ދަނޑުބިން ދޫކުރުމަށް ހުޅުވާލި ފުރުޞަތުގައި 160 ފަރާތަކުން ފޯމު ހުށަހެޅިކަމަަށް މާޅޮސްމަޑުލު އުތުރުބުރީ އިނގުރައިދޫ ކައުންސިލްގެ އިދާރާއިން ބުނެފި އެވެ.

އިނގުރައިދޫ ކައުންސިލުން ކޮށްފައިވާ އިޢުލާނެއްގަައި ބުނެފައި ވަނީ، އޭޕްރީލް މަހުގެ 12 ވަނަ ދުވަހު ދަނޑުބިމަށް ހުޅުވާލި ފުރުޞަތުގައި 160 ފަރާތަކުން ވަނީ ފޯމު ހުށަހަޅާފައިވާ ކަމަށާއި ފޯމު ހުށަހެޅި ފާރާތްތަކުގެ ތެރެއިން ޝަރުޠު ހަމަވި ގޭބިސީތަކާއި ޝަރުޠު ހަމަނުވާ ގޭބިސީތަކުގެ ލިސްޓު ޢާންމުކޮށްފައި ވާކަމަށެވެ.

ކައުންސިލުން ވަނީ ލިސްޓާއި ގުޅޭގޮތުން ޝަކުވާ ހުޅަހެޅުމުގެ ފުރުޞަތު ހުޅުވާލާފައެވެ. އެގޮތުން، އިނގުރައިދޫ ކައުންސިލްގެ ކޮވިޑް-19 ސްކޭނިންގ ކައުންޓަރުން ޝަކުވާ ފޯމު ލިބޭނެ އިންތިޒާމު ވަނި ހަމަޖައްސާފަ އެވެ. ފޯމު ބަލައިގަތުމަށް ހަމަޖެހިފައި ވަނީ ކޮންމެ ދުވަހެއްގެ 13:00-16:00ށް އިނގުރައިދޫ ކައުންސިލްގެ އިދާރާއިންނެވެ. ފޯމު ބަލައިގަތުމުގެ އެންމެފަހު ތާރީޚަކީ 23 މޭ 2020ގެ ނިޔަލަށްކަމަށް ކައުންސިލުން ބުނެފައި ވެއެވެ.

ކޮވިޑް-19އާ ގުޅިގެން އިޤުތިޞާދަށް ވަރަށް ބޮޑަށް ދަށްވެފައިވާ މިދަނޑިވަޅުގައި ރަށްރަށުން ދަނޑުވެރިކަން ކުރިއެރުވުމަށް އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ބައެއް ރަށްރަށުގައި ދަނޑުބިމުގެ ކުލިން 50 އިންސައްތަ އުނިކޮށްފައި ވެއެވެ. އަދި އަލަށް ދަނޑުވެރިކަން ކުރުމަށް ނުކުންނަ ފަރާތްތަކަށް ޚާއްސަ ސަމާލުކަމެއްދީ އެފުރުޞަތު ފަހިކޮށްދޭނެކަމަށް ކައުންސިލްތަކުން ބުނެއެވެ.