ކޮވިޑުގެ ބޭނުމަށް ޤާއިމު ކުރަމުންދާ ފެސިލިޓީސްތަކުގެ ބޮޑުބައި ނިމިއްޖެ

ކޮވިޑް-19 ބަލިމަޑުކަމާއި ގުޅިގެން މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ ގެ ދަށުން 7 މަޝްރޫޢެއް ހިންގަމުންދާ ކަމަށް އެ މިނިސްޓްރީން ބުނެފިއެވެ.

ބުރާސްފަތި ދުވަހު ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމެޓީގެ ބައްދަލުވުމަށް ޕްލޭނިންގ މިނިސްޓަރ މުހައްމަދު އަސްލަމާއި، ސްޓޭޓް މިނިސްޓަރ އަކްރަމް ކަމާލުއްދީނާއި، އެމިނިސްޓްރީގެ ބައެއް އިސްވެރިން ބައިވެރިވެޑައިގެން، އެ މިނިސްޓްރީން މިހާރު ހިންގަމުންދާ މަޝްރޫޢުތަކުގެ މަސައްކަތްތަކުގެ ތަފުސީލުތައް ވަނީ ހިއްސާ ކުރައްވާފަ އެވެ.

Advertisement

އެ މިނިސްޓްރީން ހާމަކޮށްފައިވާގޮތުގައި، ކޮވިޑް-19 އާގުޅިގެން ބައެއް ރަށްތަކުގައި މަޝްރޫއުތަކެއް ދަނީ ހިންގަމުންނެވެ. އެގޮތުން، 7 ރަށެއްގައި ޤާއިމު ކުރާ ފެސިލިޓީތަކުގެ ތަފުޞީލުތައް ކޮމެޓީއާ ހިއްސާ ކުރެއްވިއެވެ.

މީގެ ތެެރެއިން، ހއ. އިހަވަންދޫ ކޮވިޑް ހެލްތު ފެސިލިޓީގެ މަސައްކަތާއި ފުވައްމުލައް ސިޓީގެ ކޮވިޑް ހެލްތު ފެސިލިޓީގެ މަސައްކަތް އެއްކޮށް ނިމިފައިވާ ކަމަށް ޕްލޭންނިން މިނިސްޓްރީގެ ބޭފުޅުން މައުލޫމާތު ދެއްވާފައި ވެއެވެ.

މީގެއިތުރުން، ށ. ފުނަދޫ ކޮވިޑް ހެލްތު ފެސިލިޓީއާއި ކަރަންޓީން އަދި އައިސޮލޭޝަން ފެސިލިޓީގެ މަސައްކަތުގެ %65 މަސައްކަތް ނިމިފައިވާ ކަމަށާއި، ބ. އޭދަފުށި ކޮވިޑް ހެލްތު ފެސިލިޓީއާއި ކަރަންޓީން އަދި އައިސޮލޭޝަން ފެސިލިޓީގެ %69 މަސައްކަތް ނިމިފައިވާ ކަމަށް ޕްލޭނިންގ މިނިސްޓްރީން ހާމަކޮށްފައި ވެއެވެ.

ލ. ގަން ކޮވިޑް ހެލްތު ފެސިލިޓީއާއި ކަރަންޓީން އަދި އައިސޮލޭޝަން ފެސިލިޓީގެ %79 ނިމިފައި ވާއިރު، ގއ. ވިލިނގިލި ކޮވިޑް ހެލްތު ފެސިލިޓީއާއި ކަރަންޓީން އަދި އައިސޮލޭޝަން ފެސިލިޓީގެ %91 މަސައްކަތް ނިމި، އަދި އައްޑޫ ސިޓީ ހިތަދޫ ހެލްތު ފެސިލިޓީގެ %94 މަސައްކަތް ނިމިފައިވާ ކަމަށް ވެސް ޕްލޭނިންގ މިނިސްޓްރީން ހާމަކޮށްފައި ވެއެވެ.

ރާއްޖޭގެ ރަށްތަކުގައި ކަރަންޓީން ފެސިލިޓީތައް ހެދުމުގެ މަސައްކަތް ކުރަމުންދާއިރު، ރަށަށް ނުދެވި މާލޭގައި 5،000 އެއްހާ މީހުން ތާށިވެފައިވާ ކަމަށް ކަމާބެހޭ އިދާރާތަކުން ދަނީ ހާމަކުރަމުން ނެވެ.

ކޮވިޑް-19 ރޯގާއާ ގުޅިގެން ކުރިއަށްމިއޮތް 14 ދުވަހަކީ ރޯގާގެ އަލާމަތްތައް ފެންނަ މީހުން އިތުރުވެ، ކޮވިޑް-19 އަށް ޕޮޒިޓިވްވާ މީހުން އިތުރުވެގެން ހިނގައިދާނެ ދުވަސްތަކެއް ކަމަށް ނޭޝަނަލް އިމަޖެންސީ އޮޕަރޭޝަން ސެންޓަރުން ވަނީ މަޢުލޫމާތު ދީފަ އެވެ. އެހެންކަމުން ކޮވިޑް-19 އިތުރަށް ފެތުރުނަ ނުދިނުމަށްޓަކައި އަޅަފައިވާ ފިޔަވަޅުތައް ހަރުދަނާކޮށް، އިތުރު ފިޔަވަޅުތައް ވެސް ދަނީ އަޅަމުންނެވެ.

ރާއްޖޭގައި މިހާތަނަށް 968 މީހަކު ކޮވިޑް-19 އަށް ޕޮޒިޓިވް ވެފައިވެއެވެ.