ކުރު މުއްދަތަކަށް މާލެ އައިސް ތިބި މީހުންގެ ތެރެއިން 333 މީހުން ކަރަންޓީން ކޮށްފައިވޭ
12 މެއި 2020 | އަންގާރަ 11:42ރިސޯޓު ކަރަންޓީންގައި 308 މީހަކު އެބަތިބި
މާލެސިޓީ ލޮކްޑައުން ކުރުމާއި ގުޅިގެން ގިނަ ބަޔަކު ތާށިވެފައިވޭ
މާލެސިޓީ ލޮކްޑައުން ކުރުމާއި ގުޅިގެން އެކި ބޭނުންތަކަށް މާލެއަށް އައިސް ތިބި ރަށްރަށުގެ މީހުންގެ ތެރެއިން ރަށްރަށް ދާން ބޭނުންވެގެން މިހާތަނަށް 333 މީހުން ކަރަންޓީން ކުރެވިފައިވާ ކަމަށް ލޯކަލް ގަވަންމަންޓް އޮތޯރިޓީ (އެލްޖީއޭ) ގެ ޑިރެކްޓަރ ޖެނެރަލް އާދަމް ޝަރީފް ވިދާޅުވެއްޖެ އެވެ.
ކޮވިޑް -19 އާ ގުޅޭ އެންމެ ފަހުގެ މަޢުލޫމާތު ހިއްސާކުރުމަށް އަންގާރަ ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޝަރީފް ވިދާޅުވީ މިހާތަނަށް ރިސޯޓު ފެސިލިޓީތަކަށް މެޑިކަލް ބޭނުމަށާއި، ރިސޯޓު ފުރަބަންދު ވެގެން ނުދެވި ތިބި ފަރާތްތަކާ އެކު 308 މީހަކު މިހާރު ރިސޯޓު ކަރަންޓީންގައި އެބަތިބި ކަމަށެވެ.
އޭގެ އިތުރުން ޞިއްޙީ އެކި ބޭނުންތަކަށް މާލެ އައި, ރިސޯޓު ކަރަންޓީނަށް ގެންދިއުން އެހާ ރައްކާތެރި ނޫން ބަލި މީހުންނާއި، ހޮސްޕިޓަލުން ދޫކޮށްލި ފަރާތްތަކުގެ ތެރެއިން 17 މީހަކު ހުޅުމާލޭގައި ވަކި ފެސިލިޓީއެއްގައި ކަރަންޓީން ކޮށްފައިވާ ކަމަށެވެ. އަދި 8 މީހަކު ކަރަންޓީނުން ދޫކޮށްލާފައި ވާކަމަށް ވެސް އޭނާ ވިދާޅުވިއެވެ.
ޝަރީފް ވިދާޅުވީ އެކަށީގެންވާ މިންގަނޑަށް ކަރަންޓީން ފެސިލިޓީތައް ގާއިމު ކުރެވޭ ވަރަކުން، މީހުން ކަރަންޓީން ފެސިލިޓީތަކަށް ގެންދިއުމުގެ މަސައްކަތް ކުރައްވާނެ ކަމަށެވެ.
