ފަތުރުވެރިކަމުގެ ދާއިރާއިން 20،000 މާސްކާއި 5000 ސޫޓް ހަދިޔާ ކުރަނީ
ކޮވިޑް-19 ގެ އޮޕަރޭޝަނަށް 20 ހާސް އެން 95 މާސްކް އަދި 5000 ހަޒްމަޓް ސޫޓް ގެނެސްފައިވޭ
ޓުއަރިޒަމް މިނިސްޓަރު އަލީ ވަހީދު؛ ކަމެއް ބޭނުން ވެއްޖެ ހާލަތެއްގައި އެހީތެރިކަން އިންޑަސްޓްރީގެ ފަރާތުން ލިބެމުންދާނެ ކަމުގެ ޔަގީންކަން މިނިސްޓަރު ދެއްވި
ފްރަންޓްލައިންގައި މަސައްކަތް ކުރާ ފަރާތްތަކަށް ބޭނުންވާ މާސްކާއި ހަޒްމަޓް ސޫޓް ފަތުރުވެރިކަމުގެ ދާއިރާގައި ހިމެނޭ ފަރާތްތަކުން ހަދިޔާ ކުރަން ނިންމައިފި އެވެ.
ކޮވިޑްގެ ގައުމީ ޓާސްކް ފޯހުން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓުއަރިޒަމް މިނިސްޓަރު އަލީ ވަހީދު ވިދާޅުވީ, އާދީއްތަ ދުވަހު ޓުއަރިޒަމްގެ ފަރާތުން ކޮވިޑް-19 ގެ އޮޕަރޭޝަނަށް ގެނައި 20 ހާސް އެން 95 މާސްކް އަދި 5000 ހަޒްމަޓް ސޫޓްގެ މައިގަނޑު ޝިޕްމަންޓް ރާއްޖެ ގެނެސްފައިވާ ކަމަށެވެ. އަދި އިތުރު ސާމާނު އަންގާރަ ދުވަހު ނުވަތަ ބުދަ ދުވަހު ލިބޭނެކަމަށް މިނިސްޓަރު އަލީ ވަހީދު ވިދާޅުވި އެވެ.
އަލީ ވަހީދު ވިދާޅުވީ ޓުއަރިޒަމް އިންޑަސްޓްރީގެ ފަރާތުން ބައި މިލިއަން މާސްކް މީގެ ކުރިން ވެސް އެންޑީއެމްއޭއާ ހަވާލުކޮށްފައިވާ ކަމަށާއި، އެ މާސްކް ބޭނުން ކުރަމުންދާ ކަމަށެވެ. އަދި މި ދަނޑިވަޅުގައި ފްރަންޓްލައިންގައި މަސައްކަތް ކުރާ ފަރާތްތައް ބޭނުންކުރާ ސަމާނުތައް ރާއްޖެ ގެނެވިފައިވާ ކަމަށް އަލީ ވަހީދު ވިދާޅުވި އެވެ.
މީގެ އިތުރުން ބަލި ފެތުރެން ފެށި އިރު ޕޯޓްތަކުގައި ބޭނުން ކުރި 8 ތާމަލް ކެމެރާގެ ތެރެއިން 4 ކެމެރާ ފުލުހުންނަށް އަދި 4 ކެމެރާ އެމްއެންޑީއެފް އަށް ހަދިޔާކޮށްފައިވާ ކަމަށާއި، އެއީ ފުލުހުންނާއި އެމްއެންޑީއެފްގެ މަރުކަޒުތަކުގެ ސޭފްޓީ އެންޑް ސެކިއުރިޓީ ސްޓޭންޑަރޑް ހަރުދަނާ ކުރުމުގެ ގޮތުން ކަމަށް މިނިސްޓަރު އަލީ ވަހީދު ވިދާޅުވި އެވެ. އަދި މިކަމުގެ ސަބަބުން ފްރަންޓް ލައިންގައި މަސައްކަތް ކުރާ ފަރާތްތަކުގެ ރައްކާތެރިކަން ކަށަވަރު ކުރެވިގެންދާނެ ކަމަށް އަލީ ވަހީދު ވިދާޅުވިއެވެ.
މި އޮޕަރޭޝަނަށް ބޭނުންވާ އެހެނިހެން ވަސީލަތްތައް ޓުއަރިޒަމް ސިނާއަތުގެ ފަރާތުން ލިބެމުންދާކަން ފާހަގަ ކުރައްވާ މިނިސްޓަރު އަލީ ވަހީދު ވިދާޅުވީ އިތުރު ވެހިކަލްތަކާއި ރިސޯޓްތައް އަދި މިކަމަށް ކޮންމެ ކަމެއް ބޭނުން ވެއްޖެ ހާލަތެއްގައި އެހީތެރިކަން އިންޑަސްޓްރީގެ ފަރާތުން ލިބެމުންދާނެ ކަމަށެވެ.
