ގާޒީންގެ މުސާރަ ކުޑަކުރަން މާލިއްޔަތު ކޮމެޓީން ނިންމައިފި
19 މެއި 2020 | އަންގާރަ 08:58ކްރިމިނަލް ކޯޓާއި ޑްރަގް ކޯޓުގެ އިސް ގާޒީގެ މުސާރައިން 7100 ރުފިޔާ އުނިކުރުމަށް ވަނީ ނިންމާފަ
މާލިއްޔަތު ކޮމެޓީގެ ބައްދަލުވުމެއްގެ ތެރެއިން
ޝަރުޢީ ކޯޓުތަކުގެ ގާޒީންގެ މުސާރައިން ބަޔެއް އުނިކޮށް، މުސާރަ ކުޑަ ކުރުމަށް ރައްޔިތުންގެ މަޖިލީހުގެ މާލިއްޔަތު ކޮމެޓީން ނިންމައިފި އެވެ.
މާލިއްޔަތު ކޮމެޓީން ޢާންމު ކުރި ރިޕޯޓުގައި ވާގޮތުން ކްރިމިނަލް ކޯޓާއި، ޑްރަގް ކޯޓުގެ އިސް ގާޒީގެ މުސާރައިން 7100 ރުފިޔާ އުނިކުރުމަށް ވަނީ ނިންމާފަ އެވެ. އަދި އެ ދެ ކޯޓުގެ އެހެނިހެން ގާޒީންގެ މުސާރައިން 6300 ރުފިޔާ އުނިކުރުމަށް ކޮމެޓީން ނިންމާފައި ވެއެވެ.
މާލިއްޔަތު ކޮމިޓީން ވަނީ ސިވިލް ކޯޓާއި، ޖުވެނައިލް ކޯޓުގެ އިސް ގާޒީގެ މުސާރައިން 6950 ރުފިޔާ އުނިކުރުމަށް ނިންމާފަ އެވެ. އެ ދެ ކޯޓުގެ އެހެން ގާޒީން މުސާރައިން 6150 ރުފިޔާ އުނިކުރުމަށް ކޮމެޓީން ފާސްކުރިއިރު ފެމެލީ ކޯޓުގެ އިސްގާޒީގެ މުސާރައިން ވެސް 6950 ރުފިޔާ އުނިކުރުމަށް ވަނީ ފާސްކޮށްފަ އެވެ. އަދި އެ ކޯޓުގެ އެހެނިހެން ގާޒީންގެ މުސާރަ އިން 6650 ރުފިޔާ އުނިކުރުމަށް ވެސް ފާސްކޮށްފައި ވެއެވެ.
މެޖިސްޓްރޭޓުންގެ މުސާރައަށް ގެނައި ބަދަލަށް ބަލާލާއިރު، ދާއިރާގެ އިސް މެޖިސްޓްރޭޓްގެ މުސާރައިން 4500 ރުފިޔާ އުނިކުރަން ފާސްކުރިއިރު ކޯޓުގެ އިސް މެޖިސްޓްރޭޓްގެ މުސާރައިން 2150 ރުފިޔާ އުނިކުރުމަށް ވަނީ ފާސްކޮށްފަ އެވެ. ނަމަވެސް މެޖިސްޓްރޭޓުންގެ މުސާރައިން އެއްވެސް ޢަދަދެއް އުނިއެއް ނުކުރާކަން ފާހަގަކޮށްލެވެ އެވެ.
ގާޒީންގެ މުސާރަތައް ކުޑަކުރުމަށް ނިންމާފައި ވަނީ ކުރިއަށް އޮތް މެއި، ޖޫން އަދި ޖުލައި ތިން މަހަށް ކަމަށް ވާއިރު، ތިން މަހަށް ފަހު ޙާލަތަށް ރިޢާޔަތް ކޮށް މި ޢަދަދުތައް މުރާޖަޢާ ކުރެވޭނެ އެވެ.
