ކުޅުދުއްފުށި ސިޓީގެ ކާފިއު 4 ވަނަ ފަހަރަށް އިތުރުކޮށްފި
ކުޅުދުއްފުށީގައި މެންދުރު ފަހު 3:30 އިން ހެނދުނު 6:00 އަށް
ކުޅުދުއްފުށި ސިޓީގައި ބާއްވަ ހޮނިހިރު ބާޒާރުގެ ތެރެއިން؛ އެ ސިޓީގައި 4 ވަނަ ފަހަރަށް ކާފިއު މުއްދަތު އިތުރުކޮށްފައިވާ އިރު، މެންދުރު ފަހު 3:30 އިން ހެނދުނު 6:00 އަށް ބޭރަށް ނުކުމެ އުޅުމަކީ މަނާކަމެކެވ
ކުޅުދުއްފުށި ސިޓީގައި ކޮވިޑް-19 ފެތުރުމުގެ ނުރައްކާ ބޮޑުވެފައިވާތީ އެ ސިޓީގެ ކޮވިޑް-19 ޓާސްކު ފޯހުން ކާފިއުގެ މުއްދަތު އަނެއްކާވެސް 9 ދުވަހަށް އިތުރުކޮށްފި އެވެ.
ކުޅުދުއްފުށި ސިޓީގައި ފުރަތަމަ ކާފިއު ހިންގީ އޭޕްރީލް މަހުގެ 21 ވަނަ ދުވަހުއެވެ. އެ މުއްދަތު ދެވަނަ ފަރަހަށް އިތުރުކުރީ 1 މެއިގެ މެންދުރު 12:00 އިގެ ނިޔަލަށެވެ. އަދި ތިން ވަނަ ފަހަރަށް 7 ދުވަސް އިތުރު ކޮށްފައިވާއިރު، ކާފިއުގެ މުއްދަތު ބުރާސްފަތި ދުވަހަސް ވަނީ ހަމަވެފަ އެވެ. ނަމަވެސް އިތުރު 9 ދުވަހަށް ކާފިއު އިތުރުކޮށްފައި ވެއެވެ.
ކުޅުދުއްފުށި ސިޓީ ކައުންސިލުން ބުނީ އެ ސަރަހައްދުގެ ބައެއް ރަށްތަކުން ބައްޔަށް ޕޮޒިޓިވްވެފައިވާ މީހުން ފެނިފައިވާ މި ދަނޑިވަޅުގައި ވެސް ކުޅުދުއްފުއްޓަށް ޒަރޫރީ ބޭނުންތައް ފުރިހަމަ ކުރުމަށް ގިނަ އަދަދެއްގެ މީހުން ދަތުރު ކުރަން ޖެހިފައިވާތީ، ބަލިން ރައްކާތެރިވުމަށް އަޅާ ފިޔަވަޅެއްގެ ގޮތުން ކުޅުދުއްފުށީގައި މެންދުރު ފަހު 3:30 އިން ހެނދުނު 6:00 އަށް ހިންގާފައިވާ ކާފިއުގެ މުއްދަތު 23 މެއި 2020 ގެ ރޭގަނޑު 12:00 އާއި ހަމައަށް އިތުރުކުރަން ކުޅުދުއްފުށި ކޮވިޑް-19 ޓާސްކް ފޯސްއިން ނިންމާފައިވާ ކަމަށެވެ.
ކުޅުދުއްފުށި ސިޓީ ކައުންސިލުގެ ކާފިއު ހިންގަނީ ހެލްތު ޕްރޮޓެކްޝަން އެޖެންސީގެ އެންގުމުގެގައި ލޯކަލް ކައުންސިލްގެ އިޙްތިޞާޞް ހިނގާ ޞަރަޙައްދުތަކުގައި ކޮވިޑް-19 ފެތުރުމުގެ ފުރުޞަތު އޮތް މިންވަރަށާއި، ޙާލަތަށް ރިޢާޔަތްކޮށް، އެއްވެ އުޅުން ހުއްޓުވުމަށާއި އިޖްތިމާޢީ ގައިދުރުކަން ޤާއިމު ކުރުމަށް ފިޔަވަޅު އެޅުމަށް ޑިރެކްޓަރ ޖެނެރަލް އޮފް ޕަބްލިކް ހެލްތު ދެއްވާފައިވާ ބާރުގެ ދަށުންނެވެ.
ކުޅުދުއްފުށީގައި ކާފިއު އިޢުލާންކޮށްފައިވާ ވަގުތު ތަކުގައި ހުއްދަ ނެތި ބޭރަށް ނުކުމެ އުޅުމަކީ މަނާ ކަމެކެވެ. ކާފިއު ވަގުތު ތަކުގައި އެއްވެސް ވިޔަފާރިއެއް އާންމުންނަށް ހުޅުވައިގެން ޚިދުމަތް ދިނުމަކީ ވެސް މަނާ ކަމެކެވެ. ކާފިއު ނޫން ގަޑިތަކުގައި ވިޔަފާރިތަކުން އާންމުންނަށް ޚިދުމަތް ދިނުމަށް އިޖްތިމާއި ގައިދުރުކަން ކަށަވަރު ކުރެވޭ ފަދަ ގޮތަކަށް އެ އިދާރާއިން ދޭ އިރުޝާދާ އެއްގޮތަށް ނިޒާމެއް ރޭވުމަށް ވަނީ އަންގާފަ އެވެ.
އަދި މި ނޫން ގޮތަކަށް އާންމުންނަށް ޙިދުމަތް ދިނުމަކީ މަނާކަމެއްކަމެއް ކަމަށާއި، އެންގުމާއި ހިލާފްވާ ފަރާތްތަކާއި މެދު ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 143 މާއްދާއާއި ހަވާލާދީ ކައުންސިލުން ކުރާ އަމުރަށް ނުކިޔަމަންތެރިވާ ފަރާތްތަކާއި މެދު އަދަބެއްގެ ގޮތުގައި މައްސަލައިގެ ކުޑަ ބޮޑުމިނަށް ބަލައި 500 ރުފިޔައާއި 5000 ރުފިޔާއާ ދެމެދުގެ ޢަދަދުކަން ޖޫރިމަނާ ކުރާނެ ކަަމަށް ކުޅުދުއްފުށި ސިޓީ ކައުންސިލުން ވަނީ ބުނެފަ އެވެ.
