ފުލުހުން ތަހުގީގު ކުރަމުންދާ މައްސަލައަކާ ގުޅިގެން ވެލެޒިނީ ހޯދަން އިއުލާން ކޮށްފި

ފުލުހުން ތަހުގީގު ކުރަމުންދާ މައްސަލައަކާ ގުޅިގެން ޖުޑިޝަލް ސާވިސް ކޮމިޝަންގެ ކުރީގެ މެންބަރު އާއިޝަތު ވެލެޒިނީ ހޯދުމަށް އިއުލާންކޮށްފި އެވެ.

އަންގާރަ ދުވަހު ފުލުހުން ނެރެފައިވާ ބަޔާނެއްގައި ބުނެފައިވަނީ މއ. ޝިމާޤް، އާއިޝަތު ވެލެޒިނީ ރާއްޖެއިން ބޭރުގައި އުޅެމުންދާތީ، ފުލުހުންގެ ތަހުގީގަށް ހާޒިރުކުރެވިފައިނުވާ ކަމަށެވެ. ވެލެޒިނީ ހޯދަމުންދަނީ އޭނާގެ މައްޗަށް ތުހުމަތުކުރެވޭ މައްސަލައަކާ ގުޅިގެން ތަހުގީގުން ކުރަންޖެހޭ ސުވާލުތައް ކުރުމަށާއި ވެލެޒިނީގެ މައްޗަށް ކުރެވޭ ތުހުމަތުތަކަށް ޖަވާބުދާރީވެ، ދިފާއުގައި ވާހަކަ ދެއްކުމުގެ ފުރުސަތު ދިނުމުގެ ގޮތުން ކަމަށް ފުލުހުން ބުނެއެވެ.

އެގޮތުން ވެލެޒިނީ ކުރިއަށްއޮތް 14 ދުވަހުގެ ތެރޭގައި ފުލުހުންގެ އިދާރާއަށް ހަޒިރުވުމަށް އަންގާ ކަމަށް ވެސް އެބާޔާނުގައި ވެއެވެ.

ފުލުހުން ބުނީ 14 ދުވަހުގެ ތެރޭގައި ވެލެޒިނީ ފުލުހުންގެ އިދާރާއަށް ހާޒިރު ނުވެއްޖެ ނަމަ، ތަހުމަތުކުރެވޭ މައްސަލާގައި ފުލުހުންނަށް ލިބިފައިވާ ހެއްކާއި ގަރީނާތަކުގެ މައްޗަށް ބިނާކޮށް، ވެލެޒިނީގެ ޣައިރު ހާޒިރުގައި ތުހުމަތުކުރެވޭ މައްސަލާގައި ދައުވާކޮށްދިނުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާނެ ކަމަށެވެ.

ފުލުހުން ވެލެޒިނީ ހޯދަނީ ކޮން މައްސަލައަކާ ގުޅިގެންކަމަށް ހާމައެއް ނުކުރެ އެވެ.

ވެލެޒިނީ ފޭސްބުކް ޕޭޖްގައި ޕޯސްޓްކުރި ވީޑިއޯތަކުގައި އިސްލާމްދީނާ ހިލާފު ބައެއް ވާހަކަތައް ދައްކާފައިވާއިރު ރަސޫލާކަމަށް ދައުވާކޮށްފައިވާ ވީޑިއޯއެއް ވެސް ވަނީ ޕޯސްޓް ކޮށްފަ އެވެ.

އެ ވީޑިއޯތަކާއި ގުޅިގެން އިސްލާމިކް މިނިސްޓްރީން ވަނީ ވެލެޒިނީއަކީ މުރުތައްދުވެފައިވާ މީހެއް ކަމަށް އިއުލާން ކޮށްފަ އެވެ.

ވެލެޒިނީ މި ވަގުތު ދިރިއުޅެމުން ގެންދަނީ ނެދަލޭންޑްސްގައެވެ. އިސްލާމް ދީނާ ގުޅޭ ވާހަކަތައް ޕޯސްޓްކުރުމުގެ ކުރިން ވެލެޒިނީ ގެންދިޔައީ ރާއްޖޭގެ ޝަރުއީ ދާއިރާގެ މައްސަލަތަކުގައި ވަރަށް ބޮޑަށް ވަކާލާތުކުރަމުންނެވެ. އަދި ކޯޓުތަކަށް ފަނޑިޔާރުން އައްޔަންކުރެވިގެން ދިޔަ ގޮތާއި ޝަރުއީ ދާއިރާގެ މައްސަލަ ދަ ހޭގުގައި ހުންނަ ބައިނަލްއަގުވާމީ ކޯޓަށް ހުށަހެޅުމަށް މަސައްކަތްތަކެއް ކޮށްފައި ވެއެވެ.