ރޮނާލްޑީނިއޯ ހުރީ މައްސަލަ ނިމި، އެނބުރި އުފަން ގައުމު ކަމަށްވާ ބްރެޒިލަށް ދިޔުމުގެ އުންމީދުގައި ކަމަށް އޭނާގެ ވަކީލުން ބުނެފި އެވެ.

މާޗު މަހުގެ ހަތަރުވަނަ ދުވަހު ޕެރެގުއޭ އިން ރޮނާލްޑީނިއޯ އާއި އޭނާގެ ބޭބެ ރޮބާޓޯ އަސިސް ހައްޔަރުކުރީ ފޭކް ޕާސްޕޯޓަކާއިއެކު އެގައުމަށް އެތެރެވާން އުޅުމުންނެވެ. ޖަލުގައި ރޮނާލްޑީނިއޯ 32 ދުވަސް ހޭދަކުރިއިރު، ކަފާލާތުގެ ދަށުން ދެބެން ޖަލު ބަންދުން ވަނީ ދޫކޮށްލާފައެވެ. އަދި މައްސަލަ ނިމެންދެން ތިބެން ޖެހޭނީ ގޭ ބަންދުގައެވެ. ރިޕޯޓުތައް ބުނާ ގޮތުން ރޮނާލްޑީނިއޯ އާއި އޭނާގެ ބޭބެ ގޭ ބަންދުކޮށްފައިވަނީ ޕެރެގުއޭގެ ހޮޓަލެއްގައެވެ.

ކަފާލާތުގެ ދަށުން ރޮނާލްޑީނިއޯ އާއި އޭނާގެ ބޭބެ ދޫކޮށްލަން ކޯޓުން ނިންމީ ޖޫރިމަނާގެ ގޮތުގައި 1.6 މިލިއަން ޑޮލަރު ދިނުމަށް ރޮނާލްޑީނިއޯ ހުށަހެޅުމުންނެވެ.

ރޮނާލްޑީނިއޯ ހައްޔަރުކުރިތާ ދެ މަހަށްވުރެ ގިނަ ދުވަސް ވެފައިވާއިރު، ދާދި ފަހުން އޭއެފްޕީ އަށް ދިން އިންޓަވިއުއެއްގައި ރޮނާލްޑީނިއޯގެ ވަކީލަކު ބުނީ މައްސަލަ ނިމި، އެނބުރި ގައުމަށް ދާން ރޮނާލްޑީނިއޯ ހުރީ ކެތްމަދުވެފައި ކަމަށެވެ. އެކަމަކު މައްސަލަ ނިމެންދެން އެއްވެސް ކަމެއް ނުކުރެވޭނެ ކަމަށާއި، ތަހުގީގަށް ރޮނާލްޑީނިއޯ ފުރިހަމަ އަށް އެއްބާރުލުން ދެމުން އަންނަ ކަމަށްވެސް ވަނީ ބުނެފައެވެ.

މީގެ ކުރިން ރޮނާލްޑީނިއޯ ބުނީ ބުނީ ޕެރެގުއޭ އިން ހައްޔަރުކުރުމުން ހައިރާންވި ކަމަށެވެ. އަދި އޭނާ އަށް ދީފައިވާ ޕާސްޕޯޓަކީ ފޭކް ޕާސްޕޯޓެއްކަން ނޭނގޭ ކަމަށްވެސް ވަނީ ބުނެފައެވެ.

ރިޕޯޓުތައް ބުނާ ގޮތުގައި ރޮނާލްޑީނިއޯގެ ބްރެޒިލް ޕާސްޕޯޓް 2018 ވަނަ އަހަރުގެ ނޮވެމްބަރު މަހު އެ ގައުމުން އޮތީ އަތުލާފައެވެ. އެއީ ޕޯޓޯ އެލެގްރޭގައި އިމާރާތެއް ހެދުމުގައި ތިމާވެށްޓަށް ގެއްލުން ލިބިފައިވާތީ އޭނާ އަށް ދިން 2.5 މިލިއަން ޑޮލަރުގެ ޖޫރިމަނާ ދައްކާފައިނުވާތީވެ އެވެ.

ޖަލުގައި ހުރި ދުވަސްތަކުގައި ރޮނާލްޑީނިއޯ ވަނީ ޕެރެގުއޭ ޖަލުގައި ބޭއްވި ފުޓްސަލް މުބާރާތުގައި ބައިވެރިވެ އޭނާގެ ޓީމަށް ޗެމްޕިއަންކަން ހޯދައިދީފައެވެ. އެ މެޗުން އޭނާގެ ޓީމު 2-11 ގެ ނަތީޖާއަކުން މޮޅުވިއިރު، ރޮނާލްޑީނިއޯ ވަނީ އެމެޗުގައި ކުޅެން އަރާ 5 ލަނޑު އެޓީމަށް ކާމިޔާބުކޮށް 6 ލަނޑު ޖެހުމަށް އެހީތެރިވެދީފައެވެ.