ދުނިޔޭގެ އެކި ކަންކޮޅުތަކުގައި ފެތުރެމުންދާ ކޮވިޑް-19ށް މުޅި ދުނިޔެއިން ޕޮޒިޓިވްވީ މީހުންގެ އަދަދު 4.5 މިލިއަނަށް ވުރެ އިތުރުވެއްޖެއެވެ.

އެންމެ ފަހުގެ ތަފާސް ހިސާބުތައް ދައްކާގޮތުން, ވައިރަސް ޖެހުނު މީހުންގެ ޖުމުލަ ޢަދަދު ހުކުރު ދުވަހު ވަނީ 4,527,811ށް އަރާފައެވެ. މި ބަލި ޖެހުނު މީހުންގެ ތެރެއިން 1,706,174 މީހުން ބަލިން ފަސޭހަވެފައި ވާއިރު 303,438 މީހުން ވަނީ ކޮވިޑް-19 ޖެހިގެން މަރުވެފަ އެވެ.

ވައިރަސް ފެތުރެމުންދާ ޒާތައް ބަލާއިރު، އެންމެ ގިނަ ޢަދަދަަކަށް ވައިރަސްއަށް ޕޮޒިޓިވްވީ ވެސް އަދި މަރު ވީވެސް އެމެރިކާއިންނެވެ. އެމެރިކާއިން މިހާތަނަށް މިލިއަން ހަތަރުލައްކަ އަށް ވުރެ ގިނަ މީހުން ވައިރަސްއަށް ޕޮޒިޓިވް ވެފައިވާއިރު، 86,912 މީހުން ވަނީ ފަރުވާދެމުން ދަނިކޮށް ޙާލު ދެރަވެގެން މަރުވެފައެވެ.

ދުނިޔޭގެ 218 ސަރަހައްދަކުން ވައިރަސް ފެނިފައި ވާއިރު، އެމެރިކާ ފިޔަވައި ދެން އެންމެ ގިނަ ޢަދަދެއްގެ މީހުން ވައިރަސްއަށް ޕޮޒިޓިވް ވެފައިވަނީ ޔޫރަޕުގެ ޤައުމުތަކުންނެވެ. އެގޮތުން ސްޕެއިނާއި، ރަޝިއާ، އިޓަލީވިލާތާއި، އިނގިރޭސި ވިލާތުން ގިނަ ޢަދަދެއްގެ މީހުން ކޮވިޑް-19އަށް ޕޮޒިޓިވް ވެފައިވެއެވެ.

އޭގެ އިތުރުން، ފާއިތުވި ދުވަސްތަކާ އަޅާބަލާއިރު، ރަޝިއާއިން ވައިރަސްއަށް ޕޮޒިޓިވްވި މީހުންގެ އަދަދު ވަނީ އިތުރުވެފަ އެވެ. އެގޮތުން ރަޝިއާއިން 252,245 މީހުން ވައިރަސްއަށް ޕޮޒިޓިވް ވެފައިވާއިރު، ރަޝިއާގައި މަރުވީ މީހުންގެ އަދަދު ނިސްބަތުން ދަށްކަން ފާހަގަކޮށްލެވެއެވެ. އެގޮތުން ރަޝިއާއިން ކޮވިޑް-19 ޖެހިގެން މަރުވެފައި ވަނީ 2,305 މީހުންނެވެ. އަދި 53,530 މީހުން ބަލިން ފަރުވާދީ ރަނގަޅު ކުރެވިފައިވެއެވެ. އެއާއެކު ރަޝިއާ ވެފައިވަނީ މުޅި ދުނިޔެއިން 3 ވަނައަށް އެންމެ ގިނަ އަދަދެއްގެ މީހުން ޕޮޒިޓިވްވި ޤައުމަށެވެ.

ރަޝިއާގެ އިތުރުން އެެމެރިކާ، ސްޕެއިން، އިޓަލީ، އިނގިރޭސި ވިލާތުގެ އިތުރުން ބްރެޒިލް އަކީ މުޅި ދުނިޔެއިން ވައިރަސްއަށް ޕޮޒިޓިވްވި މީހުންގެ އަދަދު ދެލައްކައަކަށްވުރެ އިތުރުވެފައިވާ ޤައުމުތަކެވެ.