އެސްޓީއޯ އަށް 15 މިލިއަން އެމެރިކާ ޑޮލަރުގެ ލޯނެއް އައި.ޓީ.އެފް.ސީ އިން ހަމަޖައްސައި ދީފި
18 މެއި 2020 | ހޯމަ 12:01އަސާސީ ކާބޯތަކެއްޗާއި، ބޭސް ހޯދޭނެ
އެސްޓީއޯއިން ކާޑުގެ ބާވަތްތައް ޑެލިވަރީކޮށްދެނީ
ކޮވިޑް-19 އާއި ގުޅިގެން ކުރާ މަސައްކަތްތަކުގައި އެހީތެރިވުމުގެ ގޮތުން އިންޓަނޭޝަނަލް އިސްލާމިކް ޓްރޭޑް ފައިނޭންސް ކޯޕަރޭޝަން (އައި.ޓީ.އެފް.ސީ) ގެ ފަރާތުން އިމަރޖެންސީ ފައިނޭންސިންގގެ ގޮތުގައި 15 މިލިއަން އެމެރިކާ ޑޮލަރުގެ ލޯނެއް އެސްޓީއޯ އަށް ހަމަޖައްސައިދީފިއެވެ.
ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ބުނީ ރައްޔިތުންނަށް ބޭނުންވާ އަސާސީ ކާބޯތަކެއްޗާއެކު، ކޮވިޑް-19 އާދެކޮޅަށް ކުރާ މަސައްކަތުގައި، ކުރީ ސަފުގައި މަސައްކަތްކުރާ މީހުން ބޭނުންކުރާ އާލާތްތައް ކަމުގައިވާ 'އިމީޑިއަޓް ލައިފް-ސޭވިންގ ފްރަންޓް ލައިން ޕަރސަނަލް ޕްރޮޓެކްޓިވް މެޑިކަލް އިކުވިޕްމަންޓް' ހޯދުމަށްޓަކައި މާލީ އެހީތެރިކަން (ގްރާންޓް) ވެސް އައި.ޓީ.އެފް.ސީ އިން ފޯރުކޮށްދޭނެ ކަމަށެވެ.
މި ދަނޑިވަޅުގައި ދިވެހިރާއްޖެއަށް ބޭނުންވާ އަސާސީ ކާބޯތަކެއްޗާއި، ބޭހާއި، ސިއްހީ ކަންކަމަށް ބޭނުންކުރާ އާލާތްތައް ހޯދުމަށްޓަކައި، އައި.ޓީ.އެފް.ސީ ގެ ފަރާތުން އެސްޓީއޯ އަށް ހަމަޖައްސައިދީފައިވާ ލޯނުގެ އިތުރުން، ވައިރަހާއި ދެކޮޅަށް ކުރާ މަސައްކަތުގައި ބޭނުންކުރާ އިމަރޖެންސީ މެޑިކަލް އިކުއިޕްމެންޓް ހޯދުމުގައި އެހީތެރިވުމަށްޓަކައި، އައި.ޓީ.އެފް.ސީ އިން ދިވެހިރާއްޖެ އަށް ހިލޭ އެހީ (ގްރާންޓް) ފޯރުކޮށްދިނުމަށްވެސް ނިންމާފައި ކަމަށް އެސްޓީއޯ އިން ބުނެއެވެ.
އައި.ޓީ.އެފް.ސީން ދޭ ލޯނާއި ހިލޭ އެހީ އަކީ، އެ ކުންފުނިން ކޮވިޑް-19އާ ދެކޮޅަށް ކުރިއަށްގެންދާ ޙަރަކާތްތަކުގެ ތެރެއިން އެ ކުންފުނީގެ މެންބަރު ޤައުމުތަކަށް އެހީވުމުގެ ގޮތުން ކުރުމަށް ރާވާފައިވާ ކަމެކެވެ.
