ކޮވިޑް-19 އާއި ގުޅިގެން އަވައްޓެރި އިންޑިއާގައި ތާށިވެފައި ތިބި 185 ދިވެހިން ރާއްޖެ ގެނެސްފި އެވެ.

އިންޑިއާގައި ތިބި ދިވެހިން ރާއްޖެ ގެނައުމަށް ކުރަމުންދާ މަސައްކަތުގެ ދަށުން ދެ ފްލައިޓެއްގައި, ޖުމްލަ 235 މީހުންވަނީ މާލެ ގެނެސްފައެވެ. ފުރަތަމަ ފްލައިޓްގައި ގެނެސްފައިވަނީ 50 ދިވެހިންނެވެ. މީގެ ތެރޭގައި އިންޑިއާގެ 9 ސަރަހައްދެއްގައި މީހުން ގެނައުމުގެ މަސައްކަތް ސަރުކާރުން ވަނީ ފަށާފަ އެވެ.

އިންޑިއާގައި ތިބި ދިވެހިންގެ ތެރެއިން މިފަހަރު އިސްކަންދިނީ ކުރު މުއްދަތެއްގެ ވިސާގައި ގޮސް ތިބި ފަރާތްތަކަށާއި، ބޭސްފަރުވާއަށް ގޮސް ތިބި ފަރާތްތަކުގެ އިތުރުން، ލޮކްޑައުންގެ ސަބަބުން ބޭސްފަރުވާ ހުއްޓިފައިވާ ފަރާތްތަކާއި، އިންޑިއާގެ ދުރު ހިސާބުތަކުގައި ދިރިއުޅެމުންދާ ދިވެހިންނަށް ކަމަށް ފޮރިން މިނިސްޓްރީން ވަނީ ބުނެފައެވެ.

ލޮކްޑައުންގެ ޙާލަތުގައި ރާއްޖެއިން އެއްތަނުން އަނެއްތަނަށް ފުރުމުގައި ގޮންޖެހުންތައް ހުރިހެން މި މަސައްކަތުގައިވެސް ވަރަށް ގިނަ ގޮންޖެހުންތަކެއް ހުރިކަމަށް ފޮރިން މިނިސްޓްރީން ބުނެއެވެ. އަދި އިންޑިއާގެ ވަކިވަކި ސްޓޭޓްތަކުން މީހުން އެއްކުރުމުގައިވެސް ދަތިތަކެއް ދިމާވިކަމަށާއި، ނަމަވެސް ޚާރިޖީ ވުޒާރާއާއި އިންޑިއާ ސަރުކާރު ގުޅިގެން އެ މަސައްކަތްތައް ކުރަމުންދާކަމަށް ފޮރިން މިނިސްޓްރީން ބުނެފައި ވެއެވެ.

މި ފްލައިޓްގައި އައިސްފައިވަނީ އިންޑިއާގެ ޕަންޖާބް ސްޓޭޓާއި، ކަލްކަތާ ސްޓޭޓާއި، ގުރްގާއޯން ސިޓީއާއި، ރިޝިކޭޝްއާއި، ނިއު ދިއްލީއާއި، ވެއްލޫރު ސިޓީއާއި، ޗެންނާއި ސިޓީއާއި، ޓްރިވެންޑްރަމް ސިޓީއާއި، ކޮޗިން ސިޓީގައި ތިބި ފަރާތްތަކެވެ.