އަންނަ ސީޒަން ސެޕްޓެމްބަރު މަހު ފެށޭނެ ކަމަށް އުންމީދު ކުރަން: ބައްސާމް

2020/2021 ވަނަ އަހަރުގެ ފުޓްބޯޅަ ސީޒަން ސެޕްޓެމްބަރު މަހު ފެށޭނެ ކަމަށް އުންމީދުކުރައްވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.

މީގެ ކުރިން އެފްއޭއެމުން ވަނީ ކޮރޯނާވައިރަސް (ކޮވިޑް-19) ގެ ސަބަބުން 2019/2020 ވަނަ އަހަރުގެ ފުޓްބޯޅަ ސީޒަންގެ ބާކީބައި ކެންސަލް ކޮށްފައެވެ. މި ސީޒަންގެ ބާކީބައި އެފްއޭއެމުން ކެންސަލް ކުރީ އެފްއޭ ކަޕްގެ ކުއާޓާ ފައިނަލް މެޗުތައް ކުޅުމަށްފަހު އެވެ.

އަންނަ ސީޒަން ޖޫން މަހު ފަށަން ކަލަންޑަރުގައި ހިމަނާފައި އޮތް ނަމަވެސް، ކޮވިޑް-19 އާ ގުޅިގެން ސީޒަން ފެށުން ލަސްވާނެ އެވެ.

ރާއްޖެ ޓީވީއަށް ދެއްވި ހާއްސަ އިންޓަވިއުއެއްގައި ބައްސާމް ވިދާޅުވީ ފުޓްބޯޅަ ސީޒަން އަލުން ފަށާނެ ތާރީޚެއް އަދި ކަނޑައަޅާފައި ނުވި ނަމަވެސް، އެފްއޭއެމުން ވިސްނުން ގެންގުޅެނީ ސެޕްޓެމްބަރު މަހު ފުޓްބޯޅަ ސީޒަން އަލުން ފެށުމަށް ކަމަށެވެ. އެގޮތުން ލޮކްޑައުނަށް ފަހުގައި ހުއްދަ ލިބިގެންދާހާ އަވަހަކަށް ފުޓްބޯޅައިގެ ހަރަކާތްތައް ފަށާނެ ކަމަށާއި، އެކަމަކު ހުރިހާ ކަމެއް ނިމިގެން ދާނީ ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި ސަރުކާރުން ނިންމަވާ ނިންމެވުމަކަށް ކަމަށްވެސް ބައްސާމް ވިދާޅުވި އެވެ.

ބައްސާމް އިތުރަށް ވިދާޅުވީ ލީގު އަލުން ފަށާއިރު ވަކި އުސޫލުތަކެއް ކަނޑައަޅަން ޖެހޭ ކަމަށާއި އެކަން އެފްއޭއެމުގެ މެޑިކަލް ޑިޕާޓްމަންޓުން މިހާރު ކުރިއަށް ގެންދާ ކަމަށެވެ. އެގޮތުން ކްލަބުތަކުން ތަމްރީނުތައް ފަށާއިރު އަމަލުކުރަން ޖެހޭނެ އަސޫލުތަކާއި މުބާރާތްތައް ކުރިއަށްދާނެ ގޮތުގެ އުސޫލުތަކެއް ކަނޑައެޅުމުގެ މަސައްކަތް ކުރަމުންދާ ކަމަށާއި، އެ އުސޫލުތައް އެޗްޕީއޭ އާއި ސަރުކާރަށް ހިއްސާ ކުރާނެ ކަމަށްވެސް ވިދާޅުވި އެވެ.

ކޮވިޑް-19 އާ ގުޅިގެން ރާއްޖޭގެ ފުޓްބޯޅައިގެ ހަރަކާތްތައް ހުއްޓުމަކަށް އައިސްފައިވާއިރު، މީގެ ކުރިން އޭޝިއާގެ ގައުމެއް ކަމަށްވާ ދެކުނު ކޮރެއާ އިން ވަނީ އެ ގައުމުގެ ލީގު އަލުން ފަށާފައެވެ. އަދި ޔޫރަޕްގެ ޖަރުމަނުން ވަނީ ހޮނިހިރު ދުވަހު ޖަރުމަން ލީގު އަލުން ފަށާފައެވެ.

ކޮވިޑް-19 ރާއްޖޭގައި ހަލުވިކަމާއެކު ފެތުރެމުންދާއިރު، މިހާތަނަށް ރާއްޖެއިން މި ވައިރަހަށް 1078 މީހަކު ވަނީ ޕޮޒިޓިވް ވެފައެވެ. މި ވައިރަސް ޖެހިގެން ރާއްޖެއިން 4 މީހަކު މަރުވެފައިވާއިރު، 49 މީހަކު ވަނީ ވައިރަހުން ރަނގަޅު ވެފައެވެ.