ސޭފް ޓުއަރިޒަމް ގައިޑްލައިން: އަންނަ ކޮންމެ ފަތުރުވެރިއެއްގެ އަތުން 100 ޑޮލަރު ނަގާނެ
ވިސާ ދޭނީ މަދުވެގެން ރާއްޖޭގައި 14 ދުވަސް ހޭދަ ކުރާ ފަތުރުވެރިންނަށް
ރާއްޖެ އައި ފަތުރުވެރިންތަކެއް އެމިރޭޓްސްގެ ފުލައިޓަކުން ފައިބައިގެން ދަނީ
ރާއްޖޭގެ ބޯޑަރު ހުޅުވާލުމަށްފަހު އަންނަ ކޮންމެ ފަތުރުވެރިއެއްގެ އަތުން 100 ޑޮލަރުގެ ފީއެއް ނަގާ ގޮތަށް ސޭފް ޓުއަރިޒަމް ގައިޑްލައިން ޑްރާފްޓްގައި ހިމަނައިފިއެވެ.
މި ގައިޑްލައިންގައި ބުނެފައިވާ ގޮތުން ފަތުރުވެރިން އައުމުގެ ކުރިން ފަތުރުވެރިކަމުގެ ހިދުމަތްދޭ ތަނެއްގައި ބުކިން ހެދުމާއި، އެތަނަކީ ސޭފް ޓުއަރިޒަމް ލައިސަންސް އޮންނަންޖެހޭތަނަކަށް ވާންޖެހޭ ކަމަށެވެ.
ރާއްޖެ އައިސް ހުންނަ ދުވަސްތަކަށް މެޑިކަލް ކަވަރު ކުރާ ޓްރެވަލް އިންޝިއުރަންސް އޮންނަން ޖެހޭނެ ކަމަށާއި، ކޮންމެ ފަތުރުވެރިއެއްގެ އަތުން 100 ޑޮލަރުގެ ވިސާ ފީއެއް ނަގަން ވަނީ ހިމަނާފަ އެވެ. މީގެ އިތުރުން ވިސާ ދޭނީ މަދުވެގެން ރާއްޖޭގައި 14 ދުވަސް ހޭދަ ކުރާ ފަތުރުވެރިންނަށް ކަމަށާއި، އެމީހަކު ހުންނަން ޖެހޭނީ އެންމެ ތަނެއްގައި ކަން ވާންޖެހޭނެ ކަމަށް ބުނެފައި ވެއެވެ.
މީގެ އިތުރުން ހަތް ދުވަސް ކުރިން ހައްދާފައިވާ ޕީސީއާރު ޓެސްޓް ރިޕޯޓެއް ނުވަތަ ދެ ހަފްތާ ކުރިން ހަދާފައިވާ އެންޓި ބޮޑީ ޓެސްޓްގެ ރިޕޯޓެއް ދަތުރުކުރާ އެއާޕޯޓަކަށް އެރައިވަލްވުމާ އެކު ހުށަހަޅަން ޖެހޭ ކަމަށް ވެސް ބުނެފައި ވެއެވެ.
މި ގައިޑްލައިންގައި ޗާޓާޑް ފުލައިޓްތަކާއި ޕްރައިވެޓް ޖެޓް އަދި ފަތުރުވެރިކަމުގެ ހިދުމަތްދޭ ބޭރުގެ ކަނޑު އުޅަނދު ފަހަރަށް ވެސް ވަކި ކަންތައްތަކެއް ވަނީ ހިމަނާފަ އެވެ. އެގޮތުން ޗާޓާޑް ފުލައިޓް އަދި ޕްރައިވެޓް ޖެޓްތަކުން ލޭންޑިންގ ފީއެއްގެ ގޮތުގައި 50،000 ޑޮލަރު ނަގަން ވަނި ހިމަނާފަ އެވެ.
ރާއްޖޭގެ ކަނޑުގެ ސަރަހައްދަށް ވަންނަ ފަތުރުވެރިކަމުގެ ހިދުމަތްދޭ ކަނޑު އުޅަނދުތަކުން 10،000 ޑޮލަރުގެ ފީއެއް ނެގުމާއި، ސަރުކާރުން ވަކި އެއްޗެއް އަންގަންދެން ކުރޫސް ލައިނާތައް އައުން މަނާވާނެ ކަމަށް ބުނެފައި ވެއެވެ.
މީގެ އިތުރުން ފަތުވެރިން އުޅަނދަށް އެރުވުމާއި ބޭލުމުގެ ކަންކަން ހަމަޖެހިފައި އޮންނަން ޖެހޭނީ ސޭފް ޓުއަރިޒަމްއަށް ހާއްސަވާ އެއަރޕޯޓެއްގައި ކަމަށް ވަނީ ބުނެފަ އެވެ.
