ހަވީރުގެ ސަޔަށް ދިވެހިން ޢާންމުކޮށް ބަނަސް ކައި އުޅެއެވެ. އަނގަޔަށް މީރު މި ބަނަސް މި ފަހަރު ތަރާވީސް ގަޑީގައި ކިރު ސައިތައްޓަކައި ޖަހާލައިގެން ކާލަންވެސް އެންމެ ރަނގަޅުވާނެއެވެ. މި ބަނަސް ގޭގައި ވެސް ވަރަށް ފަސޭހައިން ތައްޔާރު ކޮށްލެވިދާނެއެވެ.

ފުށްގަނޑު ތެރެއަށް ހަކުރު، އީސްޓް، ބިސް، ކިރު އަޅައިގެން އޮމާންވަންދެން މޮޑެލާށެވެ. ފުއްގަނޑު އޮމާންވުމުން ބަޓަރު އަޅައިގެން އަނެއްކާ ވެސް މޮޑެލާށެވެ. މޮޑެ ނިމުމުން ފުށްގަނޑު ބޯތައްޓަކަށްލާ މަތި ޖެހުމަށްފަހު އެއް ރޭވަންދެން އައިސް އަލަމާރީގައި ބަހައްޓާށެވެ.

ބަނަސް މިހާރު އޮންނާނީ ފުފިއެވެ. އެއަށްފަހު، އަނެއްކާވެސް ފުށްގަނޑު މޮޑެލުމަށްފަހު ބަނަސް ހަދަން ބޭނުންވާ ވަރަށް ގުޅަ ހަދާލާށެވެ. ގުޅަ ހެދުމަށްފަހު އޭގެ ތެރެއަށް ޗޮކްލެކްޓް ކްރީމް ވެސް ބޭނުންނަމަ އެޅިދާނެއެވެ. ބަނަސްތެރެއަށް ކާން ބޭނުންވާ ވައްތަރެއްގެ ފްލޭވަރ އެއް އެޅިދާނެއެވެ. އެއަށްފަހު ޓްރޭގައި ގުޅަތައް ތަރުތީބު ކުރުމަށްފަހު 150 ޑިގްރީ ސެލްސިއަސްގައި 30 މިނިޓް ވަންދެން އަވަނުގައި ފިހެލާށެވެ.

ފިހެ ނިމުމުން ބަނަސް މަތީގައި ފިއްސަކުން ގޯލްޑަން ސިރަޕް އާއި ފެން އެއްކޮށްލުމަށްފަހު ހާކާލާށެވެ. އެއަށްފަހު 3 މިނިޓް ވަންދެން އަވަނުގައި ބެހެއްޓުމަށްފަހު ޓްރޭ ނަގާލާށެވެ.