ހޯމް ކަރަންޓީން ކުރެވޭ މީހުން ދިރިއުޅޭ ގެތައް މޮނިޓަރިންގެ ހާލަތަށް ގެނެވޭނެ: އެޗްޕީއޭ
އެފަރާތްތަކަށް ގޭގައި ވަކިން ހުރެވޭނެ އިންތިޒާމް ހަމަޖެހިފައި ހުންނަން ޖެހޭ
އެންއީއޯސީގެ މަސައްކަތައް ކުރިއަށްދަނީ
ކޮވިޑް-19 އާ ގުޅިގެން ހޯމް ކަރަންޓީން ކުރެވޭ މީހުން ދިރުއުޅޭ ގެތަށް މޮނިޓަރިންގެ ހާލަތަށް ގެނެވޭނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
ކޮވިޑް-19 އާ ގުޅިގެން ރާއްޖެ ޓީވީން ގެނެސްދޭ ޚާއްސަ ކަވަރޭޖަށް މައުލޫމާތު ދެއްވަމުން ޕަބްލިކް ހެލްތް ޕްރޮގްރާމް އޮފިސަރ ހައްވާ ޤުރައިޝާ ވިދާޅުވީ ހޯމް ކަރަންޓީން ކުރެވޭ މީހުން ދިރިއުޅޭ ގެ ނުވަތަ އެޕާޓްމަންޓް 14 ދުވަހަށް މޮނިޓަރިންގެ ހާލަތަށް ލެވޭނެ ކަމަށާއި މޮނިޓަރިންގެ ހާލަތު އުވާލެވޭނީ އެފަރާތެއްގެ ސާމްޕަލް ނެގި ޓެސްޓްގެ ނަޓީޖާ ނެގެޓިވް ވުމުން ކަމަށެވެ.
ހޯމް ކަރަންޓީނަށް ލަނީ ޕޮޒިޓިވްވާ ފަރާތްތަކާއި ޑައިރެކްޓް ކޮންޓެކްޓްވެފައި ތިބޭ ފަރާތްތަކުގެ ތެރެއިން ކޮބިޑް-19 އަށް ޝައްކު ކުރެވޭ އެއްވެސް އަލާމާތެއް ފެނިފައި ނުވާ ފަރާތްތަކެވެ. އެފަރާތްތަކަށް ވަކިން ބޭނުންކުރާނެ ކޮޓަރިއާއި ފާޚާނާގެ އިންތިޒާމް ހަމަޖެހިފައި ހުންނަން ޖެހޭނެ ކަމަށް ޤުރައިޝާ ވިދާޅުވި އެވެ.
ޤުރައިޝާ ވިދާޅުވީ ޕޮޒިޓިވް ވެފައިވާ މީހުންނާއި ޑައިރެކްޓް ކޮންޓެކްޓް ވެފައިވާ މީހުންގެ ތެރެއިން 60 އަހަރުން މަތީގެ މީހުންނާއި ދާއިމީ ބައްޔަކަށް ބޭސްކުރާ ފަރާތްތައް އެެގެތަކުގައި ތިބޭތޯ ބަލާ ޗެކްކުރާ ކަމަށާއި އެފަދަ ފަރާތްތައް ކަރަންޓީން ފެސިލިޓީސްތަކަށް ގެންދެވޭނެ ކަމަށެވެ.
ނަމަވެސް އެފަދަ ފަރާތްތަކުންވެސް ގޭގައި ވަކިން ހުރެވޭނެ އިންތިޒާމް ހަަމަޖެހިފައިވާނަމަ އެފަރާތްތައް ގޭގައި ކަރަންޓީން ކުރެވޭނެ ކަމަށެވެ. އަދި އެފަދަ ފަރާތްތަކަށް ކާބޯތަކެއްޗާއި އެހެނިހެން އެހީތެރިކަން ފޯރުކޮށްދޭނެ ވަކި މީހަކު ބަހައްޓަން ޖެހޭނެ ކަމަށް ވިދާޅުވި އެވެ.
އެފަދަ ފަރާތްތަކުން ކޮވިޑް-19 އަށް ޝައްކު ކުރެވޭ އަލާމާތެއް ފެނިއްޖެ ނަމަ "ހާލު ބެލުން" އެޕް މެދުވެރިކޮށް ސިއްޚީ ހާލަތު ބަލަން ޖެހޭނެ ކަމަށާއި އަދި އެއްވެސް އަލާމާތެއް ފެނިއްޖެ ނަމަ ލަސްނުކޮށް އެޗްޕީއޭގެ ނަމްބަރު 1676 އަށް ގުޅުމަސް ވަނީ އެދިފަ އެވެ.