މީގެ އިތުރުން، އެސްޓީއޯ އިން ބުނީ އައި.ޓީ.އެފް.ސީ ގެ ކޮވިޑް-19 ރެޕިޑް ރެސްޕޮންސް ފެސިލިޓީގެ 300 މިލިއަން އެމެރިކާ ޑޮލަރަކީ އިސްލާމިކް ޑިވެލޮޕްމަންޓް ބޭންކްގެ ރެސްޕޮންސް ޕެކޭޖުގެ ގޮތުގައި ކަނޑައަޅާފައިވާ 2.3 ބިލިއަން އެމެރިކާ ޑޮލަރުގެ ތެރެއިން ބައެއް ކަމަށެވެ.
އައި.ޓީ.އެފް.ސީ ގެ ފައިނޭންސް އަދި ގްރާންޓްގެ އެހީއާއެކު އެސްޓީއޯ އިން ކާޑާ، ބޭހާ، އަދި ޞިއްޙީ މަސައްކަތްތެރިންނަށް ބޭނުންވާ އެންޓި-ފޮގް ފޭސް ޝީލްޑް، ސޭފްޓީ ގޮގްލް، އަދި ޕްރޮޓެކްޓިވް ޔުނިފޯމް ސޫޓް ފަދަ މުހިންމު ޕަރސަނަލް ޕްރޮޓެކްޓިވް އިކުވިޕްމަންޓްތައް ފޯރުކޮށްދޭނެ ކަމަށެވެ.
އެސްޓީއޯގެ ފަރާތުން އެކުންފުނީގެ ސީއީއޯ އަދި މެނޭޖިންގ ޑިރެކްޓަރ ހުސެން އަމްރު މުޙައްމަދު ރަޝާދު ވިދާޅުވީ، އައި.ޓީ.އެފް.ސީން އެސްޓީއޯ އަށް ފޯރުކޮށްދީފައިވާ ގްރާންޓްގެ ސަބަބުން، ރިސްކްތައް ދެނެގަތުމަށާ، ސްކްރީން ކުރުމާ، ކޮންޓެކްޓް ޓްރޭސިންގ ހެދުމާ، ބައްޔަށް ޝައްކު ކުރެވޭ އަދި ބަލިޖެހިފައިވާ ފަރާތްތައް ޓެސްޓް ކުރުމަށްޓަކާ ސަރުކާރުން ކުރަމުންދާ މަސައްކަތްތައް އިތުރަށް ވަރުގަދަވެ، ހަރުދަނާ ވާނެ ކަމަށެވެ. މީގެ އިތުރުން، މި ފަންޑިންގ ގެ ސަބަބުން ރައްޔިތުންނަށް ބޭނުންވާ ކާޑުގެ ބާވަތްތައް ވެސް މެދުކެނޑުމެއް ނެތި ފޯރުކޮށްދިނުމަށް އިތުރު އެހީތެރިކަމެއް ލިބިގެންދާނެ ކަމަށް ވެސް އަމްރު ވަނީ ވިދާޅުވެފައެވެ.
މި ލޯނުގެ އެހީގެ ތެރެއިން، ބައްޔާ ދެކޮޅަށް ކުރީސަފުގައި މަސައްކަތްކުރާ ޞިއްޙީ މަސައްކަތްތެރިންގެ ރައްކާތެރިކަން އިތުރަށް ހަރުދަނާ ކުރެވިގެންދާނެ ކަމަށްވެސް އެސްޓީއޯ އިން މަޢުލޫމާތު ދެއެވެ. އަދި އައި.ޓީ.އެފް.ސީން ދޭ ގްރާންޓްގެ ސަބަބުން، އޯ.އައި.ސީ މެންބަރު ޤައުމުތަކުގެ ޞިއްޙީ، އިޖްތިމާޢީ، އަދި އިޤުތިޞާދީ ދުޅަހެޔޮކަމާއެކު، ދިގުމުއްދަތުގައި އެ ޤައުމުތައް ކުރިއެރުވުމަށް އައި.ޓީ.އެފް.ސީން ދޭ އަހައްމިޔަތުކަން ހާމަވެގެންދާ ކަމަށް ވެސް އެކުންފުނިން ބުނެއެވެ.
