ނުކުޅެދުންތެރިކަން ހުންނަ ފަރާތްތަކުން އެހީތެރިކަން ބޭނުންވާ ނަމަ އެންސްޕާއަށް ގުޅުމަށް އެދިއްޖެ
14 މެއި 2020 | ބުރާސްފަތި 09:29އެފަދަ ފަރާތްތަކުގެ ދިރިއުޅުމުގެ ހާލަތު ވަރަށް ގާތުން ބަލަމުންދޭ
ނުކުޅެދުންތެރިކަން ހުންނަ މީހުންނަށް ވަޒީފާދިން ކަމުގެ ލިޔުން ހަވާލުކުރުމަށް މީގެ ކުރިން ދަރުބާރު ގޭގައި ބޭއްވި ރައްމިއްޔާތެއްގެ ތެރެއިން
ނުކުޅެދުންތެރިކަން ހުންނަ ފަރާތްތަކުން އެހީއެއް ބޭނުންވާ ނަމަ ނޭޝަނަލް ސޯޝަލް ޕްރޮޓެކްޝަން އޮތޯރިޓީ (އެންސްޕާ) ށް ގުޅުމަށް އެދިއްޖެއެވެ.
މާލެސިޓީ އޭފްރީލް މަހު 15 ގައި ލޮކްޑައުން ކުރުމާއި ގުޅިގެން މާލެ ސިޓީގައި ދިރިއުޅޭ މިފަދަ ފަރާތްތަކުގެ ދިރިއުޅުމުގެ ހާލަތު މިނިސްޓްރީ އޮފް ޖެންޑަރ ފެމެލީ އެންޑް ސޯޝަލް ސަރވިސަސް އިން ގެންދަނީ ވަރަށް ގާތުން ބަލަމުންނެވެ.
މިހާލަތުގައި އެފަރާތްތަކަށް އިތުރަށް ދިރިއުޅުމުގެ ކަންކަން ހަމަޖެއްސުމަށް ދަތިވާނެތީ މިފަދަ އާއިލާތައް ބަލައި، ޑެލިވަރީގެ ޚިދުމަތްތައް ވެސް ޔޫތު މިނިސްޓްރީއާ ގުޅިގެން ޖެންޑަރ މިނިސްޓްރީން ދަނީ ކުރަމުންނެވެ.
ޖެންޑަރ މިނިސްޓްރީން ބުނީ ކޮވިޑް-19ގެ މިދަނޑިވަޅުގައި ނުކުޅެދުންތެރިކަން ހުންނަ ފަރާތަކުން އެހީތެރިކަމެއް ބޭނުންވާ ނަމަ އެންސްޕާ އަށް ގުޅުމަށް އެދޭ ކަމަށެވެ. ހޮޓްލައިން ނަންބަރު 1402 ށް ގުޅުމަށް މިނިސްޓްރީން އެދިފައިވެއެވެ. އަދި އެފަދަ ފަރާތަކުން އެހީތެރިކަމަށް އެދުމާއެކު ވީ އެންމެ އަވަހަކަށް އެކަމަކަށް 'އެޓެންޑް' ވާނެ ކަމަށް ޖެންޑަރ މިނިސްޓްރީން ބުނެއެވެ.
ނުކުޅެދުންތެރިކަން ހުންނަ ފަރާތްތަކުން އެހީތެރިކަން ބޭނުންވާ ނަމަ އެންސްޕާ އަށް ގުޅުމަށް އެދިފައިވާއިރު، ޖެންޑަރ މިނިސްޓްރީން ވަނީ ގެތަކުގައި ދާނުގައި ތިބި އުމުރުން ދުވަސްވީ މީހުންގެ ތެރެއިން 101 މީހެއްގެ ހާލު ބަލާފައެވެ. ޖެންޑަރ މިނިސްޓްރީން ބުނީ މާލެ ސިޓީ ލޮކްޑައުން ކޮށްފައިވާ މިދަނޑިވަޅުގައި ޚާއްސަ އެހީތެރިކަން ބޭނުންވާ ގެތަކުގެ ހާލަތު ވަރަށް ގާތުން މޮނިޓަރ ކުރަމުންދާ ކަމަށެވެ.
