ފިހާރައަށް ދާނެ އެކަކު ކޮންމެ ގެއަކުން ހަމަޖެއްސުމަށް އެދިއްޖެ
ވިޔަފާރިއަށް ނުކުތުން ވީހާ ވެސް މަދުކޮށް، ހަފްތާއަކަށް ވާވަރަށް އެއްޗެހި ގަތުން މުހިންމު
ހުޅުމާލޭގައި ބާޒާރުކޮށްގެން ފިހާރައިން މީހަކު ނުކުންނަނީ؛ ކޮންމެ ގެއަކުން ވެސް އެކަކު ފިހަރަކުރުމަށް ކަނޑައެޅުމަށް ވަނީ އެދިފައި
ވައިރަސް ފެތުރުން ހުއްޓުވުމަށް ކުރަމުންދާ މަސައްކަތުގެ ތެރެއިން ކޮންމެ ގެއަކުން ވެސް ފިހާރައަށްދާނެ ވަކި މީހަކު ހަމަޖެއްސުމަށް އެދިއްޖެ އެވެ.
ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ ކޮންމެ ގެއެއްގައި ވެސް ކަނޑައެޅިފައިވާ ފިހާރައަށް ދާނެ މީހަކު ބެހެއްޓުން މުހިންމު ކަމަށެވެ. އަދި ވިޔަފަރި ކުރަން ނުވަތަ އެއްޗެހި ގަންނަން ދާން ކޮންމެވެސް އެކަކު ކަނޑައެޅުމަކީ މުހިންމު ކަމަށެވެ.
ޑރ. އަފްޒަލް ވިދާޅުވީ ލޮކްޑައުންގައި ގޭގެއަށް ދިއުމުގެ ފުރުސަތެއް ނޯންނާނެ ކަމަށާއި، އެހެންނަމަވެސް ފުރުސަތެއް ލިބިއްޖެ ނަމަވެސް، އިރުޝާދަކީ އެހެން އަންނަން ބޭނުންވާ މީހުންނަށް އެ ފުރުސަތު ނުދިނުން ކަމަށެވެ. ވަކިން ހާއްސަކޮށް ގޭގައި ހައި ރިސްކް ގްރޫއްޕުގެ މީހެއް، 65 އަހަރުން މަތީގެ މީހެއް، ދާއިމީ ފަރުވާއެއް ލިބެމުންދާ ބައްޔެއް ހުރި މީހަކު ނުވަތަ 5 އަހަރުން ދަށުގެ ކުޑަކުއްޖަކު އަދި ހާއްސަކޮށް ތުއްތުކުދިން ގޭގައި އުޅޭނަމަ އެއްވެސް ވަރަކަށް މީހުން އައުން ހުއްދަ ދީގެން ނުވާނެ ކަމަށެވެ.
އަފްޒަލް ވިދާޅުވީ އުމުރުން 65 އަހަރުން މަތީގެ ރެންޑަމް ސާމްޕަލިން ނެގުމުގެ މަސައްކަތް ފަށާފައިވާ ކަމަށާއި، އެކަމަށް ވަރަށް ބޮޑަށް އެއްބާރުލުން ދެއްވުމަށް ވަނީ އެދިވަޑައިގެންފަ އެވެ. އަދި މީގެ އިތުރުން ގައިދުރުކަން ބެހެއްޓުމާއި ސައިބޯނި ލައިގެން އަތްދޮވުމާއި ހޭންޑް ސެނިޓައިޒާ ބޭނުން ކުރުން އާދަޔަކަށް ހަދަން ޖެހޭ ކަމަށާއި، މީގެ އިތުރުން ފިހާރަތަކަށް ދާއިރު ތަކެތީގެ މުއްދަތު ހަމަވަނީ ކޮން ދުވަހަކަށްތޯ ބެލުން މުހިންމު ކަމަށާއި، ގަންނަ އެއްޗެހި ގެއަށް ގެނެސް ސާފްކުރެވެން ހުރި އެއްޗެއް ވިއްޔާ އެގެ ބޭރު ސާފްކޮށްލާފައި ބޭނުންކުރުމަށް ޑރ. އަފްޒަލް އިލްތިމާސް ކުރެއްވި އެވެ.
ޑެލިވަރ ކުރެވޭ ކާބޯތަކެތި ވީހާވެސް އަވަހަކަށް ގޭގެ ކޮންމެވެސް ކޮންޓެއިނާއަކަށް ބަދަލުކުރުމަށްފަހު ޕެކޭޖިން އެއްލާލުމަށްފަހު ރަނގަޅަށް ސައިބޯނި ލައިގެން އަތް ދޮވުމަށާއި، މިއީ ވިއްސާރަ ދުވަސްވަރަކަށްވުމުން ޑެންގީ ކޭސްތައް އިތުރުވުން އެކަށީގެންވާތީ މި ދުވަސްވަރު ހަފްތާއަކު އެއްފަހަރު މަދުވެގެން މުޅި ގޭގައި މަދިރި އާލާވަފަދަ ތަންތަން ނައްތާލުމަށް ޑރ. އަފްޒަލް އިލްތިމާސްކުރެއްވި އެވެ.
