ފްރެންޗު ލީގުގެ ކުޅުންތެރިން އިހުތިޖާޖު ކުރަން ގޮވާލައިފި

އަންނަ ސީޒަނުގެ ފްރެންޗު ލީގުގައި 22 ޓީމު ނުހިމަނާ ނަމަ، ލީގުގެ ކުޅުންތެރިން އިހުތިޖާޖު ކުރަން ޓުލޫސްގެ ކުރީގެ ކޯޗު އެންޓޮއިން ކޮމްބުއާ ގޮވާލައިފި އެވެ.

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ފްރެންޗު ލީގު ކެންސަލް ކޮށް، ޕީއެސްޖީ އަށް ވަނީ ޗެމްޕިއަންކަން ދީފައެވެ. ޕީއެސްޖީ އަށް ޗެމްޕިއަންކަން ދިންއިރު، ޕީއެސްޖީ އެއްވަނައިގައި އޮތީ 12 ޕޮއިންޓުގެ ލީޑަކާ އެކުގައެވެ.

މި ނިންމުމާއެކު ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓް ވެފައެވެ. 19 ވަނައިގައި އޮތް ޓުލޫސް އާއި 18 ވަނައިގައި އޮތް ނިމްސްއާ ދެމެދު އޮތީ ހަތަރު ޕޮއިންޓުގެ ފަރަގެކެވެ.

އަމިއެންސް އާއި ޓުލޫސް އިން ގަބޫލުކުރާ ގޮތުގައި އެންމެ ރަނގަޅު ނިންމުމަކީ އަންނަ ސީޒަން 22 ޓީމާއެކު ކުޅުމެވެ. އެއީ ދެވަނަ ޑިވިޝަނުން ފުރަތަމަ ޑިވިޝަނަށް ޕްރޮމޯޓުވާ 2 ޓީމު ހިމަނައިގެންނެވެ.

ޓުލޫސްގެ ކުރީގެ ކޯޗު އެންޓޮއިން ކޮމްބުއާ ބުނީ ލީގު އެއްކޮށް ފުރިހަމަ ނުކޮށް ޓީމުތައް ރެލިގޭޓްވުމަކީ އެންމެ ރަނގަޅު ގޮތް ނޫން ކަމަށާއި، އެކަމުގެ ސަބަބުން ކުޅުންތެރިންނާއި ކްލަބުތަކަށްވެސް ބޮޑެތި ގެއްލުންތަކެއް ވާނެ ކަމަށެވެ. އަދި އެންމެ ރަނގަޅު ގޮތަކީ އެއްވެސް ޓީމެއް ރެލިގޭޓް ނުވެ، އަންނަ ސީޒަން 22 ޓީމާއެކު ކުރިއަށް ގެންދިޔުން ކަމަށްވެސް ވަނީ ބުނެފައެވެ. އަދި އެގޮތަށް ނުނިންމައިފި ނަމަ، ކުޅުންތެރިން އިހުތިޖާޖު ކުރަން ކޮމްބުއާ ވަނީ ގޮވާލާފައެވެ.

ކުޅުންތެރިން އިހުތިޖާޖު ކުރަން ޓުލޫސްގެ ކުރީގެ ކޯޗު ކޮމްބުއާ ގޮވާލިއިރު، ލީގު ކެންސަލް ކުރުމާ ގުޅިގެން އަމިއެންސް އިން އަންނަނީ ފެޓިޝަނެއް ހުށަހަޅަން ތައްޔާރުވަމުންނެވެ. އަދި މީގެ ކުރިން ލިޔޯން އިން ވަނީ ފްރެންޗު ލީގު ކެންސަލް ކުރުމާ ދެކޮޅަށް ކޯޓަށް ދާން ނިންމާފައެވެ. އެޓީމުން ކޯޓަށް ދާން ނިންމީ ޔޫރަޕުގެ ޖާގައެއް ނުލިބުމުން އެ ޓީމަށް ކުރިމަތިވި މާލީ ގެއްލުމުގެ ބަދަލު ހޯދުމަށެވެ.