ގޭގައި ފިޠުރު ޢީދު ނަމާދު ކުރުން ހުއްދަ: ގްރޭންޑް މުފްތީ
18 މެއި 2020 | ހޯމަ 09:31ކޮވިޑްގެ ބަލިމަޑު ކަމަކީ ޢީދު ނަމާދު ގޭގައި ކުރެވިދާނެ ޙާލަތެއް
ސައުދީ އަރަބިއްޔާގެ އިފްތާ ޝައިޚް ޢަބްދުލް ޢަޒީޒް އަލް ޝައިޚް
ޚާއްޞަ ޙާލަތްތަކުގައި ގޭގައި ފިޠުރު ޢީދު ނަމާދު ކުރުން ހުއްދަ ކަމަށް ސަޢުދީ ޢަރަބިއްޔާގެ ގްރޭންޑް މުފްތީ އަދި އެޤައުމުގެ ދީނީ އިލްމުވެރިންގެ އެންމެ މަތީ މަޖިލީހުގެ ރައީސް އިފްތާ ޝައިޚް ޢަބްދުލް ޢަޒީޒް އަލް ޝައިޚް ވިދާޅުވެއްޖެ އެވެ.
ސައުދީ އަރައްބިއްުޔާގެ ދައުލަތުގެ މީޑިއާގައި ވާހަކަފުޅު ދައްކަވަމުން ގްރޭންޑް މުފްތީ ވިދާޅުވީ ޚާއްޞަ ނުވަތަ ޤަބޫލުކުރެވޭ ޙާލަތްތަކުގައި ޢީދު ނަމާދު ގޭގައި ކުރެވިދާނެކަމަށާއި، މިހާރުގެ ޙާލަތައް ރިޢާޔަތް ކުރާނަމަ ކޮވިޑް-19 ގެ ބަލި މަޑުކަމަކީ މިފަދައިން ގޭގައި ޢީދު ނަމާދު ކުރުން ހުއްދަކުރެވޭ ޙާލަތެއް ކަމަށެވެ.
ގޭގައި ޢީދު ނަމާދު ކުރާނޭގޮތުގެ ތަފުޞީލު ހާމަކުރައްވާ މުފްތީ ވިދާޅުވީ، މިއީ، ދެ ރަކުޢަތުގެ ނަމާދެއްކަމަށާއި، ގިނަ ގިނައިން ތަކުބީރު ކިޔަން ޖެހޭނެކަމަށެވެ. އެހެންނަމަވެސް ގޭގައި ޢިދު ނަމާދު ކުރާއިރު ޢީދު ޚުޠުބާ ނުކިޔާނެކަމަށެވެ.
ފިޠުރު ޒަކާތާއި ބެހޭ ގޮތުން މުފްތީ ވިދާޅުވީ، ހިލޭ ސާބަހަށް މަސައްކަތް ކުރާ ޖަމްޢިއްޔާ ޖަމާޢަތަކަށް ޢީދުގެ އެއްދުވަސް ކުރިން ބަހަން ޝަރުޠު ކޮށްފަ ފިޠުރު ޒަކާތް ޙަވާލު ކުރެވިދާނެކަމަށެވެ. އެއީ، އެކަން ކުރެވޭނެކަމުގެ ޤާބިލުކަން ހުރި ޔަޤީންކަން އޮތް ޖަމްޢިއްޔާ ނުވަތަ ޖަމާޢަަތެއްކަން ކަށަވަރު ކުރަން ވާނެކަމަށެވެ.
މުފްތީ ވަނީ އަންނަ ފިޠުރު ޢީދުގެ މުނާސަބާގައި ދަރިންނާއެކު އުފާވެރި ބާއްޖަވެރި ވަގުތު ހޭދަ ކުރުމަށް މައިންބަފައިންނަށް އިލްތިމާސްކުރައްވާފައެވެ.
