ފަރުވާ ނުދެވި ހުއްޓާ އއ. ތޮއްޑޫގައި މާބަނޑު މީހެއްގެ ބަނޑަށް ދަރިފުޅު މަރުވެއްޖެއެވެ.

ކަމާބެހޭ އިދާރާތަކަށް ފަރުވާ ނުދެވި ހުއްޓާ ތޮއްޑޫގައި މާބަނޑު މީހެއްގެ ބަނޑަށް ދަރިފުޅު މަރުވެފައިވާ މައްސަލައެއް ބުރާސްފަތި ދުވަހު ވަނީ ފެންމަތި ވެފައެވެ. ސޯޝަލް މީޑިއާގައި ދައުރުވަމުންދާ ގޮތުގައި މާބަނޑު މީހަކަށް ތޮއްޑޫ ޞިއްޙީ މަރުކަޒުން ޚިދުމަތް ނުދެވި، ރަސްދޫ ހޮސްޕިޓަލަށް ގެންދަން ހުއްދަ ނުލިބުމުގެ ސަބަބުން އޭނާގެ ބަނޑަށް ދަރިފުޅު މަރުވެފައިވާކަމަށެވެ.

މައުލޫމާތު ލިބިފައިވާގޮތުގައި އެމީހާ ޞިއްޙީ މަރުކަޒަަށް ގެންދިޔައީ ބުދަ ދުވަހުގެ ވަގުތެއްގައި ކުއްލިއަކަށް ބަނޑަށް ތަދުވާން ފެށުމުންނެވެ. އެހެންނަމަވެސް، އޭނާ ވިއްސާނެ އެއްވެސް ވަޞީލަތެއް އެ މަރުކަޒުގައި ނެތް ކަމަށް ޚަބަރު ލިބެއެވެ.

'ރާއްޖެއެމްވީ' އިން އެރަށު ހެލްތު އޮފިސަރަކާއި ގުޅާލުމުން މިކަމާއި ބެހޭ ގޮތުން އެއްވެސް މަޢުލޫމާތެއް ނުދެއްވިއެވެ.

މިކަމާއި ގުޅިގެން ރަށު ކައުންސިލާއި ގުޅާލުމުން ބުނީ އެމީހާއަށް ދަތުރުކުރުމުގެ ހުއްދަ ކައުންސިލުން ދިން ކަމަށެވެ. އެހެން ނަމަވެސް، ރަސްދޫގައި ހުންނަ އއ. އަތޮޅު ހޮސްޕިޓަލުން ޚިދުމަތް ދެވެން ނެތް ވާހަކަ ބުނި ކަމަށެވެ.

'ރާއްޖެއެމްވީ' އިން އަތޮޅު ހޮސްޕިޓަލާއި ގުޅާލުމުން ބުނީ އެމީހާ އަކީ 'ހައި ރިސްކު' ޕޭޝަންޓެއް ކަމަށެވެ. އެއީ ދުވަސް ނުފުރާ ވިހާ މީހެއް ކަމަށްވުމާއެކު، ކުއްޖާ ވިހެއުމަށް ފަހު ކުއްޖާއަށް ފަރުވާދެވޭނެ ނަރސަރީ އެއް ނެތް ކަމަށެވެ. ހޮސްޕިޓަލުގެ ޙާލަތު ހުރިގޮތުންނާއި، ބަލި މީހާގެ ހާލަތަށް ރިޢާޔަށް ކޮށް، ހޮސްޕިޓަލުން ޚިދުމަތް ނުދެވޭނެ ކަމަށް އެންގި ކަމަށް ބުންޏެވެ.

ސޯޝަލް މީޑިއާގައި ދައުރުވަމުންދާ ޕޯސްޓަށް އެ ދާއިރާގެ މެންބަރު އަހުމަދު ޝިޔާން ވެސް ވަނީ ކޮމެންޓު ކުރައްވާފައެވެ. އޭނާ ވިދާޅުވީ އެ މަޢުލޫމާތު ލިބުނު ހިސާބުން ފެށިގެން އެ މައްސަލަ މިނިސްޓްރީގެ ސަމާލުކަމަށް ގެނެސް، ނައިބު ރައީސް ފައިސަލް ނަސީމުގެ ބެއްލެވުމުގެ ދަށުން އެކަން ތަޙުޤީޤު ކުރަމުންދާ ކަމަށެވެ. އަދި މިކަން ތަކުރާރުވިޔަ ނުދިނުމަށް ޙައްލު ކުރަން ޖެހޭ ކަންކަން ޙައްލު ކުރަމުން އަންނަ ކަމަށެވެ.

އއ. ތޮއްޑޫ ޞިއްޙީ މަރުކަޒު ސައުވީސް ގަޑިއިރު ޚިދުމަތްދޭ ތަނަކަށް ބަދަލު ކުރީ 2016 ވަނަ އަހަރުގެ ޑިސެންބަރު މަހުގެ ތެރޭގައެވެ. ޞިއްޙީ މަރުކަޒުގައި އެންމެ ވޯޑެއް ހުރި އިރު، އެތާނގައި ހުރީ އެންމެ 4 އެނދެވެ. ކުޑަކުއްޖަކު ބަލިވިޔަސް، މުސްކުޅި މީހަކު އެޑްމިޓްކޮށްގެން ފަރުވާ ދޭން ބޭނުން ވިޔަސް އެންމެން ތިބެންޖެހެނީ އެއް ވަރޑެއްގައެވެ. އަދި އެމަރުކަޒުގައި ހުރީ ޢާންމު ބަލިތަކަށް ފަރުވާދޭ ޑޮކްޓަރެކެވެ.

އަތޮޅު ހޮސްޕިޓަލާއި އަތޮޅުގެ އެންމެ އާބާދީ ބޮޑު ކުރިއަރަމުން އަންނަ ތޮއްޑޫގެ ޞިއްޙީ މަރުކަޒުގެ ޙާލަތު ރަނގަޅުވާން ޖެހޭ ކަމަށް ގިނަ ބަޔަކު ބުނަމުން ދާއިރު ޚިދުމަތް 24 ގަޑިއިރަށް ބަދަލު ކުރުމުން ނުފުދޭ ކަމަށްވެސް އެފަރާތްތަކުން ބުނެއެވެ. ވަޞީލަތްތަކާއެކު އެކަށީގެންވާ ފަރުވާ ލިބެންޖެހޭ ކަމަށް ވެސް ބުނެއެވެ.