އިންޑިއާ ރައްޔިތުން ބަލާ ރާއްޖެއައި މަނަވަރުން އެ ގައުމަށް ދިޔަ ދެ މީހަކު ކޮވިޑް-19 އަށް ޕޮޒިޓިވްވި ކަމަށް ރަސްމީ އެއްވެސް ފަރާތަކުން އަންގާފައިވާ ނުވާ ކަމަށް ސަރުކާރުން ބުނެފިއެވެ.
އިންޑިއާގެ ނޫހެއް ކަމަށްވާ ޓައިމްސް އޮފް އިންޑިއާގައި ރިޕޯޓުކޮށްފައިވާ ގޮތުން އިންޑިއާގެ މަނަވަރުގައި ދިޔަ ދެ މީހަކު ކޮވިޑް-19 އަށް ޕޮޒިޓިވް ވެފައި ވެއެވެ. އެ ދެ މީހުން ޕޮޒިޓިވްވީ މަނަވަރުން ދިޔަ އެންމެން ޓެސްޓު ކުރުމުގެ ތެރެއިންނެވެ. އެ ދެ މީހުންނަކީ ޓްރިޗީއަށް ނިސްބަތްވާ މީހުން ކަމަށްވެސް އެ ނޫހުން ރިޕޯޓު ކޮށްފައި ވެއެވެ.
އެކަމާއި ގުޅިގެން އެންއީއޯސީގައި ބުދަ ދުވަހުގެރޭ ބޭއްވި ޕްރެސްކޮންފަރެންސް ގައި ނޫސްވެރިޔަކު ސުވާލު ކުރުމުން މަބްރޫކް ވިދާޅުވީ، އަދި މިހާތަނަށް ރަސްމީކޮށް އެއްވެސް ފަރާތަކުން އެ މައުލޫމާތު ހިއްސާކޮށްފައި ނުވާ ކަމަށެވެ.
ރާއްޖޭގައި ތާށިވެފައި ތިބި އިންޑިއާގެ މީހުންގެ ތެރެއިން ގައުމަށް ދާން ބޭނުންވާ މީހުން ގެންދިޔުމުގެ މަސައްކަތް އިންޑިއާ ސަރުކާރުން ވަނީ ފަށާފައެވެ. އެ މީހުން އިންޑިއާ އަށް ގެންދަނީ އެ ގައުމުގެ އަސްކަރިއްޔާގެ މަނަވަރެއްގައެވެ. މަނަވަރުގައި ދާ އެންމެންވެސް ކޮޗިން ގައި 14 ދުވަހުގެ މުއްދަތަކަށް ކަރަންޓީން ވާން ޖެހެއެވެ.
