮތުން ޗާޓާޑް ފުލައިޓް އަދި ޕްރައިވެޓް ޖެޓްތަކުން ލޭންޑިންގ ފީއެއްގެ ގޮތުގައި 50،000 ޑޮލަރު ނަގަން ވަނި ހިމަނާފައެވެ.

އޭގެ އިތުރުން، ރާއްޖޭގެ ކަނޑުގެ ސަރަހައްދަށް ވަންނަ ފަތުރުވެރިކަމުގެ ހިދުމަތްދޭ ކަނޑު އުޅަނދުތަކުން 10،000 ޑޮލަރުގެ ފީއެއް ނެގުމާއި، ސަރުކާރުން ވަކި އެއްޗެއް އަންގަންދެން ކުރޫސް ލައިނާތައް އައުން މަނާވާނެ ކަމަށް ބުނެފައި ވެއެވެ. މީގެ އިތުރުން ފަތުވެރިން އުޅަނދަށް އެރުވުމައި ބޭލުމުގެ ކަންކަން ހަމަޖެހިފައި އޮންނަން ޖެހޭނީ ސޭފް ޓުއަރިޒަމް އަށް ހާއްސަވާ އެއަރޕޯޓެއްގައި ކަމަށް ވަނީ ބުނެފަ އެވެ.