ކޮވިޑް-19އާ ގުޅިގެން ރާއްޖޭގައި ކުރެވޭ މަސައްކަތްތަކާ ބެހޭ މައުލޫމާތު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)އާ ހިއްސާކޮށްފިއެވެ.

ޑަބްލިއުއެޗްއޯއިން ކޮންމެ ހަފްތާއަކު ބާއްވާ ވާޗުއަލް މައުލޫމާތު ހިއްސާކުރުމުގެ ސެޝަންގައި ރާއްޖެއިން ބައިވެރިވީ ބުދަ ދުވަހެވެ. މިސެޝަންގައި ރާއްޖޭގެ ފަރާތުން ބައިވެރިވެ ވަޑައިގަންނަވާ މައުލޫމާތު ހިއްސާކުރެއްވީ ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ މެޑިކަލް އޮފިސަރު ޑރ. ނަޒްލާ ރަފީގެވެ.

މިސެޝަންގައި ރާއްޖޭގެ ފަރާތުން ވަނީ ކޮވިޑް-19އާ ގުޅިގެން ތައްޔާރުކޮށްފައިވާ ކޮންޕްރެހެންސިވް ރެންސްޕޮންސްއާ ބެހޭ މައުލޫމާތު ޑަބްލިއުއެޗްއޯގެ ޑިރެކްޓަރ ޖެނަރަލް ޑރ. ޓްޑްރޯސް އެދެނޯމް ގެބްރިއޭސަސްއާ ހިއްސާ ކުރައްވާފައިވެއެވެ.

ރާއްޖޭގައި ކޮވިޑް-19 ފެތުރެމުންދާއިރު، އަމަލު ކުރަމުންދަނީ ޑަބްލިއުއެޗްއޯގެ މިންގަނޑުގެ ތެރެއިންނެވެ.

ދުނިޔޭގެ އެކި ޤައުމުތަކުން ކޮވިޑް-19އަށް ޕޮޒިޓިވްވެގެން ދުވާލަކު އެވްރެޖްކޮށް 80،000 (އަށްޑިހަ ހާސް) ކޭސް ރިޕޯޓުކުރާ ކަމަށް ޑަބްލިއުއެޗްއޯއިން ބުނެފައިއެވެ.

ވައިރަސް ފެތުރެމުންދާ ގައުމުތަކުގެ ހާލަތު ވަރަށް ގާތުން ޑަބްލިއުއެޗްއޯއިން ބަލަމުންދާއިރު، ޞިއްހީ ޚިދުމަތް ދޭ ތަންތަނާއި، ދައުލަތްތަކުގެ ބެލުމުގެ ދަށުގައި މީހުން ބައިިތިއްބާ މަރުކަޒުތަކުގައި ވައިރަސް ފެތުރެން ހުރި ހިރާސްތައް ކުޑަކޮށް ސްކޫލްތަކާއި، ޢާންމު ތަންތަނާއި، މަސައްކަތުގެ މާޙައުލުގައި ރާއްކާތެރިކަމުގެ ފިޔަވަޅުތައް އެޅުމަށް ވެސް ވަނީ އިލްތިމާސް ކޮށްފައިވެއެވެ.