ސަރުކާރުގެ ކުންފުނިތަކުގެ ޚަރަދުތައް ކުޑަކުރުމަށް ލަފާ ދިނުމަށް، ރައްޔިތުންގެ މަޖިލީހުގެ ސްޓޭޓް އޯވންޑް އެންޓަރޕްރައިޒަސް (އެސްއޯއީ) ކޮމެޓީން ނިންމި ރިޕޯޓު ރައްޔިތުންގެ މަޖިލީހުން ފާސްކޮށްފި އެވެ.

އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި އެސްއޯއީ ކޮމެޓީގެ ރިޕޯޓު ފާސްކޮށްފައި ވަނީ 53 މެންބަރުންގެ އިއްތިފާޤުން ނެވެ.

މި ރިޕޯޓަކީ، ކޮވިޑް-19 ރޯގާ ފެތުރުނަ ނުދިނުމަށް ސަރުކާރުން އަޅާ ފިޔަވަޅުތަކުގެ ސަބަބުން ޢާއިލާތަކާއި، ވިޔަފާރިތަކުގެ ޢާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގުރާމު ތަންފީޒުކުރުމަށް މަޖިލީހުން ދެކޭގޮތް ކަނޑައެޅުމާ ގުޅޭގޮތުން، ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަދި މަޖިލީހުގެ މެޖޯރިޓީ ލީޑަރު ޢަލީ ޢާޒިމް، މި އަހަރުގެ މާރޗު މަހުގެ 30 ވަނަ ދުވަހު، ރައްޔިތުންގެ މަޖިލީހަށް ހުށަހަޅާފައިވާ މައްސަލައާ ގުޅިގެން އެސްއޯއީ ކޮމެޓީން ތައްޔާރުކުރި ރިޕޯޓެކެވެ.

އެސްއޯއީ ކޮމެޓީން ވަނީ ސަރުކާރު ހިއްސާވާ ކުއްފުނިތަކާއި އަދި ކަމާބެހޭ ބައެއް އިދާރާތަކުގެ މައުލޫމާތު އެއްކުރައްވާފަ އެވެ. އަދި ކޮމެޓީން ދިރާސާކޮށް ނިންމިގޮތުގެ ރިޕޯޓުގައި 20 ހުށަހެޅުމެއް ހުށަހަޅާފައި ވެއެވެ.

ކޮމެޓީގެ އެ ހުށަހެޅުންތަކުގެ އަމާޒަކީ، ކޮވިޑް-19 އާގުޅިގެން، ފިނޭންސް މިނިސްޓްރީން ސަރުކާރުގެ ކުންފުނިތަކުގެ ޚަރަދު ކުޑަކުރުމަށް އަންގާފައި ވުމާއެކު، ސަރުކާރުގެ ކުންފުނިތަކުން އަޅަމުންދާ ގެންދާ ފިޔަވަޅުތައް ހަރުދަނާ ކުރުން ކަމަށެވެ.

ކޯޕަރޭޓް އުސޫލުން ބައެއް ޚިދުމަތްތައް ދިނުމުގެ މަޤްޞަދުގައި ސަރުކާރުން އެފެއްދެވި ގިނަ ކުންފުނިތަކަކީ އެތަންތަނުގެ އޮޕަރޭޝަނަލް ހިންގުމާއި، "ގޮއިންގ ކޮންސާރން" އެއްގެގޮތުގައި ދެމިއޮތުމުން ދައުލަތުގެ ބަޖެޓުގެ މައްޗަށް ބަރޯސާވެގެން ހިންގާ ކުންފުނިތަކެއް ކަމަށްވާތީ، އެފަދަ ހާލެއްގައިވާ ކުންފުނިތަކާ މެދު ރަނގަޅު ފިޔަވަޅުތަކެއް އެޅުމަށްވެސް ކޮމެޓީން ލަފާ ދީފައި ވެއެވެ.

މީގެ އިތުރުން، ސަރުކާރުން ހިންގާ ގިނަ ކުންފުނިތަކުން ސަރުކާރަށް ފައިދާ ނުލިބި، އެ ކުންފުނިތަކަކީ ދައުލަތުގެ މާލިއްޔާއަށް ބުރައަކަށް ވެފައިވާ ކުންފުނިތަކެއް ކަމަށް ފެންނާތީ، އެކުންފުނިތަކަށް ކެޕިޓަލް ދޫކުރުމުގެ ހަރުދަނާ އުސޫލުތަކެއް ކަނޑައަޅައި، ދުރު ރާސްތާއެއްގައި އެ ކުންފުނިތަކުން އެކަށީގެންވާ ފައިދާއެއް ލިބޭނެ ގޮތަކަށް، އެ ކުންފުނިތައް ހިންގާ މޮޑެލް ބަދަލު ކުރެވޭނެ ގޮތްތަކެއް ހޯދުމާއެކު، ކުންފުނިތަކުގެ ހިންގުން ހަރުދަނާ ކުރުމަށްވެސް އެސްއޯއީ ކޮމެޓީން ސަރުކާރަށް ލަފާދީފައިވާ ރިޕޯޓުގައި ވެއެވެ.