ނުނިމި ހުރި މައްސަލަތަކުގެ ތެރެއިން ފުރަތަމަ ފަށާނީ ޙުކުމުގެ މަރުޙަލާގައި ހުރި މައްސަލަތައް: ޕީޖީ
ކްރިމިނަލް ކޯޓާ ގުޅިގެން މަސައްކަތްތަކެއް ކުރައްވާފައިވާކަމަށް ވިދާޅުވި
ކްރިމިނަލް ކޯޓުގައި ނުނިމި ހުރި މައްސަލަތައް ކުރިއަށް ގެންދިއުމާމެދު ޕީޖީ އޮފީހާ ގުޅިގެން އިންތިޒާމްތަކެއް ރާވާފައިވޭ
ނުނިމި ހުރި މައްސަލަތަކުގެ ޝަރީޢަތްތައް ކްރިމިނަލް ކޯޓުން އަލުން ފަށާއިރު، ފުރަތަމަ ކުރިއަށް ގެންދާނީ ޙުކުމުގެ މަރުޙަލާގައި ހުރި މައްސަލަތައްކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.
އާދިއްތަ ދުވަހުގެރޭ ރާއްޖެޓީވީގެ ކޮވިޑް-19 ކަވަރޭޖަށް ދެއްވި ޚާއްޞަ އިންޓަރވިއުއެއްގައި ޕީޖީ ހުސައިން ޝަމީމް ވިދާޅުވީ، ޝަރީޢަތް ނިމެންދެން ބަންދުގައި ތިބި މީހުންގެ ޝަރީޢަތްތައް ނުހިނގާ ލަސްވަމުންދާ މައްސަލައަކީ ނުހަނު ކަންބޮޑުވެ ވަޑައިގަންނަވާ ކަމެއް ކަމަށެވެ. އެގޮތުން އެކަން ޙައްލު ކުރެއްވުމަށްޓަކައި ކްރިމިނަލް ކޯޓާ ގުޅިގެން މަސައްކަތްތަކެއް ކުރައްވާފައިވާކަމަށް ޕީޖީ ވިދާޅުވިއެވެ.
ޕީޖީ ވިދާޅުވީ، މިހަފުތާއިން ފެށިގެން ޝަރީޢަތް ނިމެންދެން ބަންދު ކޮށްފައި ތިބި މީހުންގެ ތެރެއިން ޝަރީޢަތް ކުރިއަށް ގެންދެވޭނެ މައްސަލަތައް ކުރިއަށް ގެންދަވާނެ ކަމަށެވެ. އެގޮތުން މާފުށީ ޖަލުގައި ތިބި މީހުންގެ ތެރެއިން މާފުށީ ކޯޓަށް މީހުން ހާޒިރު ކޮށްގެން ޝަރީޢަތްތައް ކުރިއަށް ގެންދެވޭ ގޮތަށް އިންތިޒާމު ކޮށްފައިވާކަމަށް ޕީޖީ ވިދާޅުވިއެވެ.
ޕީޖީ ވިދާޅުވީ، މައްސަލަތައް ކުރިއަށް ގެންދިއުމުގައި ފުރަތަމަ އިސްކަންދޭނީ ޙުކުމުގެ މައްސަލަތަކާއި ޚުލާސާ ބަޔާން އިއްވުމުގެ މައްސަލަތައްކަމަށެވެ. އެއަށްފަހު ކުރިއަށް ގެންދާނީ ހެކި ހާޒިރު ކުރަންޖެހޭ މައްސަލަތަކުގެ ތެރެއިން ސިފައިންނާއި، ފުލުހުންނާއި، ދައުލަތުގެ މުއައްސަސާތަކުގައި ތިބި މީހުންގެ އިތުރުން ކަސްޓަމްސް އޮފިސަރުން ހެކިންގެ ގޮތުގައި ހާޒިރު ކުރަންޖެހޭ މައްސަލަތައްކަމަށް ވިދާޅުވިއެވެ. އޭގެ އިތުރުން، އެފަދަ މައްސަލަތަކަށްފަހު ދެން ކުރިއަށް ގެންދާނީ ޝަރީޢަތުގެ ކުރިން ހުށައަޅަންޖެހޭ ހުށައެޅުންތަކުގެ މައްސަލަތައް (ޕްރީ-ޓްރަޔަލް) މައްސަލަތައްކަން ޕީޖީ ފާހަގަކުރެއްވިއެވެ.
