ލައިލަތުލް ޤަދްރި ވިލޭރޭ ހޯދުމަށް ގިނަ ވަގުތު އަޅުކަމުގައި ހޭދަކުރުމަށް ޚުތުބާގައި ގޮވާލައިފި
15 މެއި 2020 | ހުކުރު 08:2127 ވިލޭރެއަށް ބައެއް އިލްމްވެރިން ބުރަވެލައްވާ
މިއަދުގެ ޚުތުބާގެ މައުޟޫއަކީ \'\'\'ލައިލަތުލް ޤަދްރި ވިލޭރޭ ހޯދާށެވެ\'\'
ރަމަޟާން މަހުގެ ފަހު ދިހަ ގުނަމުން ދާއިރު، ލައިލަތުލް ޤަދްރި ވިލޭރޭގައި ސަވަބާ ދަރުމަ ހޯދުމަށް ވީހާ ވެސް ގިނައިން އަޅުކަމުގައި ހޭދަ ކުރުމަށް މިއަދުގެ ހުކުރު ޚުތުބާ ގޮވާލައިފިއެވެ.
''ލައިލަތުލް ޤަދްރި ވިލޭރޭ ހޯދާށެވެ'' މިމައުޟޫއަށް އިއްވި ޚުތުބާގައި ބުނީ ލައިލަތުލް ޤަދްރި ވިލޭރެއަކީ ކަނޑައެޅިގެން މިވެނި ރެއެއްކަމުގައި ބުނެވެން ނެތް ކަމަށެވެ. ނަމަވެސް ބައެއް ޢިލްމުވެރީން ބަޔާންކުރައްވާފައިވާ ގޮތުން، އެއީ ހަތާވީސް ވިލޭރޭ ކަމުގައިވެއެވެ.
ޚުތުބާގައި ބުނީ މާތް ﷲ އެރޭ ސިއްރު ކުރައްވާފައިވަނީ ވަރަށް ގިނަ ޙިކުމަތް ތަކަކަށް ޓަކައި ކަން ކަށަވަރުވާއިރު، މީގެ ތެރޭގައި، އަޅުތަކުން ގިނަގިނައިން ﷲގެ ޙަޟްރަތަށް ދުޢާ ކުރުމާއި، ގިނަގިނައިން އަޅުކަން ކުރުމަށް ހިތްވަރު ދެއްވުމާއި އެކަމަށް ޝައުޤުވެރި ކުރެއްވުން ހިމެނެެވެ. އޭގެ ސަބަބުން ފާފަތައް ފުހެވި، ދަރަޖަ މަތިވެރިވުން ހިމެނިގެންވާ ކަމަށް ޚުތުބާގައިވެއެވެ.
ޚުތުބާގައި ބުނީ މިއިން އެނގެނީ ވަކި ރެއެއް ކަނޑައެޅުމެއް ނެތި، ފަހު ދިހައިގެ އެންމެހާ ރޭތަކުގައި ވެސް، އަޅުކަމައިގެން ގާއިމުވެ އުޅުމަކީ މުހިންމު ކަމެއް ކަމެއް ކަމަށެވެ. އަދި ލައިލަތުލްޤަދްރި ވިލޭރޭ، އިޚްލާޞްތެރި ކަމާއެކު އަޅުކަމައިގެން ގާއިމުވެ ހުރުމުގެ ނަޞީބު ލިބިއްޖެ މީހަކީ ބާއްޖަވެރިއެއް ކަމަށް ވެސް ވެއެވެ.
މީގެ އިތުރުން ޚުތުބާގައި ބުނީ ރަމަޟާން މަހަށް އަލްވަދާޢު ކިޔުމުގެ ވަގުތު ކުޑަތަންވަމުން އަންނަ އިރު، ހަނދާން ކުރަން ޖެހޭ ވަރަށް މުހިއްމު ކަމެއް އެބައޮތް ކަމަށެވެ.
އެއީ ރަމަޟާން މަހުގެ ރޯދަ ހިފުމާ ގުޅިގެން މުސްލިމުންގެ މައްޗަށް މާތް ﷲ ވާޖިބު ކުރައްވާފައިވާ ފިތުރު ޒަކާތް ދެއްކުން ކަމަށާއި، ތިމާ އާއި، ތިމާ ޚަރަދު ދެމުން އަންނަ ބަޔަކު ޢީދުވިލޭރެޔާއި ޢީދު ދުވަހު ކެއުމަށް ފުދޭވަރަށް ހުރެފައި، އިތުރަށް ހުރި އެއްޗަކުން ފިޠުރު ޒަކާތް ނެރުން ކޮންމެ މުސްލިމެއްގެ މައްޗަށް ވާޖިބުވާކަން ޚުތުބާގައި ފާހަގަކުރައްވާފައިވެއެވެ.
ޚުތުބާގައި ބުނީ މި ޒަކާތް ނެރެން ޖެހެނީ ޢީދު ނަމާދުގެ ކުރިން ކަމަށާއި، އުޒުރަކާ ނުލައި، ފިތުރު ޒަކާތް ނެރުން، ޢީދު ނަމާދަށް ވުރެ ފަސްކުރުން ހުއްދަ ވެގެން ނުވާނެ ކަމަށެވެ. އަދި ޢުޒުރެއް ނެތި، ޢީދު ނަމާދަށް ފަހު ނެރެފި ނަމަ އެ ވާނީ ޞަދަޤާތަކަށް ކަމަށް ޚުތުބާގައިވެއެވެ.
އެހެންކަމުން އީދު ނަމާދުގެ ކުރިން ފިތުރު ޒަކާތް ނެރުމަށް ސަމާލުވުމަށް ވަނީ އިލްތިމާސްކޮށްފައެވެ.
